بىلتىردان بەرى مەملەكەت باسشىسىنىڭ باستاماسىمەن ەلىمىزدە «تازا قازاقستان» جالپىرەسپۋبليكالىق ەكولوگيالىق اكتسياسى ۇيىمداستىرىلىپ كەلەدى. بۇگىندە ول حالقىمىز تۇگەلدەي قاتىساتىن اۋقىمدى ءىس-شاراعا اينالدى.
«تازا قازاقستان» اكتسياسى – جاي ۇران ەمەس, ەلىمىزدىڭ وزەكتى ەكولوگيالىق ماسەلەلەرىن شەشۋگە باعىتتالعان كەشەندى باعدارلاما. تابيعاتتى ايالاۋ ونىڭ بايلىعىن بولاشاق ۇرپاق ءۇشىن ساقتاۋعا مۇمكىندىك بەرسە, تازا قورشاعان ورتا – حالىق دەنساۋلىعىنىڭ كەپىلى. مەملەكەت باسشىسىنىڭ حالىققا جولداۋى اياسىندا «سامۇرىق-قازىنا» اق ماڭىزدى ەكولوگيالىق باستامانى جۇزەگە اسىردى. قور وكىلدەرى «ەكو Nomad» جوباسى بويىنشا الماتى قالاسىنداعى «وڭتۇستىك» ساياباعىندا تازالاۋ جۇمىستارىن جۇرگىزدى. ەكولوگيالىق ءارى الەۋمەتتىك ماڭىزى جوعارى ءىس-شاراعا «سامۇرىق-قازىنا» اق ەنشىلەس كومپانيالارىندا جۇمىس ىستەيتىن 200-دەن استام قىزمەتكەر بەلسەنە قاتىسىپ, 3 توننا قوقىس شىعاردى.
«سامۇرىق-قازىنا» قورى «Taزa قازاقستان» اكتسياسىن العاشقىلاردىڭ ءبىرى بولىپ قولدادى. وتكەن جىلى قور كومپانيالار توبى 360-تان استام ەكولوگيالىق اۋقىمدى ءىس-شارا ۇيىمداستىردى. 100 مىڭنان استام جاسىل جەلەك وتىرعىزىپ, 200-دەن استام سەنبىلىك وتكىزدى. ەكولوگيالىق اعارتۋ جۇمىستارى كۇشەيتىلىپ, ونداعان اكتسيا مەن لەكتسيا ءوتتى. ءبىز وسى جىلعا دا كەشەندى جوسپار قۇرىپ وتىرمىز. ولاردىڭ قاتارىندا, ەلىمىز بويىنشا 137 مىڭنان استام اعاش وتىرعىزۋ, 100-دەن استام جاڭا پوستامات ورناتۋ, ەكولوگيالىق مادەنيەتتى قالىپتاستىرۋ باعىتىنداعى اعارتۋشىلىق جۇمىستى جۇرگىزۋ سىندى شارالار بار. ءبىز تابيعاتتى ايالاۋدى تەك ناۋقان رەتىندە ەمەس, كۇندەلىكتى ءومىر سالتىنا اينالدىرۋعا شاقىرامىز», دەدى «سامۇرىق قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
«ەكو Nomad» جوباسىنىڭ ماقساتى – قالالىق ينفراقۇرىلىمعا ۇقىپتى قاراۋ قۇندىلىقتارىن قالىپتاستىرۋ, حالىقتى ازاماتتىق جاۋاپكەرشىلىك پەن ەكولوگيالىق مادەنيەتكە تاربيەلەۋ. يگى باستاما – تابيعاتقا قامقورلىق جاساپ, قورشاعان ورتانى جاقسارتۋعا جانە ەكولوگيالىق تۇراقتىلىقتى قالىپتاستىرۋعا قوسقان ۇلەس قانا ەمەس, سونىمەن قاتار وسكەلەڭ ۇرپاققا ۇلگى بولاتىن ءىس-شارا.
«بۇگىنگى وتكەن سەنبىلىك ەرەكشە ماڭىزعا يە بولدى. جاستار تاراپىنان جوعارى بەلسەندىلىك بايقالدى. بۇل – ءبىزدىڭ تابيعاتقا دەگەن جاناشىرلىعىمىز بەن ازاماتتىق جاۋاپكەرشىلىگىمىزدىڭ ايقىن كورىنىسى. وسىنداي ءىس-شارالار قورشاعان ورتانى قورعاۋمەن قاتار ۇرپاق تاربيەسىنە دە وڭ اسەر ەتەدى. ءبىز, جاستار ءاردايىم تابيعاتتى ايالاۋعا, تازا ءارى جايلى قالا قالىپتاستىرۋعا دايىنبىز. الداعى ۋاقىتتا دا ەكولوگيالىق باستامالارعا بەلسەندى اتسالىسامىز», دەيدى «سامۇرىق-قازىنا» اق الماتى قالاسى بويىنشا جاستار قاناتىنىڭ توراعاسى پەريزات ءنابي.
تابيعاتقا قۇرمەت – وزىڭە قۇرمەت. بەرەكەلى, جاسىل بولاشاق ءۇشىن بىرگە ەڭبەك ەتەيىك!
ماينۇر جاناقوۆا