ءبىز قازاقستان حالقى اسسامبلەياسىنىڭ 30 جىلدىق مەرەيتويىن اتاپ ءوتىپ وتىرمىز. بۇل – ۇلكەن بەلەس. وسى جىلدار ىشىندە اتقارىلعان جۇمىس از ەمەس. ارينە, ءومىر بولعان سوڭ كەمشىلىگى دە, جەتىستىگى دە بولادى. دەگەنمەن تۇتاستاي قاراعاندا, اسسامبلەيا ءوز ميسسياسىن ايتارلىقتاي دەڭگەيدە اتقارىپ كەلەدى.
اسسامبلەيا – ەلدىڭ تۇتاستىعى مەن تىنىشتىعى جولىندا قۇرىلعان قۇرىلىم. ول ەلىمىزدىڭ ءاربىر ازاماتىنىڭ تەڭدىگىن, ءوز ەلىنە سەنىمدىلىگىن قامتاماسىز ەتۋدى ماقسات تۇتتى. قازاق – ەجەلدەن تەڭدىكتى تۋ ەتكەن حالىق. قازاق تەڭدىكتى كوتەرەدى, بىراق كەمدىكتى كوتەرمەيدى. سوندىقتان دا اسسامبلەيا سول حالىقتىڭ بولمىسىنا ساي قۇرىلىپ, ەلدىڭ رۋحاني بىرلىگىن بەكەمدەۋگە باعىتتالعان.
وتىز جىلدىڭ ىشىندە اسسامبلەيانىڭ شارىقتاعان شاعى دا, سايابىرسىعان كەزى دە بولدى. كەيىنگى جىلدارى مەملەكەتتىك تىلگە, سالت-داستۇرگە, ادەت-عۇرىپقا كوڭىل ءبولىنىپ, اسىرەسە جاستاردىڭ قازاق ءتىلىن ۇيرەنۋگە دەگەن ىنتاسى ارتىپ كەلە جاتقانى قۋانتادى. بۇل – دۇرىس باعىت. بىراق مەنىڭ ارمانىم – وسى ۇيىم العاش قۇرىلعان كۇننەن باستاپ ءتۇرلى ەتنوستار قازاقتىڭ توڭىرەگىنە توپتاسىپ, قازاقتىڭ سالت-ءداستۇرىن, مادەنيەتىن قۇرمەتتەپ, وسى جەردىڭ يەسى قازاق حالقىنا قۇرمەتپەن قاراپ ءومىر سۇرسە دەگەن نيەت ەدى. ەندى, قۇدايعا شۇكىر, ول دا بىرتىندەپ جۇزەگە اسىپ كەلە جاتىر. «كوش جۇرە تۇزەلەدى» دەيدى قازاق, مەن سوعان سەنەمىن. الدە دە كوڭىل تولمايتىن تۇستار بار, بىراق ولار دا رەتىمەن ىڭعايلانادى.
جالپى, سالىستىرمالى تۇردە الىپ قاراساق, ەلىمىز بەيبىتشىلىگىمەن, دوستىعىمەن, كەڭپەيىلىمەن وزگەلەردەن وزىق تۇر. قازاق – دالاسىنداي دارقان حالىق. ونىڭ كەڭدىگى – تەگىنەن, تەكتىلىگى – باباسىنان. ءبىزدى 1944 جىلى جەر اۋدارىپ اكەلگەندە, قازاق حالقى بىزگە قاباعىن شىتقان جوق. سول قيىن-قىستاۋ زاماندا بارىن ءبولىسىپ, جىلى ءسوزىن ايامادى. قازاق وزگەنىڭ جانىن ۇعىپ, جۇرەكپەن تۇسىنە ءبىلدى. ستالين جىلاتقان حالىقتى قازاق جۇباتا ءبىلدى. مەن وسى حالىقتى سوندىقتان ەرەكشە باعالايمىن.
ال ەندى وسى تىنىشتىقتى ساقتاۋ – ءاربىر ازاماتتىڭ مىندەتى. ۇلتقا قىزمەت ەتۋ ۇرانمەن ەمەس, شىنايى ارەكەتپەن كورىنۋگە ءتيىس. جەكە باستىڭ مۇددەسىنەن بۇرىن, ۇلتتىڭ مۇددەسىن بيىك قويعانىمىز ابزال. سوندا عانا ءبىز ناعىز ەلگە ادال ۇل-قىزدار بولامىز. مەن بارلىق ازاماتتى ەل بولاشاعى ءۇشىن بىرىگىپ ارەكەت ەتۋگە شاقىرامىن. ۇلتتىق بىرەگەيلىكتى ساقتاۋ, مەملەكەتتىك ءتىلدى ۇلىقتاۋ, ورتاق تاريح پەن تاعدىردى قۇرمەتتەۋ – بۇل بارشامىزعا ورتاق جاۋاپكەرشىلىك.
قازاق – وسى ەلدىڭ ۇيىتقىسى. قازاقتىڭ توڭىرەگىنە توپتاسۋ – ۇلتتى ۇلىقتاۋ ەمەس, ەلدى بىرىكتىرۋدىڭ جولى. مەملەكەتتىك ءتىل – وزەگىمىز. ءبىز وسى رۋحپەن, وسى نيەتپەن العا باسۋىمىز كەرەك. اسسامبلەيا سىندى ۇيىمدار سونىڭ دانەكەرى بولا الادى. سوندىقتان بۇل قۇرىلىمنىڭ جۇمىسى جاندانىپ, جاڭا سەرپىنمەن دامي تۇسسە ەكەن دەيمىن. ەل ىشىندە تاتۋلىق پەن تىنىشتىق سالتانات قۇرسىن! قۇداي تەك كوپ كورمەسىن! قازاقتىڭ جەرى امان, ەلى ءبۇتىن بولعاي!
اسىلى وسمان,
قازاقستاننىڭ ەڭبەك سىڭىرگەن قايراتكەرى, ء«تىل جاناشىرى» قۇرمەت بەلگىسىنىڭ يەگەرى