قار نەگە قۋانىش سىيلايدى؟

قاردا بالالىق شاق­تىڭ ءتاتتى ەس­تە­لىگى بار. اق ۇلپا­دان جاسالعان العاشقى اققالا. شانامەن زۋلاپ تۇسكەن بيىك توبە. بىراق بۇل شاتتىق وتكەن كۇنمەن عانا بايلا­نىس­تى ما؟ عالىمدار بۇل سۇ­راققا جاۋا­پ ىزدەپ كورگەن. دجوردجيا ۋنيۆەرسيتەتى­نىڭ كليمات پسيحولوگى الان ستيۋارت­تىڭ ايتۋىنشا, قار – اۋا رايىنىڭ ەڭ ادەمى ءارى جۇمباق ءتۇرى. زەرتتەۋشىلەر ونىڭ قۇرىلىمى ەرەكشە ەكەنىن دالەلدەگەن. مىسالى, جاڭادان جاۋعان قار كەۋەكتى كەلەدى, سوندىقتان ول دىبىس­تى جاقسى سىڭىرەدى. سودان اينالادا مۇلگىگەن تى­نىش­تىق ورنايدى. قارلى تۇن­دەر­دەگى تىنىشتىق ءبىزدىڭ ىشكى الەمىمىزگە دە تىنىشتىق سىيلايدى. پسيحولوگ, جازۋشى كاري لەيبوۆيتستىڭ ايتۋىنشا, قار ادامنىڭ اينالامەن قارىم-قاتىناسىن وزگەرتەدى. «قار, اسىرەسە كورۋ سەزىمىمىزگە ەرەكشە اسەر ەتەدى. اق ۇلپا كور­كەم بولعاندىقتان, جانىمىزدى جادىراتادى», دەيدى ول.

قار تۇسكەندە بۇرىنعى ۇيرەنشىكتى جەرلەر جاڭا مەكەن سەكىلدى اسەر قالدىرادى. پسيحولوگتەردىڭ زەرتتەۋىنشە, اق ءتۇس ادامنىڭ جۇيكە جۇيەسىن تىنىشتاندىرىپ, سانانى تازارتادى. ول ارتىق ويلاردان ارىلۋعا, ەموتسيالاردى رەتتەۋگە كومەكتەسەدى. سوندىقتان مەديتاتسيا ورتالىقتارى مەن ەم­حانالاردا اق ءتۇس ءجيى تاڭدا­لادى.

عالىمداردىڭ زەرتتەۋىنشە, قار جارىقتى دا جاقسى سى­ڭىرەدى. ول جارىقپەن شاعى­لىس­قاندا قويۋ قاراڭعى ءتۇن جارقىراي تۇسەدى. بۇل, اسى­رەسە قىستا كۇيزەلىسكە ءتۇسىپ كە­­تەتىن ادامدارعا وڭ اسەر ەتەدى ەكەن. ءتىپتى ۇزاق ءتۇن بو­­لاتىن سولتۇستىك ايماق­تار­دا ماۋسىمدىق كۇيزەلىستى بول­دىرماۋ ءۇشىن ارنايى جا­رىق تەراپياسى قول­دانىلادى.

قىس ادامداردىڭ بارلى­عىنا بىردەي ۇناي بەرمەيتى­نىن ۇمىتپاۋ قاجەت. بىرەۋلەر ءۇشىن بۇل مەزگىل قاقاعان ايازبەن, قار تازالاۋمەن, كو­لىك كەپتەلىسىمەن بايلانىستى. بىراق قىستىڭ سۋىعىن ۇنات­پايتىن جانداردىڭ ءوزى قار جاۋعان كۇندەرى جاقسى كوڭىل كۇيدە جۇرەدى.