جايىقتىڭ سۋى جايىلماسىن دەسەك...

بۇل – سولتۇستىك كورشىمىزدىڭ بىلتىرعى الاپات سۋ تاس­قى­­­­نىنان ساباق الىپ, ەرتەرەك قام جاساعان قارەكەتى. قازىردىڭ وزىن­دە يرەكلى سۋقويماسى 76%-عا تولىپ تۇر. بىلتىر كوكتەمدە كۇرت ەرىگەن قار سۋى قويمادان شىعىپ ۇلگەرمەي, جولىن­داعىنىڭ ءبارىن جايپاپ, جايىق وزەنىنىڭ جوعارعى جاعىنداعى حالىقتى دا ءبىراز ابىگەرگە سالدى.

وبلىس باسشىلىعى رەسەي فەدە­را­تسيا­سىنىڭ ورىن­بور, ساراتوۆ وب­لىس­تارىنداعى گيدرو­تەحنيكالىق كە­شەن­دەردىڭ جاي-كۇيى, تومەنگە ءتۇسىپ جاتقان سۋ مولشەرى تۋرالى كۇندەلىكتى اقپارات الماسىپ وتىر. وبلىس اكىمى باستاعان ارنايى دەلەگاتسيا ورىنبور وبلىسىنىڭ مۇددەلى ۆەدومستۆولارىمەن كەزدەسىپ قايتتى.

كوپ جىلعى ەسەپتەۋگە قاراعاندا, يرەكلىدەن قۇلاعان سۋ باتىس قازاقستان وبلىسىنا جەتكەنشە ءبىر ايداي ۋاقىت وتەدى. ماماندار ازىرگە تاسقىن قاۋپى جوق ەكەنىن ايتىپ وتىر. قازىر ورال قا­لا­سىنىڭ تۇسىندا سۋدىڭ دەڭگەيى 1,6 مەتر عانا. سۋ 6 مەترلىك دەڭگەيدەن اسقان­دا عانا ارناسىنان شىعىپ, ساياجايلاردى باسا باستايدى.

جاقىندا وبلىس اكىمدىگىندە كوكتەمگى سۋ تاسقىنىنىڭ الدىن الۋ بويىنشا ءماجىلىس ءوتتى. گيدرولوگتەر, مەتەورولوگتەر, توتەنشە جاعداي قىزمەتى الداعى ىق­تي­مال تاسقىننىڭ بولجامىن جاساپ, دايىندىقتى كۇشەيتكەن.

«ناۋرىز ايىندا كۇن كۇرت جىلىنىپ, نوسەر بولسا, توڭ ەرىپ ۇلگەرمەي, سۋ جەرگە سىڭە الماي, ەرىگەن قار سۋىنان تاسقىن پايدا بولۋى مۇمكىن. اسىرەسە ورال قالاسىندا, تاسقالا, قازتالوۆ, تە­­رەكتى, ءبورلى, شىڭعىرلاۋ, سىرىم, قاراتوبە, اقجايىق, بايتەرەك اۋداندارىندا تاسقىن قاۋپى جوعارى», دەيدى وبلىس اكىمىنىڭ ورىنباسارى باقىتجان حابەر ۇلى.

بۇگىندە وبلىستا سۋ باسۋ قاۋپى بار 186 ەلدى مەكەن ەسەپكە الىنعان. 2025 جىلعى سۋ تاسقىنى كەزەڭىندە ەلدى مەكەندەردى قارعىن سۋدان قور­عاۋعا 3,9 ملرد تەڭگەگە جالپى ۇزىن­دىعى 107 شاقىرىم 53 قورعانىس بو­گەتى تۇرعىزىلعان. ونىڭ ىشىندە شىڭ­عىرلاۋ وزەنىندە ۇزىندىعى 25,2 كم 8 بوگەت, قالدىعايتى وزەنىندە 3 كم 2 بوگەت, ولەڭتى وزەنىندە 6,5 كم, بۇل­دىرتى وزەنىندە 1,2 كم, ەلەك وزەنىندە 13,2 كم 5 بوگەت, قايىڭدى وزەنىندە 1 كم, جاقسىباي وزەنىندە 3,2 كم, سارىوزەندە 0,5 كم, بىكوۆ وزەنىندە 3 كم بوگەت سالىندى. جايىق وزەنى جاعالاۋلارىنا جالپى ۇزىندىعى 23,8 كم 14 بوگەت ءتۇس­تى. دالادا ەرىگەن قار سۋىن قاۋىپسىز جاق­تارعا باعىتتاۋعا ارنالعان 26,4 كم 18 بوگەت سوعىلعان. سونىمەن بىرگە 9 كم سۋ بۇرۋ كانالى, 93 كم ارىق سالىندى, ەلدى مەكەندەردىڭ ىشىندە 582 مەتر سۋ وتكىزۋ قۇبىرلارى ورناتىلدى. 74 كم ما­گيسترالدىق كانالدار تازارتىلدى. كوشىم, بىكوۆ وزەندەرىنىڭ ءتۇبىن تەرەڭدەتۋ, تازالاۋ جۇمىسى جۇر­­گىزىلدى.

باتىس قازاقستان وبلىسى