بەۋ, دۇنيە-اي! ومىردەن اكىم اعا ءۇرتاي ۇلى دا ءوتىپتى.
اكىم اعامەن كينو سالاسىندا كوپ جىل بويى ارىپتەس بولدىق. اعا باسشى, ءبىز قوسشى رەتىندە قىزمەت اتقارىستىق. الدىن كوردىك. كىسىلىگىن تانىدىق. كەم سوققانىن كورگەنىمىز جوق.
ادەبيەت مايدانىندا دا جازۋشى اكىم ءتارازيدىڭ تالانتىنا تىم ەرتەدەن ءتانتى بولدىق. ونىڭ ادەبيەتتەگى تۇڭعىش كىتابى «قۇيرىقتى جۇلدىزعا» رەتسەنزيا جازدىق. ادەبيەت اتتى الىپ ايدىنعا ەشكىمگە ۇقسامايتىن ەرەك مانەرلى, ءوز دۇنيەتانىمى بار ۇلكەن جازۋشىنىڭ كەلگەنىن پاش ەتتىك. ولقى تۇسكەن جەرى بولمادى. ءار ەڭبەگىمەن وقىرمان ءۇمىتىن اقتادى. ەل تانىمىن, ۇلت رۋحانياتىن جاڭا كوكجيەكتەر مەن كەڭىستىكتەرگە جەتەلەدى. كوپ ۇزاماي ومىرگە سان سالالى, سالماقتى, تەك تارازي عانا جازا الاتىن, تەك تارازي بولمىسىنان تۋعان رومان «تاسجارعان» كەلدى. زاتىن اتى ايگىلەپ تۇر.
وسى كىتاپ قولعا تيىسىمەن قالت ەتپەي قادالىپ وقىعانىم ەستە. ويتكەنى اكىم كورگەن كەڭەستىك شىندىق روماندا سوتسرەاليزم تالابىنا سىيمايتىن تارپاڭ شىندىق بولىپ شىققان ەكەن. تارازي تالانتى كەڭەستىك شىندىققا دەگەن وسىناۋ سىنشىل قالامگەر قالىبىنان تايمادى. ساحنا ءۇشىن جازسا دا. ەكران ءۇشىن جازسا دا. حالقىن قالتقىسىز ءسۇيدى.
قالامگەردىڭ قازاق ءۇشىن كۇرەسى, اسىرەسە «اندرەي» اتتى دەرەكتى وچەركىندە, تىپتەن اشىق اتويلاپ كورىندى. كۇرەسكەرلىك تۇلعاسى تۋ كوتەردى. ولمەس مۇراتتاردى بيىك ۇستاپ ءوتتى.
تارازي تۇلعا 92 جىل سوققان جۇرەگىمەن ۇلتقا قىزمەت ەتۋدىڭ ەرەن ۇلگىسىن كورسەتتى. ادەمى, ابىرويلى قارتايدى. اللا پاناسىنا السىن. و دۇنيەدە ءجۇزى جارقىن بولارى حاق.
رۋحى اللا الدىندا شات بولىپ, تۇراعى پەيىش باقتان بۇيىرسىن!
سماعۇل ەلۋباي,
قازاقستاننىڭ حالىق جازۋشىسى