سوڭعى جىلدارى ەلىمىزدە عىلىم مەن جوعارى ءبىلىمدى دامىتۋ ماقساتىندا جەتەكشى شەتەلدىك ۋنيۆەرسيتەتتەرمەن سەرىكتەستىك بەلسەندى نىعايىپ كەلەدى. وسى ورايدا الماتىدا حالىقارالىق دەڭگەيدەگى Innotech ۋنيۆەرسيتەتى رەسمي تۇردە ەسىك اشتى. بۇل جوبا مەملەكەت باسشىسىنىڭ اقش-قا ساپارى بارىسىندا قول جەتكىزىلگەن كەلىسىمدەردىڭ ناتيجەسىندە جۇزەگە اسىپ وتىر, دەپ حابارلايدى Egemen.kz.
جاڭا وقۋ ورنى Arizona State University (ASU) ۋنيۆەرسيتەتىمەن بىرلەسىپ اشىلىپ, Cintana Education اليانسىنىڭ قۇرامىنا ەندى. ۋنيۆەرسيتەت باعدارلامالارى حالىقارالىق ستاندارتتارعا ساي ازىرلەنگەن جانە جاساندى ينتەللەكت, كيبەرقاۋىپسىزدىك, تسيفرلىق بيزنەس باعىتتارىنا باسىمدىق بەرەدى.
ءبىلىم ورداسىنىڭ اشىلۋ سالتاناتىندا ءسوز سويلەگەن عىلىم جانە جوعارى ءبىلىم ءمينيسترى ساياسات نۇربەك بۇل باستامانىڭ ستراتەگيالىق ماڭىزىن اتاپ ءوتتى.
ء«بىزدىڭ باستى ماقساتىمىز – قازاقستاندى وڭىرلىك اكادەميالىق جانە زەرتتەۋ حابىنا اينالدىرۋ. قازىردىڭ وزىندە ەلىمىزگە 35 مىڭنان استام شەتەلدىك ستۋدەنت كەلىپ وتىر – بۇل تاريحي كورسەتكىش. ەندىگى مىندەت – وسى الەۋەتتى كۇشەيتىپ, ۋنيۆەرسيتەتتەرىمىزدى وقىتۋ مودەلىنەن زەرتتەۋشى فورماتقا كوشىرۋ. وكىنىشكە قاراي, بۇگىنگى تاڭدا كوپ جوعارى وقۋ ورىندارى تەك ءبىلىم بەرۋمەن شەكتەلەدى. ال الەمدەگى ۇزدىك ۋنيۆەرسيتەتتەر – عىلىم, يننوۆاتسيا جانە تەحنولوگيانىڭ ورتالىعى. سوندىقتان مۇنداي سەرىكتەستىكتەر ارقىلى ءبىز ناقتى عىلىمي جوبالاردى ىسكە قوسىپ, تەحنولوگيا ترانسفەرىن قامتاماسىز ەتەمىز», دەدى مينيستر.
ونىڭ ايتۋىنشا, بۇعان دەيىن دە شەتەلدىك ۋنيۆەرسيتەتتەرمەن بىرلەسكەن جوبالار وڭ ناتيجەسىن بەرىپ, جاڭا ماتەريالدار ءوندىرۋ, ونەركاسىپكە قاجەت تەحنولوگيالاردى ەنگىزۋ باعىتىندا ناقتى جۇمىستار باستالعان.
ەلوردالىق وقۋشى گارۆارد ۋنيۆەرسيتەتىنە وقۋعا ءتۇستى
اشىلۋ سالتاناتىنا كەلگەن اقش-تىڭ قازاقستانداعى ەلشىسى دجۋلي ستاففت بۇل جوبانى ەكى ەل اراسىنداعى ءبىلىم مەن عىلىم سالاسىنداعى ىنتىماقتاستىقتىڭ جاڭا كەزەڭى دەپ باعالادى.
«InnoTech – قازاقستان مەن اقش اراسىنداعى سەرىكتەستىكتىڭ جاڭا بەلەسى. ستۋدەنتتەر الماتىدا وتىرىپ-اق الەمدىك دەڭگەيدە ءبىلىم الا الادى», دەدى ول.
ۋنيۆەرسيتەت وكىلدەرىنىڭ ايتۋىنشا, Innotech-ءتىڭ باستى ماقساتى – حالىقارالىق ستاندارتقا ساي ءبىلىم بەرىپ قانا قويماي, بولاشاقتا ءىرى عىلىمي-اكادەميالىق ەكوجۇيەنىڭ ءبىر بولىگىنە اينالۋ. قازىرگى City كامپۋسىمەن قاتار, الداعى ۋاقىتتا عىلىم قالاشىعىندا جاڭا ۇلكەن كامپۋس سالۋ جوسپارلانىپ وتىر.
وقۋ ۇدەرىسى تولىقتاي اعىلشىن تىلىندە جۇرگىزىلمەك. تالاپكەرلەر ۇبت ناتيجەسىمەن قاتار, اعىلشىن ءتىلىن مەڭگەرۋ دەڭگەيى جانە جەكە سۇحبات ارقىلى ىرىكتەلەدى. سونىمەن بىرگە, گرانت ءبولۋ ماسەلەسى دە قاراستىرىلىپ جاتىر.
الماتى قالاسى اكىمىنىڭ ورىنباسارى ابزال نۇكەنوۆ ءوز سوزىندە ەل ستۋدەنتتەرىنىڭ ۇشتەن ءبىرى ءبىلىم الاتىن مەگاپوليس عىلىم مەن يننوۆاتسيا ورتالىعى ەكەنىن ايتىپ, اتالعان ۋنيۆەرسيتەت شاھاردىڭ ينتتەللەكتۋالدىق الەۋەتىن ارتتىرۋعا وڭ ىقپال ەتەتىنىنە سەنىم ءبىلدىردى.
Q Education Group پەن عىلىم جانە جوعارى ءبىلىم مينيسترلىگىنىڭ قولداۋىمەن جۇزەگە اسقان ۋنيۆەرسيتەت قوس ديپلومدى باعدارلامالاردى ۇسىنۋدى جوسپارلاپ وتىر. بۇل ءوز كەزەگىندە تۇلەكتەرگە حالىقارالىق ەڭبەك نارىعىندا باسەكەگە قابىلەتتى بولۋعا مۇمكىندىك بەرمەك.
س.امانجولوۆ ۋنيۆەرسيتەتى عىلىمدى دامىتۋعا ەرەكشە دەن قويعان
ساراپشىلاردىڭ پىكىرىنشە, مۇنداي باستامالار ەلدىڭ عىلىمي الەۋەتىن كۇشەيتىپ, ورتالىق ازياداعى ءبىلىم بەرۋ كوشباسشىلارىنىڭ بىرىنە اينالۋىنا جول اشادى.
الماتى