«Egemen Qazaqstan» گازەتىن كوپ جىلدان بەرى جازدىرىپ الىپ وقيمىن. ءبىر ءنومىرىن قالت جىبەرمەيمىن. بۇل باسىلىمنىڭ حالىق الدىنداعى بەدەلىن ەسكەرە وتىرىپ, ءوزىمدى كوپتەن تولعاندىرىپ جۇرگەن بىرەر ۇسىنىسىمدى جەتكىزۋدى ءجون كوردىم.
اكەم جۇركەي پۇسىرمان – ەكىنشى دۇنيەجۇزىلىك سوعىسقا قاتىسقان مايدانگەر. «وتان سوعىسى», «داڭق» وردەنى, «زا وتۆاگۋ», ت.ب. مەدالدەرمەن ماراپاتتالعان. بۇل دەرەكتەردى رەسەيدەگى ارحيۆكە حات جازىپ, سولاردان الدىم. 1942 جىلى باسىنا زەڭبىرەك وعىنىڭ جارىقشاعى ءتيىپ, 6 اي گوسپيتالدە جاتىپ, ءى توپ مۇگەدەگى بولىپ ەلگە ورالعان. كەيىن وبلىستىڭ كوپتەگەن شارۋاشىلىعىندا پارتيا قىزمەكتەرى رەتىندە ەڭبەك ەتتى.
اكەمنىڭ دە, مەنىڭ دە تۋعان جەرىم – باتىس قازاقستان وبلىسى, سىرىم اۋدانىنىڭ «قىزىل تۋ» ۇجىمشارى. قازىر العاباس اۋىلى دەپ اتالادى. بۇل 1968–1970 جىلدارى ميلليون پۇت استىق تاپسىرعان وداققا ايگىلى ۇجىمشار ەدى. وسى جەردەن كوپتەگەن مايدانگەر شىقتى. قايىربولدى گاليەۆ «قىزىل جۇلدىز», «وتان سوعىسى» وردەندەرىمەن ماراپاتتالعان. سالىق جۇماباەۆ سوعىستى اياقتاپ, 1945 جىلى ەلگە كەلدى. 3–4 وردەنى بار.
قابدول ساناتوۆ تا ەكىنشى دۇنيەجۇزىلىك سوعىسقا باستان-اياق قاتىسقان جاۋىنگەردىڭ ءبىرى. جاعى سىنىپ, ەلگە 1945 جىلى ورالادى. ونىڭ دا بىرنەشە وردەن-مەدالى بار. مەن اۋىلداس مايدانگەرلەر جايىندا جەرگىلىكتى گازەت-جۋرنالعا, كىتاپتارعا ءبىرتالاي ماقالا جاريالادىم.
قازىرگى تاڭدا العاباس اۋىلىنداعى مادەنيەت ءۇيىنىڭ الدىندا ساياباق بار. بيىل جەڭىستىڭ 80 جىلدىعىنا وراي سول جەرگە جەرگىلىكتى ارداگەرلەرگە ارنالعان دۇرىس ەسكەرتكىش ورناتۋ, سۋبۇرقاق سالىپ, جولدى جوندەۋ جايىندا اكىمدەرگە حات جولداپ, ءوتىنىش جاساعانمىن. بىراق ولاردىڭ ءبارى مەنى ءتۇرلى سىلتاۋ ايتىپ شىعارىپ سالىپ ءجۇر. وسى ەلدى مەكەننەن شىققان باتىر اتالاردى ۇمىتپاۋىمىز كەرەك. ارداگەرلەر جايىندا جازىلعان كىتاپتاردى كوبىرەك باستىرىپ شىعارىپ, ءار اۋىلداعى كىتاپحاناعا تاپسىرۋ قاجەت.
ەكىنشى ۇسىنىسىم مىناۋ. مەنىڭ 1982 جىلى تۋعان بالام اسلانبەك سوتسيال ۇلى 25 جىل ەڭبەك ەتىپ, كەيىن دەرتكە شالدىقتى. استاناعا بارىپ, جۇرەككە وتا جاساتتى. جۇبايى 2014 جىلى 30 جاسىندا تۋبەركۋلەزدەن قايتىس بولدى. ارتىندا 3 ۇلى قالدى. ولاردى زاعيپ اجەسى بۇكىل زەينەتاقىسىن بەرىپ, ەر جەتكىزدى. وقىتىپ, ادام ەتتى. 2014 جىلدان بەرى ۇلىم از قامتىلعان وتباسى ەسەبىندە كەزەكتە تۇر. بىراق پاتەر كەزەگى كەلەر ەمەس. ءوزى اۋىراتىندىقتان, ەش جەردە جۇمىس ىستەمەيدى. بالالارىم كوپ جىلدان بەرى جەر تەلىمىن الۋ ءۇشىن كەزەكتە تۇر. وبلىس اكىمى جەر جوق, ورنىنا جاتاقحانادان ورىن بەرەمىز دەگەن, ول دا بوس ءسوز بولدى. سوندا جەتىم بالالارعا كىم قامقور بولادى؟
وسى ماسەلەنى «Egemen Qazaqstan» گازەتى ارقىلى كوتەرىپ, كومەك قولىن سوزساڭىزدار دەيمىن.
سوتسيال پۇسىرمان,
جازۋشى-جۋرناليست,
ورال