2025 جىلعى جاسوسپىرىمدەر اراسىنداعى ءىىى جازعى ازيا ويىندارى 22-31 قازان ارالىعىندا باحرەيننىڭ استاناسى – مانامادا وتەتىن بولدى. جارىستا جەڭىل اتلەتيكا, بادمينتون, باسكەتبول (3x3), ات سپورتى, كيبەرسپورت, مۋاي-تاي, گولف, گاندبول, دزيۋدو, دجيۋ-دجيتسۋ, ارالاس جەكپە-جەك, ۆەلوسپورت, ءجۇزۋ, ۇستەل تەننيسى, تاەكۆوندو, ترياتلون, كۇرەس, اۋىر اتلەتيكا, كاباددي, ۆولەيبول, تەكبول, جاعاجاي ۆولەيبولى سەكىلدى 14 سپورت تۇرىنەن جۇلدەلەر ساراپقا سالىنادى. بۇل باسەكەلەردە 14-18 جاس ارالىعىنداعى جەتكىنشەكتەر باق سىنايدى. ەستەرىڭىزگە سالا كەتەيىك, جازعى ازيادانىڭ الاۋى العاش رەت 2009 جىلى سينگاپۋردە تۇتانسا, ودان كەيىنگى دودانى 2013 جىلى قىتايدىڭ نانكين قالاسى قابىلدادى. بيىلعى جارىس ءاۋ باستا تاشكەنتتە ۇيىمداستىرىلادى دەپ جوسپارلانعان ەدى. كەيىننەن وزبەكستان جاعى جارىستى وتكىزۋدەن باس تارتتى.
مىسىردىڭ حۋرگادا قالاسىندا ارتىستىك جۇزۋدەن وتكەن الەم كۋبوگىندە ەدۋارد كيم قولا مەدال يەلەندى. تەحنيكالىق باعدارلامادا ونەر كورسەتكەن ول 211,2383 ۇپاي جيدى. جەرلەسىمىز قىتايلىق مە گو (224,5450 ۇپاي) مەن ۇلىبريتانيالىق رانجو تومبليننەن (218,7650 ۇپاي) عانا قالىپ قويدى. جارىستا الديار رامازانوۆ التىنشى ورىنعا تابان تىرەسە, ۆيكتور درۋزين سەگىزىنشى ساتىعا جايعاستى.
تانىمال لاتۆيالىق مامان لەونيد تامبيەۆ كەلەسى ايدا شايبالى حوككەيدەن شۆەتسيا مەن دانيادا جالاۋى جەلبىرەيتىن الەم چەمپيوناتى قارساڭىندا ەلىمىزدىڭ ۇلتتىق قۇراماسىنىڭ باس باپكەرى ولەگ بولياكيننىڭ كومەكشىسى بولىپ تاعايىندالدى. 54 جاستاعى بالتىق جاعالاۋىنىڭ وكىلى ءار جىلدارى بىرقاتار مەملەكەتتە جاتتىقتىرۋشىلىق قىزمەت اتقاردى. كەزىندە قاراعاندىنىڭ «سارىارقاسىنىڭ» باس باپكەرى دە بولدى. بۇل كۇندەرى تامبيەۆ ۆلاديۆوستوكتىڭ «ادميرالىن» جاتتىقتىرادى.