پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ جەتەكشىلىگىمەن قازاقستان دەلەگاتسياسى كابۋلعا جۇمىس ساپارىمەن باردى. ساپار اياسىندا ۆيتسە-پرەمەر ەلىمىزدىڭ اتىنان اۋعانستان حالقىنا جىبەرىلگەن گۋمانيتارلىق كومەكتىڭ ەكىنشى جارتىسىن اۋعان تاراپىنا تاپسىردى, سونداي-اق وسى ەلدىڭ پرەمەر-ءمينيسترىنىڭ ورىنباسارى ابدۋل عاني بارادارمەن كەزدەستى.
2021 جىلدان بەرى قازاقستان اۋعانستانعا ونداعان مىڭ توننا ۇن, ازىق-ت ۇلىك, ءدارى-دارمەك, تۇرمىستىق زات پەن جىلى كيىم جىبەرگەن. سونىمەن قاتار بيىل ناۋرىز ايىندا الماتىدا ورنىقتى دامۋ ماقساتتارى بويىنشا ورتالىق ازيا مەن اۋعانستان ەلدەرىنە ارنالعان بۇۇ ايماقتىق ورتالىعى اشىلدى. سەرىك جۇمانعارين ابدۋل عاني بارادارمەن كەزدەسۋدە اتاپ وتكەندەي, ايماقتىق ورتالىقتى قۇرۋداعى نەگىزگى ماقسات – وا ەلدەرىنىڭ اۋعانستانمەن الەۋمەتتىك-ەكونوميكالىق جانە ىسكەرلىك ىنتىماقتاستىعىن جانداندىرۋ. ورتالىق ازيا ەلدەرى قازاقستاندىق باستاماعا قولداۋ ءبىلدىردى.
قازاقستان اۋعانستاننىڭ نەگىزگى ساۋدا سەرىكتەستەرىنىڭ وندىعىنا كىرەدى. استىق پەن ۇن قازاقستاندىق ءداستۇرلى تاۋارلار سانالادى. 2024 جىلى اۋعانستان نارىعىنا وتاندىق قانت ەكسپورتىنىڭ ايتارلىقتاي ءوسۋى بايقالدى – 143 مىڭ توننا. بۇل 2023 جىلمەن سالىستىرعاندا بىرنەشە ەسە كوپ (19,1 مىڭ توننا). اۋعانستان نارىعىنا كونديتەرلىك جانە ۇن ءونىمىن جەتكىزۋ كورسەتكىشى ارتىپ كەلەدى. قازاقستان سونداي-اق ەرتە پىسەتىن اۋعان كوكونىسىن ەلوردا بازارىنا جەتكىزۋگە مۇددەلى.
وتكەن جىلدىڭ اياعىندا ەكى ەل تاۋار اينالىمىن 3 ملرد دوللارعا ۇلعايتۋ جونىندەگى جول كارتاسىنا قول قويدى. اۋعانستان اۋماعىندا ءتۇرلى پايدالى قازبا ءوندىرۋدىڭ وراسان زور الەۋەتىن ەسكەرە وتىرىپ, ءوزارا ينۆەستيتسيانىڭ مالىمدەلگەن كولەمىنە اۋعانستان كەن ورنىنىڭ رەسۋرسىن بارلاۋ مەن ءوندىرۋ ەسەبىنەن قول جەتكىزۋ جوسپارلانىپ وتىر. وتاندىق بيزنەس جەر قويناۋىنىڭ پەرسپەكتيۆالى ۋچاسكەلەرىن ىزدەۋگە قاراجات سالۋعا ۇلكەن قىزىعۋشىلىق ءبىلدىرىپ وتىر.
14 ساۋىردە اۋعانستانعا قازاقستاننان بارعان گەولوگ-ماماندار, ينجەنەرلەر توبى اتالعان ەلدىڭ تاۋ-كەن ونەركاسىبى جانە مۇناي مينيسترلىگىنىڭ قولداۋىمەن بىرقاتار كەن ورنىن ارالادى. قر ونەركاسىپ جانە قۇرىلىس ۆيتسە-ءمينيسترى يران شارحان اتاپ وتكەندەي, ماماندار نۇرستان پروۆينتسياسىندا بەريللي, قورعاسىن جانە مىرىش تابىلىپ وتىرعان كەن ورىندارىنان 130 كيلو كەن سىناماسىن الدى. ەندى زەرتحانادا نەعۇرلىم ەگجەي-تەگجەيلى تالداۋ ءۇشىن سىنامالار قازاقستانعا جىبەرىلەدى. ناتيجە الىنعاننان كەيىن قازاقستاندىق تاراپ كەن ورنىن ودان ءارى يگەرۋ ءۇشىن نەعۇرلىم اۋقىمدى كەلىسسوز فورماتىنا كىرىسۋگە دايىن.
جول كارتاسىندا بەلگىلەنگەن ءىس-شارالاردى جانداندىرۋ ءۇشىن سەرىك جۇمانعارين اۋعانستان پرەمەر-ءمينيسترىنىڭ ورىنباسارىنا قازاقستاننىڭ كابۋلداعى ساۋدا ءۇيىن اشۋدى ۇسىندى. ابدۋل عاني بارادار بۇل ۇسىنىستى قولداپ, اۋعان تاراپى دا قازاقستاندا ءوزىنىڭ ساۋدا بازارىن اشقىسى كەلەتىنىن اتاپ ءوتتى. سونداي-اق قازاقستان تاراپىنان اۋعانستانعا «QazTehna» جشس وندىرەتىن وتاندىق اۆتوبۋستاردى جەتكىزۋ مۇمكىندىگىن قاراستىرۋ ۇسىنىلدى. جاڭا ساۋدا ۇيلەرى ىنتىماقتاستىقتىڭ ءارتۇرلى باعىتتارى بويىنشا ءوزارا ينۆەستيتسيالاردى جانداندىرۋعا ىقپال ەتەدى.
سونىمەن قاتار س.جۇمانعارين اۋعانستاننىڭ بايلانىس جانە اقپاراتتىق تەحنولوگيالار ءمينيسترى نادجيبۋللا حاككانيمەن كەزدەستى. ول وتاندىق كومپانيالار اۋعانستانداعى ينفراقۇرىلىمدىق جانە تەلەكوممۋنيكاتسيالىق جوبالاردىڭ قۇرىلىسىنا قاتىسۋعا قىزىعۋشىلىق تانىتىپ وتىرعانىن اتاپ ءوتتى. تۋرگۋندي – گەرات جاڭا تەمىرجول تەلىمىن سالۋ كەزىندە وپتيكالىق كابەل توسەۋ جۇمىسىنا بىرلەسىپ قاتىسۋدى ۇسىندى. ساۋدا جانە ونەركاسىپ ءمينيسترى نۇريددين ازيزيمەن كەزدەسۋدە ەكى ەلدىڭ ءوزارا تاۋار اينالىمىن ءارتاراپتاندىرۋ مۇمكىندىگى تالقىلاندى.