«حات جازدىم قالام الىپ قان مايداننان»: استانادا مايدانگەرلەردىڭ مۇراعات حاتتارىنان جيناقتالعان كىتاپتىڭ تۇساۋكەسەرى ءوتتى.
ۇلى جەڭىستىڭ 80 جىلدىعىنا وراي ەۋرازيا ۇلتتىق ۋنيۆەرسيتەتىندە مايدانداعى قازاق باتىرلارىنىڭ بەلگىسىز مۇراعات حاتتارى جيناقتالعان «حات جازدىم قالام الىپ قان مايداننان» اتتى كىتاپتىڭ تۇساۋكەسەرى ءوتتى.
شاراعا مەملەكەت جانە قوعام قايراتكەرى قۋانىش سۇلتانوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, قر ۇلتتىق عىلىم اكادەمياسىنىڭ اكادەميگى ەرلان سىدىقوۆ, جازۋشى-پۋبليتسيست ساۋىتبەك ابدراحمانوۆ, جۋرناليست-جازۋشى جانات ەلشىبەكوۆ, قر پارلامەنتى ءماجىلىسىنىڭ دەپۋتاتتارى جاناربەك ءاشىمجان مەن قازىبەك يسا, جازۋشى, عالىمدار, ستۋدەنتتەر قاتىستى.
جيناقتا ۇلى وتان سوعىسىنىڭ اتاقتى باتىرلارى باۋىرجان مومىش ۇلى, مالىك عابدۋللين, ءازىلحان نۇرشايىقوۆ, ءاليا مولداعۇلوۆا سياقتى بەلگىلى تۇلعالارمەن قاتار اتى بەيمالىم, 130 قازاق جاۋىنگەرىنىڭ مايداننان جازعان سالەم حاتتارى, ولەڭ حاتتارى, ءانى مەن اۋەنى بار ليريكالىق حاتتارى توپتاستىرىلعان. سونىمەن قاتار كىتاپتا مەملەكەت باسشىسى قاسىم-جومارت توقاەۆتىڭ اكەسىنىڭ مايداننان قايتپاي قالعان تۋعان اعاسى قاسىم تۋرالى ەستەلىگى بەرىلگەن.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, تاريح عىلىمدارىنىڭ دوكتورى, قر ۇلتتىق عىلىم اكادەمياسىنىڭ اكادەميگى ەرلان سىدىقوۆ ءوز سوزىندە بۇل جيناقتى ەۋرازيا ۇلتتىق ۋنيۆەرسيتەتىنىڭ عالىمدارى دايىنداعانىن ەرەكشە اتاپ ءوتتى.
«بۇل – ءبىزدىڭ ۋنيۆەرسيتەت عالىمدارىنىڭ ەڭبەگى. كىتاپتىڭ ەرەكشەلىگى سول, مايداننان جازىلعان حاتتاردى جيناقتاپ, جانۇيالاردان سۇراستىرىپ, بۇرىن ەش جەردە جاريالانباعان حاتتاردى ەنگىزدىك. بۇل ەڭبەك ءارى قاراي جالعاسىن تاباتىن بولادى. سەبەبى قازىر ءار ۇيدە ساقتالعان حاتتار جەتكىلىكتى. ميلليونداعان حاتتار ءالى جارىق كورمەي جاتىر. سوعىستىڭ قاسىرەتىن, سۇمدىعىن ءتۇسىنۋ ءۇشىن مۇراعاتتاعى كىتاپ, قۇجاتتار, ەستەلىك, كينوفيلمدەر ازدىق ەتەدى. سوعىستىڭ شىن ءمانىن بىزگە سول قان مايداندا ءجۇرىپ, ءوزى سەزىنگەن دۇنيەلەردى ەلدەگى تۋعاندارىنا جازعان حاتتار كەڭىنەن بەرە الادى. ءبىز سوعىستىڭ تەرەڭ, قاتىگەز بەينەسىن ءتۇسىندىرۋ ارقىلى عانا بەيبىتشىلىكتىڭ قۇنىن بىلە الامىز», – دەپ اتاپ ءوتتى اكادەميك ەرلان سىدىقوۆ.
بۇل جيناقتاعى حاتتاردىڭ نەگىزگى بولىگى ۇلتتىق عىلىم اكادەمياسىنىڭ سيرەك كىتاپتار مەن قولجازبالار قورىنان الىنىپ, جارىققا شىعىپ وتىر. كىتاپتىڭ جالپى رەداكتسياسىن باسقارعان – تاريح عىلىمدارىنىڭ دوكتورى, اكادەميك ەرلان سىدىقوۆ.
حاتتاردى سۇرىپتاۋ بارىسىندا ءتۇرلى ءومىر تالقىسى, ءسوز ساپتاۋ ۇلگىلەرى, قاھارلى, اۋىر جىلدارداعى حالىقتىڭ وي-ورەسىنىڭ جالپى كورىنىسى كىتاپتا تولىق ورىن العان. جيناقتىڭ ماقساتىنىڭ ءبىرى – حابار-وشارسىز كەتكەن قازاق جاۋىنگەرلەرىنىڭ ەسىمدەرىن حاتتارى ارقىلى تاريحتا قالدىرۋ.
مەملەكەت جانە قوعام قايراتكەرى قۋانىش سۇلتانوۆتىڭ ايتۋىنشا, بۇل كىتاپ جەڭىل وقىلاتىن كىتاپتار قاتارىنان ەمەس.
«كىتاپتى جايباراقات وتىرىپ وقۋ مۇمكىن ەمەس, ءىشى تولعان تاعدىر مەن تاريح. بۇل – ۇلكەن قازىنا. قازىرگى جاستار سوعىستىڭ نە ەكەنىن, قانداي سوعىس بولعانىن ءبىلۋ ءۇشىن بۇل ەڭبەك وتە قۇندى. كىتاپ جازۋ – ينەمەن قۇدىق قازعانداي جۇمىس. ەلىمىز تىنىش بولسىن! سوعىستا قۇربان بولعان اتالارىمىزدىڭ ەرلىكتەرىن ۇمىتپايىق», – دەدى سپيكەر.
سونداي-اق شارادا جازۋشى, قر مەملەكەتتىك سىيلىعىنىڭ لاۋرەاتى ساۋىتبەك ابدراحمانوۆ, قر پارلامەنتى ءماجىلىسىنىڭ بۇرىنعى دەپۋتاتى دارحان مىڭباي, قر مەملەكەتتىك ەلتاڭباسىنىڭ اۆتورى جانداربەك مالىبەكوۆ, جازۋشى ءشاربانۋ بەيسەنوۆا جانە تاعى باسقالار ءسوز سويلەپ, كىتاپتىڭ ەرەكشە قۇندىلىعى تۋرالى ايتتى.
عالىمداردىڭ ايتۋىنشا, الداعى ۋاقىتتا زەرتتەۋ جۇمىستارى سەريالى كىتاپ تۇرىندە شىعارىلادى.