بۇگىن 92 جاسىندا قازاقتىڭ قابىرعالى قالامگەرى اكىم تارازي ءپاني جالعاننىڭ پاراعىن جاۋىپتى.
عاجايىپ سايكەستىك: ءدال وسى ۋاقىتتا «تارازى» شوقجۇلدىزى دا سۇمبىلەنى سوڭىنا سالىپ, ۇركەردى جانىنا الىپ, جەرگە ءتۇسىپ بارادى. ول سوناۋ تاڭ سۋىر تامىزدىڭ ىلكى دەكاداسىندا دۇنيەگە قايتا كەلەدى. ياكي جاڭا دۇنيە, جاس تولمەن, بۋىندى ءشوپ, بۇلتتى كوكپەن قايتا قاۋىشادى…
اكىم اعامىز دا ەشقاشان جەرباۋىرلاپ جۇرمەگەن رۋحتى قالامدوز. ىلكى تۋىندىسى «قۇيرىقتى جۇلدىز» (1966) اتالعانمەن, قالامگەردىڭ بۇيرىقتى جۇلدىزى ۇزاق جاندى. ابدەن تولىسقان شاعىندا «قورقاۋ جۇلدىزدى» جازعانمەن, القاۋ جۇلدىزى تۇڭعيىققا ەمەس, تىم بيىككە شىرقادى. ونىڭ رۋح قىرانى «ۇياسىن بۇلتقا سالدى!» سول قاسيەت بارىمىزگە ۇلگى!
الىپتار شوعىرى ازايىپ بارادى. بۇل جىلان جىلى جاقسىلارىمىزدى جۇتۋمەن جىلجۋدا. دەگەنمەن ىلگەرىدەن ءۇمىت كۇتكەن جۇرت ەدىك, ءتۇبى قايىر دەپ, قايىرىن سۇرايىق!
شاڭىراعىن سۇلۋ سەزىمدەرگە بەسىك قىلىپ, تەرەزەسىن تازا ويلارعا ەسىك قىلىپ, اڭىز ادامدى بوپەدەي سايالاعان, ابىز اعامدى اناداي ايالاعان روزا حانىم مۇقانوۆاعا كوڭىلقوسىمدى بىلدىرەمىن! قاستەرلى شاڭىراقتا ۇيالاعان باقتىڭ ساۋلەسى كوشپەگەي, قۇتتىڭ تاۋبەسى وشپەگەي!
سۆەتقالي نۇرجان,
مەملەكەتتىك سىيلىقتىڭ لاۋرەاتى, اقىن