كوزىنىڭ تىرىسىندە ادەبيەتتىڭ اكىمى اتانعان كورنەكتى جازۋشى, دراماتۋرگ, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى اكىم ءۇرتاي ۇلى تارازي باقيعا وزدى. ۇلت ادەبيەتىنىڭ, كينوسى مەن دراماتۋرگياسىنىڭ دامۋىنا ولشەۋسىز ۇلەس قوسقان بىرەگەي تۇلعانىڭ سوڭىندا الەمدىك رۋحاني قازىناعا اينالعان مول مۇرا قالدى.
تۋعان ەلىنىڭ جوعىن جوقتاپ, رۋحىن كوتەرۋ جولىندا تەر توكتى. قالامىنان تۋعان العاشقى شىعارمالارىنان باستاپ كەيىنگى تۋىندىلارىنا دەيىن وزەكتى تاقىرىپتى كوتەردى. ۇلت مىنەزىن, الەۋمەت ماسەلەلەرىن تەرەڭ تولعاعان ەڭبەكتەرى بىرنەشە بۋىننىڭ رۋحاني جان ازىعى رەتىندە سانا-سەزىمىنە قوزعاۋ سالدى. ۇلت رۋحانياتىن جەتىلدىردى.
اكىم تارازي العاشقى ەڭبەگى «قۇيرىقتى جۇلدىز» پوۆەسىنىڭ وزىمەن-اق ادەبيەت اۋىلىنا يمەنبەي ەنگەنىن وقىرمان جاقسى بىلەدى. ودان بەرىدە تىنىمسىز ەڭبەك پەن اسقان قارىم-قابىلەت ارقاسىندا «ۇلكەن اۋىل» (1968), «اسۋ-اسۋ» (1970), «كوكجيەك» (1980), «باسىنان قاراتاۋدىڭ» (1984) پوۆەست-اڭگىمەلەرى ۇلت ادەبيەتىنىڭ قورجىنىن ەسەلەي ءتۇستى. «بۇلتقا سالعان ۇياسىن» اتتى تۇڭعىش رومانى جوعارى باعالانىپ, وقىرماننىڭ كوڭىلىنەن شىقتى. «تاسجارعان», «كەن», «جازا», «شەر», «ماحاببات جىرى», «قيانات» سىندى روماندارى قازاق ادەبيەتىنىڭ شوقتىقتى شىعارمالارى قاتارىنا قوسىلدى. التىن قوردا ساقتالعان «تۇلپاردىڭ ءىزى», «ارمان اتامان», «قاراش-قاراش», «مۇستافا شوقاي» سىندى كينوتۋىندى ستسەناريلەرىنىڭ اۆتورى اكىم ءتارازيدىڭ ءجۇرىپ وتكەن جولى – ۇلتتىڭ كوشەلى مۇراتىن تۇگەندەگەن قىرۋار ەڭبەك پەن وتەلگەن بورىشتىڭ جولى.
دۇنيەدە ادەبيەتتىڭ داڭعىل بوزى, ۇلتىنىڭ ۇلىقتى ۇلى اتانۋ – تاڭداۋلى تۇلعالاردىڭ ەنشىسىنە جازىلعان باق. ىلديدان شاپسا توسكە وزعان وتانشىل تۇلعا قالامىمەن عانا ەمەس, بولمىس-بىتىمىمەن قوعامدىق جيىنداردا دا قايراتكەرلىك قىرىنان تانىلعانىن بىلەمىز. كەڭەس جۇيەسىن سىلكىپ العان جەلتوقساندا دا بيلىكتى مىسىمەن جاسقاعان تۇلعانىڭ رۋحى پەيىشتە شالقىسىن.
«Egemen Qazaqstan» قالامگەرلەرى