مەملەكەت باسشىسى شۆەتسيا كورولى XVI كارل گۋستاۆتى 80 جىلدىق مەرەيتويىمەن قۇتتىقتادى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ جەدەلحاتتا كورول XVI كارل گۋستاۆتىڭ پاراساتتى باسشىلىعىمەن شۆەتسيا ەۋروپادا جانە الەمدىك ارەنادا ماڭىزدى ءرول اتقاراتىن مەملەكەت مارتەبەسىن ساقتاپ كەلە جاتقانىن اتاپ ءوتتى. پرەزيدەنت قوس حالىق اراسىنداعى دوستىق بايلانىستار مەن ءوزارا تۇسىنىستىكتى جوعارى باعالايتىنىن, سونداي-اق شۆەتسيامەن سان قىرلى ىنتىماقتاستىقتى ودان ءارى نىعايتۋعا سەنىم ارتاتىنىن جەتكىزدى.
قاسىم-جومارت توقاەۆ كورول XVI كارل گۋستاۆتىڭ ەل يگىلىگى جولىنداعى ەڭبەگىنە تولايىم تابىس, ال دوستاس شۆەتسيا حالقىنا باق-بەرەكە تىلەدى.
ايتا كەتەيىك, بۇعان دەيىن حالىقارالىق كينولوگيا فەدەراتسياسىنىڭ پرەزيدەنتى تاماش ياككەلدى قابىلداپ, وعان قازاق تازىسىن تانۋعا سەپتىگىن تيگىزگەنى ءۇشىن العىس ايتتى.