*«نۇرلى جول» باعدارلاماسى بيىل 17 ينفراقۇرىلىمدىق جوبانى قامتيدى. بۇل تۋرالى ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ وتىرىسىندا ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى جەڭىس قاسىمبەك ءمالىم ەتتى. بۇلاردىڭ 12-ءسى اۆتوجول سالاسىندا, قالعان 5-ءى تەمىرجول ينفراقۇرىلىمى جانە تەڭىز پورتتارى, استانا اۋەجايى بويىنشا ىسكە اسىرىلادى.
*يندۋستريالاندىرۋ باعدارلاماسى الماتى ونەركاسىبىنىڭ دامۋىنا ايتارلىقتاي ىقپال ەتتى. باعدارلاما قولعا الىنعان العاشقى بەس جىلدا وبلىستا 230 جاڭا ونەركاسىپ نىسانى اشىلىپ, جۇمىس ىستەپ تۇرعان 125 كاسىپورىندا شىعارىلاتىن ءونىم كولەمى ارتقان, 9 مىڭعا تارتا ادام جۇمىسپەن قامتىلعان.
*ۇستىمىزدەگى جىلى قاراعاندىدا 4 جاڭا زاۋىت بوي كوتەرەدى. وتكەن جىلى 1 جوبانىڭ قۇرىلىسى باستالىپ كەتكەن, بۇگىندە اياقتالۋ ۇستىندە. ال ينۆەستيتسيانىڭ قۇنى 38 ملرد. تەڭگەنى قۇرايدى. «سارىارقا» ارنايى ەكونوميكالىق ايماعىندا 2 زاۋىت مەتاللۋرگيالىق جانە اسكەري وق-ءدارى شىعاراتىن زاۋىت ورنالاسادى. تاعى 2 زاۋىت شەتەلدىك ينۆەستورلاردىڭ كومەگىمەن سالىنادى.
*ورالدا جەرگىلىكتى ۇلەستى ۇلعايتۋ جونىندەگى مەموراندۋمدارعا قول قويىلدى. سونىڭ ارقاسىندا 47 ملرد. تەڭگەنىڭ كولەمىندەگى جۇمىستار اتقارىلادى. وسىعان ارنالعان جيىندا ينۆەستيتسيالار جانە دامۋ ءمينيسترى اسەت يسەكەشەۆ اتاپ وتكەندەي, ەلباسى تاپسىرماسىنا سايكەس وسىنداي شارالار بارلىق وڭىردە ۇيىمداستىرىلىپ جاتىر. «ايماقتاردا قازىردىڭ وزىندە 12 فورۋم ءوتىپ, 200 مەموراندۋمعا قول قويىلدى. قازاقستان الەمدىك ەكونوميكانىڭ ءبىر بولىگى بولعاندىقتان, جاھاندىق وزگەرىستەردەن تىس قالا المايدى», – دەدى ول.
*كانادالىق ينۆەستورلار قازاقستاندا اۋرۋحانالار مەن ەمحانالار سالۋدى جوسپارلاپ وتىر. اتاپ ايتقاندا, «InterHealth Canada» كومپانياسى ەلىمىزدىڭ وڭتۇستىك وڭىرىندە ەمحانالار مەن اۋرۋحانالار سالۋعا دايىن تۇر. شەتەلدىك مەنەدجەرلەر بىلىمدەرى مەن تاجىريبەلەرىمەن ءبولىسىپ, مەديتسينالىق قىزمەتتەردىڭ ساپاسىن ارتتىرۋدى جوسپارلاپ وتىر.
*استانادا تۇراتىن 50 زەينەتكەر شاڭعى جارىسىنا قاتىستى. ۇلى وتان سوعىسىنداعى جەڭىستىڭ 70 جىلدىعىنا ارنالعان ءمانى مەن سيپاتى وزگەشە دودادا ايەلدەر اراسىندا ليۋدميلا ستارىح, ەرلەر اراسىندا لەونيد انتونوۆ پەن ۆاسيلي كۋچين توپ باستادى. جەڭىمپازدار مەن جۇلدەگەرلەرگە ارنايى مەدالدار مەن باعالى سىيلىقتار تابىس ەتىلدى.
*الماتى جولدارىنداعى 10 ەكولوگيالىق بەكەت جاڭا «كولىك ينسپەكتورى» كەشەنىمەن جابدىقتالادى. ازىرگە مۇنداي كەشەن تاجىريبەلىك ماقساتتا تەك ءبىر بەكەتكە ورناتىلدى. جاڭا كەشەن بۇكىل كولىكتەر لەگى بويىنشا ءارتۇرلى اقپاراتتاردى تىركەيدى.
حابارلار «قازاقپارات»,
BNews.kz جانە Nur.kz دەرەكتەرى
بويىنشا دايىندالدى.