ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «كاۋسار» مادەني-تانىمدىق ورتالىعىنىڭ ۇيىمداستىرۋىمەن «وقىمىستى» اتتى كەزدەسۋ ءوتتى. مەملەكەتتىك سىيلىقتىڭ لاۋرەاتى, ادەبيەت سىنشىسى, پروفەسسور قۇلبەك ەرگوبەكپەن كەزدەسۋدى قازاقستاننىڭ ەڭبەك سىڭىرگەن ءارتىسى, ونەرتانۋ پروفەسسورى كەنجەعالي مىرجىقباي جۇرگىزدى.
كەزدەسۋ بارىسىندا قۇلبەك ەرگوبەك ادەبيەت, عىلىم, رۋحانيات, سىن مادەنيەتى جانە كىتاپحانا ءىسى سىندى وزەكتى ماسەلەلەرگە توقتالىپ, ءوز ءومىرى مەن ۇستازدار تاعىلىمىن تەبىرەنە اڭگىمەلەدى. «جوعارى مەكتەپتەگى ۇستازدارىم ەرەكشە بولدى. ءبىرىنشى كۋرستا بەيسەنباي كەنجەباەۆتى تاۋىپ الىپ, شاكىرتى عانا ەمەس, پەرزەنتىندەي بولىپ كەتتىم. عىلىمداعى جولىم وسىدان باستالدى» دەپ اسەرلى اڭگىمە ءوربىتتى.
كەزدەسۋدە پروفەسسور قازىرگى قازاق بالالار ادەبيەتىنىڭ جاعدايىنا الاڭداۋشىلىق ءبىلدىردى. ادەبيەتپەن اۋىزدانباعان, ەرتەگى ەستىمەگەن ۇرپاقتىڭ بولاشاعى كۇڭگىرت.
«بالالار ادەبيەتى قۇلدىرادى. الپىسىنشى, جەتپىسىنشى جىلدارداعى بيىك دەڭگەيدەن بۇگىنگى جازۋشىلار الىستاپ كەتتى. بالالار جازۋشىسى بولىپ قالىپتاسپايدى – بالالار جازۋشىسى بولىپ تۋادى. ونداي تۇلعالار بىزدە ساۋساقپەن سانارلىق. جاڭا ءداۋىردىڭ ايتولماندارى, جانىبەك كارىبوزيندەرى, جاقان سماقۇلدارى جوق», – دەدى ول. سونداي-اق مەملەكەت باسشىسى قاسىم-جومارت توقاەۆتىڭ بالالار ادەبيەتىنە ەرەكشە ءمان بەرىپ, 2021 جىلدى – بالالار ادەبيەتىنىڭ, ال 2022 جىلدى – بالالار كىتابىنىڭ جىلى دەپ جاريالاعانىن قۇپتادى.
قۇلبەك ەرگوبەكتىڭ رۋحانياتقا قوسقان تاعى ءبىر ۇلەسى – ونىڭ جەكە كىتاپحاناسى. ول جيىرما جىلدان بەرى تۇركىستاندا تۇركى حالىقتارى كىتاپحاناسىن دامىتىپ كەلەدى. قازىر ونىڭ قورىندا 24 تىلدە 6000-نان استام كىتاپ بار. بۇل – قازاق عىلىمىنىڭ ەرتەڭى ءۇشىن جاسالعان تاريحي ەڭبەك.
كەزدەسۋدە ءسوز العان فيلولوگيا عىلىمدارىنىڭ دوكتورى, پروفەسسور سەرىك نەگيموۆ قۇلبەك ەرگوبەكتىڭ قازاق رۋحانياتىنداعى ورنىن جوعارى باعالادى. «ول قوعامنىڭ ەڭ كوكەيكەستى, ەڭ كۇردەلى, ەڭ جارالى تاقىرىپتارىن اشىق كوتەردى. ىشىمىزدە جۇرگەن, بىراق ايتا الماعان ماسەلەلەردى اشىق, ناقتى جەتكىزدى», دەدى س.نەگيموۆ. سونىمەن قاتار فيلولوگيا عىلىمدارىنىڭ دوكتورى, پروفەسسور تۇرىسبەك راقىمجان: «قۇلبەك باۋىرىمىزدىڭ ەكى ەرلىگى مەن بەس باعىتى بار. ونىڭ ءبىرىنشىسى – بەيسەنباي كەنجەباەۆ سەكىلدى الىپ ۇستازدىڭ رۋحاني مۇراسىن ءتىرىلتىپ, تۋعان بالاسىنداي ءومىرىن ارناۋى. ەكىنشىسى – ءسابيت مۇقانوۆتىڭ شىعارماشىلىق الەمىنە ءومىر بويى ادال بولۋى. بۇل ەكەۋى – سيرەك كەزدەسەتىن رۋحاني ەرلىك. ال بەس باعىتقا كەلسەك, قۇلبەك ەرگوبەكتىڭ قازاق بالالار ادەبيەتىنە سىڭىرگەن ەڭبەگى, ادەبي دامۋعا قوسقان ۇلەسى, سىن سالاسىنداعى قىزمەتى, قازىرگى ادەبيەتتەن قول ۇزبەۋى جانە ادەبي ۇدەرىسپەن ۇزدىكسىز بايلانىسى – مۇنىڭ ءبارى قادىرلەۋگە لايىق قىزمەت», دەدى.
كەزدەسۋ سوڭىندا مەملەكەتتىك ەلتاڭبانىڭ اۆتورى, ساۋلەتشى-پروفەسسور جانداربەك مالىبەك ۇلى قۇلبەك ەرگوبەككە مەملەكەتتىك ەلتاڭبا بەينەلەنگەن ارنايى توسبەلگىنى سالتاناتتى تۇردە تابىستادى.
ەرلان كيىكباي,
ەۇۋ ستۋدەنتى