دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, وكپە قاتەرلى ىسىگىنەن جىل سايىن 1,8 ميلليون ادام كوز جۇمادى. ال ونىڭ 64%-ى كەش انىقتالادى. وتاندىق «Cortex AI» ستارتاپى وسى ماسەلەنى شەشۋگە باعىتتالعان. جاساندى ينتەللەكت نەگىزىندە جۇمىس ىستەيتىن جۇيە رەنتگەن سۋرەتتەرىن 3 مينۋت ىشىندە تالداپ, قاتەرلى ىسىك بەلگىلەرىن 94,1% دالدىكپەن انىقتايدى.
اسىلجان ابدۋللاەۆ – قىزىلوردا وبلىسىنىڭ تۋماسى. 17 جاستاعى كاسىپكەر, قازىرگى ۋاقىتتا «Astana IT University-دە» «تسيفرلىق جۋرناليستيكا» ماماندىعىندا وقىپ جاتىر. «Cortex AI» – ونكولوگيالىق اۋرۋلاردى ەرتە انىقتاۋعا كومەكتەسەتىن تەحنولوگيا. ەگەر بۇل جوبا تولىققاندى ىسكە اسسا, مىڭداعان ادامنىڭ ءومىرىن ساقتاپ قالۋعا سەپتىگىن تيگىزەرى انىق. ايتا كەتەيىك, اسىلجان ەڭبەك جانە حالىقتى الەۋمەتتىك قورعاۋ مينيسترلىگى سىيلىعىنىڭ يەگەرى, سونداي-اق «Enactus Astana IT University» ۇيىمىنىڭ نەگىزىن قالاۋشى. «Cortex AI» جوباسىن جاساۋعا ونى وتباسىندا بولعان قايعىلى وقيعا سەبەپ بولعان. «اتام 30 جىل مەديتسينا سالاسىندا ەڭبەك ەتتى, بىراق ءوزى وكپە قاتەرلى ىسىگىنە شالدىقتى. بۇل مەن ءۇشىن ۇلكەن سوققى بولدى. وسى جاعدايدان كەيىن ءبىلىمىمدى وسى دەرتتى ەرتە انىقتاۋعا كومەكتەسەتىن تەحنولوگيا جاساۋعا باعىتتاۋدى ۇيعاردىم», دەيدى اسىلجان.
2023 جىلدىڭ قاراشا ايىندا قۇرىلعان «Cortex AI» جۇيەسى رەنتگەن سۋرەتتەرىندەگى ەڭ ۇساق پاتولوگيالىق بەلگىلەردى انىقتايدى. جاساندى ينتەللەكت وكپەنىڭ قاۋىپتى ايماقتارىن بەلگىلەپ, قاتەرلى ىسىك قاۋپىن باعالايدى. «دارىگەرلەردىڭ جۇكتەمەسى اۋىر, ولار ءاربىر سۋرەتتى تەز ءارى ءدال تالداي المايدى. «Cortex AI» مەديتسينالىق جۇيەگە وڭاي قوسىلادى. ونى «PACS» (مەديتسينالىق بەينەلەردى ساقتاۋ جانە بەرۋ جۇيەسى) ارقىلى قوسۋ جەتكىلىكتى, وسىلايشا دارىگەرلەر ەش قيىندىقسىز پايدالانا الادى», دەيدى جاس كاسىپكەر.
جۇيە ناۋقاستى ءوزى رەنتگەنگە تۇسىرەدى. كەيىن سۋرەت «Cortex AI» جۇيەسىنە جۇكتەلەدى, جاساندى ينتەللەكت ونى تالداپ, دارىگەرگە ناتيجە بەرەدى. دارىگەر جاساندى ينتەللەكتىنىڭ تالداۋىمەن ءوز تاجىريبەسىنە سۇيەنىپ, سوڭعى قورىتىندىنى جاسايدى.
قازىر «Cortex AI» كومانداسى شاعىن, بىلىكتى مامانداردان قۇرالعان. الگوريتمدەردى «Astana IT University» ستۋدەنتتەرى ازىرلەگەن, ال ەرنۇر سىرلىباەۆ پەن ابۋ قونىسبەك ماشينالىق وقىتۋ باعىتىندا جۇمىس ىستەيدى. جوبا ۇيلەستىرۋشىسى – كاميليا كوشەرباي, عىلىمي كەڭەسشىلەر قاتارىندا نازارباەۆ ۋنيۆەرسيتەتىنىڭ تۇلەگى ايكەن التاي مەن گارۆارد ۋنيۆەرسيتەتىنىڭ تۇلەگى تىلەك زەيىن بار.
«Cortex AI» حالىقارالىق دەڭگەيدە دە جەتىستىكتەرگە جەتتى. جوبا قىتايدىڭ «Zhongguancun World Competition» بايقاۋىندا 1300 ستارتاپتىڭ ىشىنەن 2-ورىن الدى. سونداي-اق $4,5 مىڭ كولەمىندە گرانت جەڭىپ, ءۇش وتاندىق ەمحانادا قاناتقاقتى جوبا رەتىندە ىسكە قوسىلدى. ستارتاپ تاجىكستان نارىعىنا شىعۋ ءۇشىن حۋدجان ۋنيۆەرسيتەتىمەن سەرىكتەستىك ورناتقان. ەڭبەك جانە حالىقتى الەۋمەتتىك قورعاۋ مينيسترلىگى دە جوباعا جوعارى بەردى. قازىرگى تاڭدا «Cortex AI» حالىقارالىق نارىققا شىعۋعا ازىرلەنىپ جاتىر. اسىلجاننىڭ ايتۋىنشا, الدىمەن «ISO 13485» سەرتيفيكاتىن الۋ جوسپارلانعان. بۇل جۇيەنى ەۋروپا مەن اقش-تىڭ مەديتسينالىق ستاندارتتارىنا سايكەستەندىرۋگە مۇمكىندىك بەرەدى. «بولاشاقتا ءبىزدىڭ جۇيە تەك وكپە قاتەرلى ىسىگىن ەمەس, ءسۇت بەزى, باۋىر, ۇيقى بەزى ىسىكتەرىن دە انىقتايتىن بولادى. باستاپقى تەستىلەر جوعارى دالدىكتى كورسەتىپ وتىر. الداعى ەكى جىلدا جوبانى تولىق ەنگىزۋگە جۇمىس ىستەيتىن بولامىز», دەيدى اۆتور.
جوباعا $250 مىڭ ينۆەستيتسيا تارتۋ كوزدەلگەن, بۇل قاراجات كوماندا قۇرامىن كەڭەيتىپ, الگوريتمدەردى جەتىلدىرۋگە, جاڭا مەديتسينالىق مەكەمەلەرمەن جۇمىس ىستەۋگە جۇمسالادى. ۇزاقمەرزىمدى جوسپار بويىنشا, «Cortex AI» مەملەكەتتىك اۋرۋحانالارعا ەنگىزىلىپ, $850 مىڭ كولەمىندە قوسىمشا ينۆەستيتسيا تارتۋ جوسپارلانعان. «جاساندى ينتەللەكت – مەديتسينانىڭ بولاشاعى. ءبىز ەلىمىزدى وسى سالادا كوشباسشى ەلدەردىڭ قاتارىنا قوسۋدى ماقسات ەتىپ وتىرمىز», دەيدى ا.ابدۋللاەۆ.