شالقار قالاسىندا اعىلشىن ءتىلىن وقىپ ۇيرەنۋگە ىنتالى وقۋشىلاردىڭ قاتارى كوبەيىپ كەلەدى. ولاردىڭ ءتىل ۇيرەنۋگە دەگەن قىزىعۋشىلىعىن ارتتىرىپ, ءبىلىمىن شىڭداۋدا «Akzer_english» وقۋ ورتالىعىنىڭ قولداۋى كوپ. بىلتىر وسى ورتالىقتىڭ وقۋشىلارى تۇركيا ەلىندە وتكەن جارىستان جۇلدەلى ورىندى يەلەنىپ قايتقان ەدى.
ەندى مىنە, جاقىندا اراب مەملەكەتىنىڭ دۋباي قالاسىندا وتكەن اعىلشىن ءتىلى جانە مەنتالدى اريفمەتيكا بويىنشا حالىقارالىق جارىستا شالقار اۋدانىنىڭ وقۋشىلارى جۇلدەلى ورىنداردى يەلەنىپ قايتتى. ولاردى اتاپ ايتساق, №8 ورتا مەكتەبىنىڭ وقۋشىلارى ايانا امانجولوۆا I ورىندى, رايان انەس II ورىندى يەلەندى. III ورىندى №2 مەكتەپ-گيمنازياسىنىڭ وقۋشىسى الباتىر قامبار مەن №1 مەكتەپ-گيمنازياسىنىڭ وقۋشىسى سەزىم سۇندەتباي جانە №8 ورتا مەكتەبىنىڭ وقۋشىسى اقەركەم جادىراسىن جەڭىپ الدى.
– زەيىندى وقۋشىلار باق سىناعان بۇل حالىقارالىق جارىسقا ءۇندىستان, وزبەكستان, قىرعىزستان سىندى ءتۇرلى ەلدەردەن كەلگەن الەم تىلدەرىنە جۇيرىك بالالارمەن باسەكەگە تۇسكەن وقۋشىلارىمىز سايىس بارىسىندا كەرەمەت اسەرگە بولەنىپ, وزگە ەلدىڭ مادەنيەتى مەن تىلىمەن, داستۇرىمەن تانىسىپ, كوكجيەكتەرىن كەڭەيتىپ قايتتى. ولار ارقايسىسى بۇل جارىسقا دا ۇلكەن سەنىممەن باردى. الايدا ءار ەلدەن قاتىساتىن ورەندەردى تانىستىرار ساتتە سول ەلدىڭ ءانۇرانى ورىندالىپ, ەرەكشە قۇرمەت كورسەتىلەدى ەكەن. وسى ساتتە وقۋشىلارىمىز ءسال تولقىدى. «بۇل ەلگە كەلىپ, باق سىناۋلارىڭنىڭ ءوزى ۇلكەن جەڭىس» دەپ, مەن ولاردى جىگەرلەندىردىم. دەگەنمەن ءۇمىتىمىز اقتالىپ, بارلىق وقۋشىمىز جوعارى بيىكتەن كورىندى, –دەيدى «Akzer_english» وقۋ ورتالىعىنىڭ جەتەكشىسى اقزەر سۇگىرالينا.
«ۇستازى مىقتىنىڭ ۇستامى مىقتى» دەمەكشى, شالقارلىق وقۋشىلاردى اعىلشىن ءتىلىن ۇيرەتۋدە اتالعان وقۋ ورتالىعىنىڭ جەتەكشىسى اقزەر اقىلبەكقىزىنىڭ دا ەڭبەگىندە ايتا كەتكەن ءجون. ول 2012–2013 وقۋ جىلىندا ق.جۇبانوۆ اتىنداعى اقتوبە ۋنيۆەرسيتەتىنىڭ شەتەل ءتىلى: ەكى شەتەل ءتىلى ماماندىعىن قىزىل ديپلوممەن اياقتاعان. وسى جىلى اتالعان وقۋ ورنىنىڭ فيلولوگيا ماماندىعى بويىنشا ماگيستراتۋراعا ءتۇسىپ, 2015 جىلى گۋمانيتارلىق عىلىمداردىڭ ماگيسترى اكادەميالىق دارەجەسى بويىنشا ۇزدىك بىتىرگەن. اقتوبە قالالىق جانە وبلىستىق ءۇش ءتىلدى ء«تىلدارىن» بايقاۋلارىنىڭ I ورىن يەگەرى. 2018 جىلى ءبىلىم جانە عىلىم مينيسترلىگىنىڭ بىرلەسكەن جوباسى اياسىندا جانە دۇنيەجۇزىلىك بانكتىڭ قارجىلاندىرۋىمەن جۇزەگە اسقان «Zhas Project» باعىتىمەن 1 ميلليون تەڭگە گرانت ۇتىپ الىپ, وعان اعىلشىن ءتىلىن ۇيرەتۋ ورتالىعىن اشادى. بۇگىندە بۇل ورتالىقتا تۇراقتى 80 وقۋشى اعىلشىن ءتىلىن ۇيرەنىپ وتىر.
شاعىن ورتالىقتان قوسىمشا شەت ءتىلىن ۇيرەتىپ, الەم ەلدەرىندە وتەتىن ءبىلىم باسەكەسىندە شاكىرتتەرىنىڭ باعىن سىناتىپ جۇرگەن اقزەر اقىلبەكقىزىنىڭ ەڭبەگىنە اتا-انالار قاۋىمى ءدان ريزا. ابىرويمەن الىس ساپاردان كەلە جاتقان جەڭىمپاز وقۋشىلاردى شالقار تەمىرجول ۆوكزالىنان ۇلكەن سالتاناتپەن كۇتىپ الىپ, قۇرمەت كورسەتۋى – سونىڭ ءبىر كورىنىسى.
مۇحتار مىرزالين
اقتوبە وبلىسى,
شالقار قالاسى