«بالاپان ۇيادا نە كورسە, ۇشقاندا سونى ىلەدى», دەيدى دانا حالقىمىز. بۇل ناقىل بالجان ماراتبەكقىزىنىڭ وتباسىنىڭ ومىرىمەن ۇندەس. سەبەبى ول ۇستازدار اۋلەتىندە دۇنيەگە كەلگەن. اكەسى دە, اناسى دا – بار عۇمىرىن جاس ۇرپاقتىڭ تاربيەسىنە ارناعان جاندار. وسىنداي ورتادا تاربيەلەنگەن ول دا مۇعالىمدىك جولدى تاڭدادى.
بالجان قازىرگى كەزدە شىعىس قازاقستان وبلىسى, كۇرشىم اۋدانى, قاينارلى اۋىلىنداعى پريۆولنوە ورتا مەكتەبىندە باستاۋىش سىنىپ مۇعالىمى. ونىڭ ومىرلىك ۇستانىمى – ءال-ءفارابيدىڭ: «ادام ماقساتىنا ءوزىن-ءوزى جەتىلدىرۋ ارقىلى جەتەدى», دەگەن ءسوزى.
«ۇستاز زامان تالابىنا ساي ءاردايىم ىزدەنىستە بولىپ, ءوز ءبىلىمىن جەتىلدىرىپ, دامىتىپ وتىرۋعا ءتيىس», دەيدى بالجان. ول وقۋشىلاردىڭ زەرتتەۋ قابىلەتىن ارتتىرىپ, ولاردى ءتۇرلى بايقاۋعا دايىنداۋعا ەرەكشە كوڭىل بولەدى. ونىڭ جەتەكشىلىگىمەن وقۋشىلارى «زەردە» بايقاۋىندا جۇلدەلى ورىندار يەلەنگەن.
«شاكىرتتەرىم جىل سايىن مەكتەپىشىلىك, اۋداندىق, وبلىستىق, رەسپۋبليكالىق وليمپيادالاردا جۇلدەلى ورىندارعا يە بولادى. بۇل – ولاردىڭ تىنىمسىز ەڭبەگىنىڭ ناتيجەسى. ءار بالانىڭ بويىنداعى ەرەكشە قابىلەتتى اشۋ, بىلىمگە دەگەن قۇشتارلىعىن وياتۋ – ۇستازدىق جولىمداعى باستى ماقساتىم», دەيدى پەداگوگ.
ول شاكىرتتەرىنە بىلىممەن قاتار, ۇلتتىق تاربيە بەرۋدى دە ماڭىزدى سانايدى. «ساباقتارىمدا بالالاردىڭ بويىنا ۇلتتىق قۇندىلىقتاردى ءسىڭىرىپ, تۋعان جەرىن قادىرلەيتىن, قازاقتىڭ باي مۇراسى مەن مادەنيەتىن قۇرمەتتەيتىن ازاماتتاردى قالىپتاستىرۋعا تىرىسامىن», دەيدى بالجان.
بالجان ماراتبەكقىزى جاس ۇرپاققا ساپالى ءبىلىم بەرىپ قانا قويماي, ولاردىڭ تۇلعا بولىپ قالىپتاسۋىنا ۇلەس قوسىپ ءجۇر. 2024 جىلدىڭ ۇزدىك اۋىل مۇعالىمى اتانعان بالجان ماراتبەكقىزى ءۇشىن ءبىلىم بەرۋ – جاي جۇمىس ەمەس, ومىردەگى ميسسياسى.