ەلىمىزدە پرەزيدەنت قاسىم-جومارت توقاەۆتىڭ ەكونوميكادا مەملەكەتتىڭ قاتىسۋىن ازايتۋ جانە جەكە سەكتوردىڭ ءرولىن ارتتىرۋ جونىندەگى جارلىعىن ورىنداۋ جۇمىستارى جالعاسىپ جاتىر. بۇل باستامالار باسەكەلەستىكتى دامىتۋ, ينۆەستيتسيا كولەمىن ارتتىرۋ جانە تيىمدىلىكتى ارتتىرۋعا باعىتتالعان. وسىنداي ۇدەرىسكە بەلسەندى قاتىسۋشىلاردىڭ ءبىرى — «سامۇرىق-قازىنا» قورى.
توپ ىشىندەگى وڭتايلاندىرۋ: بۇگىنگى احۋال قانداي؟
وڭتايلاندىرۋ جۇمىسىنىڭ ناقتى مىسالىنىڭ ءبىرى – «KEGOC» اق 100% ەنشىلەس ۇيىمى بولىپ سانالاتىن «ەنەرگوينفورم» اق كومپانياسىن قايتا قۇرىلىمداۋ تۋرالى شەشىمى بولدى. وسىلايشا, كومپانيانى KEGOC قۇرامىنا ەنگىزۋ جوسپارلانىپ وتىر. بۇل ءوز كەزەگىندە باسقارۋ قۇرىلىمىن جەڭىلدەتىپ, ەنەرگەتيكا سەكتورى جۇمىسىنىڭ تيىمدىلىگىن ارتتىرۋعا مۇمكىندىك بەرەدى.
«ەنەرگوينفورم» اق اقپاراتتىق-تەلەكوممۋنيكاتسيالىق جۇيەنى دامىتۋمەن اينالىسادى جانە ەنەرگەتيكا سالاسىنداعى كاسىپورىنداردا اقپاراتتىق جۇيەلەردى باسقارۋ مەن اپپاراتتىق-باعدارلامالىق كەشەندەردى اۆتوماتتاندىرۋ جانە تسيفرلاندىرۋعا قاتىستى جوبالاردى جۇزەگە اسىرادى.
«بۇل كومپانيا مەن بارشا قىزمەتكەرلەر, سەرىكتەستەر ءۇشىن ماڭىزدى شەشىم بولدى. كەز كەلگەن وزگەرىس قىزمەتكەرلەر مەن بارلىق تاراپتىڭ مۇددەلەرىن بارىنشا ەسكەرە وتىرىپ ەنگىزىلەتىنىنە سەنىمدىمىز», – دەپ اتاپ ءوتتى «KEGOC» باسشىسى ءنابي ايتجانوۆ.
بۇل رەتتە, «KEGOC» ءىرى ينفراقۇرىلىمدىق جوبالاردى جۇزەگە اسىرۋ جۇمىسىن جالعاستىرىپ جاتىر. ولاردىڭ اراسىندا قازاقستاننىڭ بەج-ءنىڭ وڭتۇستىك ايماعىنىڭ ەلەكتر ەنەرگەتيكالىق جۇيەسىن كۇشەيتۋ مەن باتىس ايماقتى ەلىمىزدىڭ بەج-سىمەن بىرىكتىرۋ باستاماسى بار. ەكى جوبا دا 2027 جىلى اياقتالادى دەپ جوسپارلانىپ وتىر.
بەيىندى ەمەس قۇرىلىمداردى تاراتۋ جۇمىسى قاتار جۇرەدى
بۇعان دەيىن «سامۇرىق-قازىنا» قورىنىڭ وكىلدەرى «سامۇرىق-قازىنا بيزنەس سەرۆيس» جشس-ءىن تاراتۋ جوسپارى تۋرالى مالىمدەگەن ەدى. بۇل كومپانيا سەرۆيستىك قىزمەتتەردى ۇسىنۋ ماقساتىندا قۇرىلعان-دى.
«سامۇرىق-قازىنا» اق باسقارما توراعاسى نۇرلان جاقىپوۆ قور اكتيۆتەر قۇنىن ارتتىرۋ, بەيىندى ەمەس ۇيىمداردى تاراتۋ جانە نارىققا قاراي يكەمدەلىپ, باعدارلانعان قۇرىلىمدى قالىپتاستىرۋ بويىنشا جۇمىستاردى جالعاستىرىپ جاتقانىن اتاپ وتكەن ەدى.
ەكونوميكانى ليبەراليزاتسيالاۋ باعدارى
مۇنداي قادامداردىڭ بارلىعى پرەزيدەنت قاسىم-جومارت توقاەۆ بەلگىلەگەن جالپى ستراتەگيانىڭ ءبىر بولىگى بولىپ سانالادى. ەكونوميكانى ليبەراليزاتسيالاۋ باعدارى مەملەكەتتىڭ بيزنەستەگى ۇلەسىن كەزەڭ-كەزەڭىمەن ازايتىپ, بىرقاتار فۋنكتسيالاردى جەكە سەكتورعا بەرۋدى كوزدەيدى. بۇل ءتيىمدى باسقارۋدى كۇشەيتۋگە, باسەكەلەستىكتى ارتتىرۋعا جانە وتاندىق كاسىپكەرلەر ءۇشىن جاڭا مۇمكىندىكتەر اشىپ, شەتەلدىك ينۆەستورلاردىڭ كەلۋىنە قولايلى جاعداي جاساۋعا ىقپال ەتۋى ءتيىس.
قازىرگى تاڭدا «سامۇرىق-قازىنا» اق اكتيۆتەرىنىڭ كولەمى بويىنشا توپ-25 قاتارىنا كىرەدى. 2021 جىلدان 2024 جىلعا دەيىنگى ورتاشا جىلدىق تابىس ءوسىمى 13%-دى, ال EBITDA – 5%-دى قۇرادى.
2024 جىلى مەملەكەت پايداسىنا 1,354 تريلليون تەڭگە قارجى اۋدارىلدى. بۇل كورسەتكىش ەنشىلەس كومپانيالاردان الىنعان ديۆيدەندتەر كولەمىنەن 6 ەسە كوپ بولىپ وتىر.
نەگىزگى ماقسات – باسقارۋداعى اكتيۆتەر قۇنىن ارتتىرىپ, تىكەلەي شەتەلدىك ينۆەستيتسيالاردى تارتۋ.
ماينۇر جاناقوۆا