باتىس قازاقستان وبلىسىندا تىيىم سالىنعان اۋماققا شومىلۋعا بارعان ءۇش ءجاسوسپىرىم سۋعا باتىپ كەتتى, دەپ حابارلايدى Egemen.kz.
باتىس قازاقستان وبلىسى توتەنشە جاعدايلار دەپارتامەنتىنىڭ مالىمەتىنشە, 2008 جانە 2009 جىلى تۋعان ءۇش ءجاسوسپىرىم ارنايى جابدىقتالماعان اۋماقتا سۋعا باتىپ كەتكەن. تجم بولىمشەلەرى جەتكەنگە دەيىن قازا تاپقانداردىڭ دەنەسىن جەرگىلىكتى تۇرعىندار سۋدان الىپ شىققان.
«112 پۋلتىنە باتىس قازاقستان وبلىسى تجد جەدەل كەزەكشىسىنە پوليتسيا ءبولىمىنىڭ كەزەكشىسىنەن حابارلاما ءتۇستى. وقيعا ورنىنا تجد كۇشتەرى جەدەل تۇردە جىبەرىلدى. وقيعانىڭ ءمان-جايى مەن سەبەپتەرى انىقتالىپ جاتىر», دەلىنگەن حابارلامادا.
وكىنىشكە قاراي, جاز كەلىسىمەن شومىلۋ ايماقتارىندا بالا ءولىمى جيىلەپ بارادى. ءبىر اي ىشىندە تۇركىستان, اقمولا, قاراعاندى, قوستاناي مەن قىزىلوردا وبلىستارىندا بۇلدىرشىندەر سۋعا كەتكەن وقيعالار بولدى. وسىعان سايكەس, تجم قىزمەتكەرلەرى شومىلۋ اۋماقتارىندا قاۋىپسىزدىك شارالارىن قاتاڭ ساقتاۋعا شاقىرادى.