تۇركىستان وبلىسىندا «قازكراحمال» زاۋىتى سالىنىپ جاتىر. قۇنى 35 ملرد تەڭگەنى قۇرايتىن بۇل كاسىپورىن ەلىمىزدەگى العاشقى ءارى ورتالىق ازياداعى جۇگەرىنى تەرەڭ وڭدەپ, جوعارى قوسىلعان قۇنى بار ءونىم شىعاراتىن ەڭ ءىرى كەشەن بولماق, دەپ جازادى Egemen.kz.
جوبا وڭدەۋ ونەركاسىبىن دامىتۋعا جانە ءوڭىر ەكونوميكاسىن ارتاراپتاندىرۋعا باعىتتالعان. ەكى كەزەڭدى قامتيتىن جوبانىڭ العاشقىسىندا استىقتى قابىلداۋ, كەپتىرۋ جانە ساقتاۋ ءۇشىن بازالىق ينفراقۇرىلىم قۇرىلدى. قازىر پايدالانۋعا بەرىلگەن. ەكىنشى كەزەڭ بارىسىندا تەرەڭ وڭدەۋ وندىرىستىك كەشەنىنىڭ قۇرىلىسى قارقىندى جۇرگىزىلىپ جاتىر.
زاۋىت تولىق ىسكە قوسىلعاننان كەيىن جىلىنا 150 مىڭ تونناعا دەيىن جۇگەرى وڭدەپ, 26 ءتۇرلى ءونىم شىعارادى. ولاردىڭ قاتارىندا تاعامدىق گليۋكوزا, مالتوزالى ءشاربات, جۇگەرى مايى, كراحمال جانە قۇراما جەم بار. ءوندىرىس قالدىقسىز تسيكل قاعيداتى بويىنشا ۇيىمداستىرىلىپ, تەك گمو-سىز تابيعي شيكىزات قولدانىلادى. وسىعان بايلانىستى وڭىردە جۇگەرى ەگىس القاپتارىن ۇلعايتۋ جۇمىستارى قولعا الىنعان. جاڭا القاپتار تۇركىستان وبلىسىنىڭ شاردارا, جەتىساي جانە ماقتاارال اۋداندارىندا يگەرىلىپ جاتىر.
الماتىدا قىتايلىق كومپانيا زاماناۋي قوقىس وڭدەۋ زاۋىتىن سالادى
كاسىپورىننىڭ تەحنولوگيالىق جاراقتاندىرىلۋى 80% دەڭگەيىندە اۆتوماتتاندىرىلعان, بۇل ءونىم ساپاسىن جوعارى دەڭگەيدە باقىلاۋعا, وندىرىستىك شىعىنداردى ازايتۋعا جانە تاۋارلاردىڭ باسەكەگە قابىلەتتىلىگىن ارتتىرۋعا مۇمكىندىك بەرەدى. جوبا اياسىندا وزىق حالىقارالىق تەحنولوگيالار ەنگىزىلىپ, شەتەلدىك مامانداردىڭ تاجىريبەسى ەسكەرىلەدى.
زاۋىت ونىمدەرى قازاقستاننىڭ ىشكى نارىعىنا, سونىڭ ىشىندە تاعام جانە فارماتسەۆتيكا ونەركاسىبىنە باعىتتالادى, سونداي-اق ازيا مەن ەۋروپا ەلدەرىنە ەكسپورتقا شىعارىلادى. جۇگەرى كراحمالى, ءشارباتتار جانە باسقا دا ونىمدەر ءتۇرلى ونەركاسىپ سالالارىندا كەڭىنەن قولدانىلادى, بۇل كاسىپورىننىڭ ەكسپورتتىق الەۋەتىن كۇشەيتەدى.
سولتۇستىك قازاقستان وبلىسىندا اعاش وڭدەۋ زاۋىتى سالىنادى
بولاشاقتا زاۋىت قۋاتىن جىلىنا 300 مىڭ تونناعا دەيىن ارتتىرۋ جانە الەمنىڭ 100-دەن استام كومپانياسىمەن حالىقارالىق ارىپتەستىكتى تەرەڭدەتۋ جوسپارلانىپ وتىر.