بۇگىن بانگكوكتا نىسانا كوزدەۋدەن ازيا كۋبوگىنىڭ سوڭعى جارىس كۇنى ءوتتى, دەپ جازادى Egemen.kz.
سپورتتى دامىتۋ ديرەكتسياسىنىڭ مالىمەتىنشە, ءدۇبىرلى دودادا ءساتتى ونەر كورسەتكەن مەرگەندەرىمىز جالپى ەسەپتە كوش باستادى. قازاقستان قورجىنىنا جيىنى 12 التىن, 9 كۇمىس, 4 قولا ءتۇستى.
بۇگىنگى جارىس كۇنىندە ەل سپورتشىلارىنىڭ ساپىندا الەكساندرا لە, ارينا التۋحوۆا, ەليزاۆەتا بەزرۋكوۆا 50 مەتردەن ۆينتوۆكادان اتۋدان (كوماندالىق) التىن جۇلدە ولجالادى. جەكەلەي سىندا پاريج وليمپياداسىنىڭ قولا جۇلدەگەرى الەكساندرا لە 50 مەتردەن ۆينتوۆكادان اتۋدا ۇزدىك ەكەنىن دالەلدەپ, التىننان القا تاقتى. ءدال وسى سىندا وتانداسىمىز ەليزاۆەتا بەزرۋكوۆا كۇمىسپەن كۇپتەلدى. نيكيتا چيريۋكين 25 مەتردەن تاپانشامەن اتۋدان ءبىرىنشى تۇعىردان كورىندى.
جالپى كوماندالىق ەسەپتە قازاقستاننان كەيىن ەكىنشى ساتىعا وڭتۇستىك كورەيا جايعاسسا, ۇزدىك ۇشتىكتى سينگاپۋر تۇيىندەدى.