قازاقستاندا انتيبيوتيكتەردى رەتسەپتىسىز ساتۋعا قاتىستى تالاپتار كۇشەيدى. دەنساۋلىق ساقتاۋ مينيسترلىگى دارىگەردىڭ تاعايىنداۋىنسىز انتيبيوتيكتەردىڭ ساتىلۋىن, سونىڭ ىشىندە ونلاين-سەرۆيستەر مەن تسيفرلىق پلاتفورمالار ارقىلى تارالۋىن قاتاڭ باقىلاۋعا الۋدى جوسپارلاپ وتىر, دەپ حابارلايدى Egemen.kz.
ۆەدومستۆونىڭ مالىمەتىنشە, باكتەرياعا قارسى پرەپاراتتاردى باقىلاۋسىز پايدالانۋ ميكروورگانيزمدەردىڭ دارىگە توزىمدىلىگىن ارتتىرىپ كەلەدى. قازىرگى تاڭدا انتيميكروبتىق رەزيستەنتتىلىك دەنساۋلىق ساقتاۋ سالاسىنداعى ەڭ وزەكتى ماسەلەلەردىڭ بىرىنە اينالعان.
ۇلتتىق قوعامدىق دەنساۋلىق ساقتاۋ ورتالىعىنىڭ باسشىسى ەريك ءبايجۇنىسوۆ بۇل ماسەلەنىڭ مەديتسينالىق شەڭبەردەن شىعىپ, ۇلتتىق دەنساۋلىق قاۋىپسىزدىگىنە اسەر ەتەتىن فاكتورعا اينالعانىن ايتتى.
مەديتسيناداعى رەۆوليۋتسيا: قازاقستاندا بىرىڭعاي تسيفرلىق كونتۋر قۇرىلدى
مينيسترلىكتىڭ دەرەگىنە سايكەس, ەلدە ميكروبتارعا قارسى پرەپاراتتارعا توزىمدىلىكپەن كۇرەس جونىندەگى 2027 جىلعا دەيىنگى جول كارتاسى ىسكە اسىرىلىپ جاتقانىمەن, وزدىگىنەن ەمدەلۋ جانە انتيبيوتيكتەردى زاڭسىز ساتۋ ماسەلەسى ءالى دە وزەكتى بولىپ وتىر.
مامانداردىڭ ايتۋىنشا, كوپتەگەن ازاماتتار انتيبيوتيكتەردى دارىگەردىڭ تاعايىنداۋىنسىز ساتىپ الادى. بۇل ينفەكتسيالارعا قارسى قولدانىلاتىن دارىلەردىڭ تيىمدىلىگىن تومەندەتىپ, انتيبيوتيككە توزىمدىلىكتىڭ كۇشەيۋىنە سەبەپ بولادى.
دەنساۋلىق ساقتاۋ ءمينيسترى اقمارال ءالنازاروۆانىڭ تاپسىرماسىمەن انتيبيوتيكتەردى رەتسەپتىسىز بوساتۋعا باقىلاۋ كۇشەيتىلىپ, دارىلەردى تاڭبالاۋ جۇيەسى كەڭىنەن ەنگىزىلەدى. سونىمەن قاتار توزىمدىلىك قاۋپى تومەن پرەپاراتتاردى تىركەۋگە باسىمدىق بەرىلەدى.
مەديتسينا سالاسىنداعى تۇيتكىل: ەمحانالارداعى كەزەك قاشان قىسقارادى؟
بۇدان بولەك, انتيميكروبتىق رەزيستەنتتىلىك ماسەلەلەرى مەديتسينالىق جوعارى وقۋ ورىندارىنىڭ, ماگيستراتۋرا, رەزيدەنتۋرا جانە دوكتورانتۋرا باعدارلامالارىنا ەنگىزىلەدى. سونداي-اق ەپيدەميولوگيالىق باقىلاۋ كۇشەيتىلىپ, وڭىرلەردەگى ميكروبيولوگيالىق زەرتحانالاردىڭ جۇمىسى جەتىلدىرىلەدى جانە سالا ماماندارىن قوسىمشا وقىتۋ جوسپارلانىپ وتىر.