مەملەكەت باسشىسى حالىقارالىق كينولوگيا فەدەراتسياسىنىڭ پرەزيدەنتى تاماش ياككەلدى قابىلدادى. كەزدەسۋدە قازاقى يت تۇقىمدارىن ساقتاۋ جانە تۇراقتى گەنەتيكالىق قورىن قالىپتاستىرۋ ىسىندە حالىقارالىق فەدەراتسيامەن ىنتىماقتاستىق پەرسپەكتيۆاسى تالقىلاندى, دەپ حابارلايدى Egemen.kz.
قاسىم-جومارت توقاەۆ قازاق تازىسىن الدىن الا تانۋعا وڭ سەپتىگىن تيگىزگەنى ءۇشىن تاماش ياككەلگە العىس ايتتى. بۇل شەشىم 2024 جىلى امستەردامدا وتكەن حالىقارالىق كينولوگيا فەدەراتسياسى (FCI) باس كوميتەتىنىڭ وتىرىسىندا قابىلدانعان ەدى.
مەملەكەت باسشىسىنىڭ ايتۋىنشا, تازى جانە توبەت تۇقىمدارىن ساقتاۋ تەك كينولوگيا تۇرعىسىنان ەمەس, سونداي-اق ءداستۇرلى تۇرمىس سالتىمەن تىعىز بايلانىستى تاريحي-مادەني قۇندىلىق رەتىندە ايرىقشا ماڭىزعا يە. يت – قازاق حالقىنىڭ دۇنيەتانىمىندا جەتى قازىنانىڭ ءبىرى سانالادى.
جۇيەلى جۇمىس ناتيجەسىندە بۇگىندە قازاقستان كينولوگتار وداعىنىڭ بىرىڭعاي اسىل تۇقىمدى يتتەر كىتابىندا 4 مىڭعا جۋىق تازى تىركەلگەن. ءتيىستى زاڭنامالىق اكتىلەر قابىلداندى.
بۇدان بولەك, كوپ ۇزاماي جەتىسۋ وبلىسىندا سۇرىپتاۋ جۇمىستارىمەن اينالىساتىن جانە يت اسىراۋشىلارعا عىلىمي-كينولوگيالىق قولداۋ كورسەتەتىن ۇلتتىق ورتالىق اشىلماق.
حالقىمىزدىڭ اسىل قازىناسىن دارىپتەۋ ماقساتىندا بيىلدان باستاپ 3 قىركۇيەكتە قازاقى تازى مەن توبەت كۇنى اتالىپ وتەدى.
ءوز كەزەگىندە تاماش ياككەل قازاقى يت تۇقىمدارىن ساقتاۋعا ايرىقشا قامقورلىق كورسەتىپ وتىرعان مەملەكەت باسشىسىنا ريزاشىلىعىن ءبىلدىردى.
سونىمەن قاتار پرەزيدەنتكە الەمنىڭ 100 ەلىن بىرىكتىرەتىن FCI قىزمەتى تۋرالى مالىمەت بەردى.
مەملەكەت باسشىسى قاسىم-جومارت توقاەۆ ەلىمىزدەگى كينولوگيا سالاسىن دامىتۋعا قوسقان ۇلەسى ءۇشىن حالىقارالىق كينولوگيا فەدەراتسياسىنىڭ پرەزيدەنتى تاماش ياككەلدى II دارەجەلى «دوستىق» وردەنىمەن ماراپاتتادى.