بىلتىرعى ءساۋىر ايىنان بەرى مەملەكەت باسشىسىنىڭ باستاماسىمەن «تازا قازاقستان» جالپىرەسپۋبليكالىق اكتسياسى ۇيىمداستىرىلىپ كەلەدى. بۇل تۋرالى پرەزيدەنت كەڭەسشىسى – ءباسپاسوز حاتشىسى رۋسلان جەلدىباي جان-جاقتى ماعلۇمات بەردى.
«ەكولوگيالىق ءارى الەۋمەتتىك ماڭىزى جوعارى بۇل جوبانى جۇرتشىلىقتىڭ ءبارى, اسىرەسە, جاستاردىڭ كەڭىنەن قولداعانى قۋانتادى. بۇگىندە «تازا قازاقستان» اكتسياسى حالقىمىز تۇگەلدەي قاتىساتىن اۋقىمدى ءىس-شاراعا اينالدى دەپ سەنىمدى تۇردە ايتۋعا بولادى. اكتسياعا بارلىق ءوڭىر اتسالىستى. جالپى, ەل اۋماعىندا 183 ەكولوگيالىق اكتسيا ءوتتى. وعان 6,2 ميلليوننان اسا ادام قاتىستى, ولاردىڭ ىشىندە 229 مىڭ ەرىكتى بار. ناتيجەسىندە, 1,1 ميلليون توننادان اسا قوقىس جينالىپ, 1,6 ميلليونعا جۋىق اعاش كوشەتى ەگىلدى», دەپ جازدى ر.جەلدىباي.
ونىڭ ايتۋىنشا, جوبا اياسىندا اۋقىمدى جۇمىس اتقارىلدى: اۋلالار مەن اۋماقتار تازالاندى («تازا ولكە», World Clean Up Day, «ونەگەلى ۇرپاق»), اعاش كوشەتتەرى ەگىلدى («جاسىل ايماق», بۇكىلقازاقستاندىق ورمان ەگۋ كۇنى); مادەني-تاريحي ەسكەرتكىشتەر اۋماعى تازارتىلدى («كيەلى مەكەن»); وزەن-كولدەر مەن سۋ توعاندارىنىڭ جاعالاۋلارى رەتكە كەلتىرىلدى ء(«مولدىر بۇلاق», «تازا جاعالاۋ»). رۇقسات ەتىلمەگەن قوقىس الاڭدارى ايتارلىقتاي ازايدى. ەگەر 2018 جىلى 8,7 مىڭ قوقىس ورنى انىقتالىپ, ونىڭ 57 پايىزى جويىلسا, 2024 جىلى 4,8 مىڭعا جۋىق قوقىس الاڭى بەلگىلى بولىپ, 93 پايىزى جويىلدى.
بىلتىر ماۋسىم ايىندا @TazaQazBot چات-بوتى ىسكە قوسىلدى. جۇرتشىلىق بۇل پلاتفورماعا وزدەرى كۋا بولعان كەلەڭسىز فاكتىلەردى حابارلاي الادى. چات-بوت ىسكە قوسىلعان ساتتەن باستاپ 15 806 ءوتىنىم ءتۇسىپ, ونىڭ 14 417-ءى ورىندالدى. قالعان 302-ءى بويىنشا ءتيىستى جۇمىستار قولعا الىنعان.
بيىل «تازا قازاقستان» اياسىنداعى ەكولوگيالىق ءىس-شارالار ناۋرىز ايىنان باستاپ وڭتۇستىك جانە باتىس وڭىرلەردە قولعا الىندى. بۇگىنگە دەيىن ۇيىمداستىرىلعان 11 تازالىق ءىس-شاراسىنا 223 مىڭنان اسا ادام قاتىستى. ونىڭ ىشىندە 11,6 مىڭنان استامى – ەرىكتىلەر. ناتيجەسىندە, 7,6 مىڭ توننا قوقىس جينالىپ, 385 مىڭ گەكتار اۋماق تازارتىلدى. شامامەن 74,1 مىڭ جاسىل جەلەك وتىرعىزىلدى.
«مۇنىڭ ءبارى پرەزيدەنت باستاماسىنىڭ وزەكتى ەكەنىن كورسەتىپ تۇرعانى انىق. مەملەكەت باسشىسى ايتقانداي, «تازا قازاقستان» – ءبىر رەتتىك ناۋقان ەمەس. ول وتانداستارىمىزدىڭ قورشاعان ورتاعا كوزقاراسىن وزگەرتەتىن, وسكەلەڭ ۇرپاقتى تۋعان جەرگە قۇرمەتپەن قاراۋعا تاربيەلەيتىن يگى داستۇرگە اينالۋعا ءتيىس», دەدى پرەزيدەنتتىڭ ءباسپاسوز حاتشىسى.