قازىردە فيفا 2030 جىلى وتەتىن الەم چەمپيوناتىنا قاتىساتىن كوماندالاردىڭ سانىن 48-دەن 64-كە دەيىن جەتكىزۋ ماسەلەسىن ويلاستىرىپ جاتىر. بۇل ۇسىنىس ۋرۋگۆاي فۋتبول فەدەراتسياسىنان ءتۇستى. ەستەرىڭىزدە بولسا, ءدال سول مەملەكەتتە وسىدان تۋرا ءبىر عاسىر بۇرىن, ياعني 1930 جىلى اتالعان دوپ دوداسى تۇڭعىش رەت ۇيىمداستىرىلعان بولاتىن. سول مەرەيلى داتاعا وراي ۋرۋگۆايلىقتار فيفا-عا جوعارىداعىداي ۇسىنىسپەن شىقتى.
WBC ۇيىمى كاسىپقوي بوكستان وتەتىن گران-پري ءتۋرنيرىنىڭ جاڭا نۇسقاسىن ۇسىنىپ وتىر. سوعان ساي 41 مەملەكەتتەن كەلگەن 128 بىلعارى قولعاپ شەبەرى بەس اي بويى ءبىر-بىرىمەن جۇدىرىقتاسىپ, مىقتىلاردى انىقتايدى. بۇل جارىستىڭ كەستەسى مىناداي: 1/16 فينال – ساۋىردە (64 كەزدەسۋ), 1/8 فينال – ماۋسىمدا (32 كەزدەسۋ), 1/4 فينال – تامىزدا (16 كەزدەسۋ), جارتىلاي فينال – قازاندا (8 كەزدەسۋ), فينال – جەلتوقساندا (4 كەزدەسۋ). ەلىمىزدەن بۇل جوباعا جولداس جەڭىسوۆ (7-0, 3 كو), نۇرقانات رايىس (1-0, 0 كو), ءساناتالى تولتاەۆ (2-0, 1 كو) قاتىسادى.
ۆتب ليگاسىندا ونەر كورسەتىپ جۇرگەن «استانا» كەزەكتى تۋر ويىنىن پەرمنىڭ «پارماسىنا» قارسى وتكىزدى. جەرلەستەرىمىز بۇل جولى دا جەڭىلىستىڭ كەرمەك ءدامىن تاتتى. ەسەپ – 106:73 (21:18, 21:11, 32:24, 32:20).
ميحايل كۋكۋشكين اقش-تىڭ فەنيكسىندە ءوتىپ جاتقان اتر ءتۋرنيرىنىڭ نەگىزگى بولىگىنە جولداما الدى. ىرىكتەۋ سايىستارىندا ول امەريكالىق ميتچەللا كريۋگەر مەن سلوۆاكيالىق بورت ارتناكتان باسىم ءتۇستى. الەكساندر شەۆچەنكو وسى جارىستىڭ العاشقى اينالىمىنان اسا المادى. جەرلەسىمىز جەرگىلىكتى تەننيسشى كولتون سميتتەن جەڭىلدى.
يتاليانىڭ پادۋيا قالاسىندا سەمسەرلەسۋدەن ەرلەر اراسىنداعى الەم كۋبوگىنىڭ كەزەڭى اياقتالدى. وكىنىشكە قاراي, ەلىمىزدىڭ قۇراماسى بۇل جارىستا ءساتسىز ونەر كورسەتتى. جەكەلەي سىندا ارتەم ساركيسيان 91-ورىنعا يە بولسا, باقداۋلەت قۇرالبەك ۇلى 95-ورىندى قاناعات تۇتتى. وزگە جەرلەستەرىمىزدىڭ ناتيجەسى ودان دا تومەن. كوماندالىق سايىستا كوماندامىز 18-ورىندا قالىپ قويدى.