پارلامەنت سەناتىنىڭ دەپۋتاتتارى قازاقستان حالقى اسسامبلەياسى كەڭەسىنىڭ قۇرىلعانىنا 30 جىل تولۋىن مەرەكەلەۋگە وراي وتكەن وتىرىسقا قاتىستى. ءىس-شاراعا قاتىسۋشىلار قحا-نىڭ قوعامدىق كەلىسىم مەن ەتنوسارالىق ديالوگتى نىعايتۋعا قوسقان ۇلەسىن, سونداي-اق اسسامبلەيانى جاڭا جاعدايدا ودان ءارى دامىتۋدىڭ باسىم باعىتتارىن تالقىلادى.
سەناتور نۇرتورە ءجۇسىپ وتىرىس بارىسىندا ءاربىر ەتنوس وكىلىنىڭ ەلىمىزدىڭ دامۋىنا قوسقان ۇلەسى مەن داۋسى ەستىلۋىندە قازاقستان حالقى اسسامبلەياسى ءرولىنىڭ ماڭىزدى ەكەنىن اتاپ ءوتتى. ول قوعامدىق ءومىر, جاستار تاربيەسى جانە ۇلت بولاشاعىن قالىپتاستىرۋدا اسسامبلەيانىڭ زور اسەر ەتەتىن جاندى, سەرپىندى تەتىك ەكەنىن ناقتىلادى.
«قازاقستان حالقى اسسامبلەياسى – ەرەكشە ينستيتۋت. بۇل جاي عانا قوعامدىق ۇيىم ەمەس, ول پارلامەنتكە دەپۋتاتتاردى ۇسىنۋ سالاسىنداعى ساياسي سالماعى مەن وكىلەتتىگى بار كونستيتۋتسيالىق ورگان. اسسامبلەيا قىزمەت ەتكەن 30 جىلدا ازاماتتىق بەيبىتشىلىكتى, ەتنوسارالىق كەلىسىم مەن تولەرانتتىلىقتى نىعايتۋدىڭ ناقتى بەينەسىنە اينالدى. ونىڭ جۇمىسىنىڭ ارقاسىندا الۋان ءتۇرلى مادەنيەتتەردى مەملەكەتىمىزدىڭ نەگىزگى باسىمدىعىنا اينالدىرۋعا مۇمكىندىك تۋدى», دەدى ن.ءجۇسىپ.
سەناتور اسسامبلەيا جۇمىس ىستەگەن جىلداردا قوعامدىق ديپلوماتيا ورتالىعىنا اينالعانىن جانە جاھاندانۋ مەن كوشى-قون ۇدەرىسىنەن باستاپ, تىلدەردى ساقتاۋ مەن كەمسىتۋشىلىككە قارسى ءىس-قيمىلعا دەيىنگى قازىرگى زاماننىڭ وزەكتى سىن-قاتەرلەرىن تالقىلاۋدا ماڭىزدى تۇعىرناماعا اينالعانىن اتاپ ءوتتى.
«قازاقستان حالقى اسسامبلەياسى – بۇل كوپۇلتتى ەلدە ديالوگكە, ءوزارا سىيلاستىق پەن ىنتىماقتاستىققا باسىمدىق بەرىلەتىن قازاقستاندىق كونسەنسۋس ۇلگىسى. بۇل بارلىق ەتنوس وكىلىنىڭ شەشىم قابىلداۋ جانە ازاماتتىق تۇتاستىقتى قالىپتاستىرۋ ۇدەرىسىنە قاتىسۋىن قامتاماسىز ەتەتىن پارمەندى تەتىك. بۇل جەردە تەك تولەرانتتىلىق تۋرالى ەمەس, اركىمنىڭ ەل بولاشاعىنا شىنايى قاتىسۋى مەن اتسالىسۋى تۋرالى ايتىلىپ وتىر. اسسامبلەيا بۇگىنگى تاڭدا جەتىلگەن, ءتيىمدى جانە سۇرانىسقا يە ينستيتۋت ەكەنى ايقىن. ونىڭ تاريحى قازىرگى قازاقستان تاريحىنىڭ, ديالوگ, سەنىم جانە جاۋاپكەرشىلىك تاريحىنىڭ ءبىر بولىگى», دەدى دەپۋتات.