5 ساۋىردە استاناداعى «بارىس-ارەنادا» كاسىپقوي بوكس كەشى وتەدى. جارىستىڭ باستى جەكپە-جەگىندە ورتا سالماقتاعى WBO, IBF نۇسقالارى بويىنشا الەم چەمپيونى جانىبەك ءالىمحان ۇلى (16-0, 11 كو) اناۋەل نگاميسسەنگەمەن جۇدىرىقتاسادى. اناۋەل كونگودا تۋىپ-وسكەنىمەن, قازىرگى كەزدە فرانتسيانىڭ تۋى استىندا ونەر كورسەتەدى. 3 اقپاندا 29 جاسقا تولعان سپورتشىنىڭ كاسىپقويلار اراسىندا كۇش سىناسىپ جۇرگەنىنە بەس جىلعا جۋىقتادى. وسى ارالىقتا 14 كەزدەسۋ وتكىزىپ, بارلىعىندا جەڭىسكە جەتتى. 9 قارسىلاسىن نوكاۋتقا جىبەردى. بۇل جارىستان الەمگە ايگىلى ESPN ارناسى تىكەلەي رەپورتاج جۇرگىزەدى.
ءابۋ-دابيدە WTA 500 ءتۋرنيرىنىڭ تۇساۋى كەسىلدى. ەلىمىزدىڭ ەكى تەننيسشىسى دە جۇلدە قورى 1 064 510 دوللاردى قۇرايتىن جارىستى ەكىنشى اينالىمنان باستادى. وكىنىشكە قاراي, يۋليا پۋتينتسەۆا (№21 راكەتكا) الەمدىك رەيتينگتە وزىنەن 16 ساتى تومەن تۇرعان ماركەتا ۆوندروۋشوۆاعا (№36) ەسە جىبەردى. ەسەپ – 2:6, 3:6. ەلەنا رىباكينا (№5) اقش-تا تۇرىپ جاتقان ۋكراينالىق كەتي ۆولىنەتسپەن (№68) شەبەرلىك بايقاستى. بۇل باسەكەدە ەلىمىزدىڭ ءبىرىنشى راكەتكاسى باسىم ءتۇستى – 2:6, 6:4, 6:4.
«استانا» ۆەلوكلۋبى پارسى شىعاناعىندا وتەتىن ەكى بىردەي ءدۇبىرلى دوداعا قاتىسادى. اتاپ ايتساق, بۇگىن وماندا «ماسقات كلاسسيكاسى» ۇيىمداستىرىلادى. 8-12 اقپان ارالىعىنا «ومان تۋرىن» تاماشالايمىز. اتالعان جارىستا «استانانىڭ» تۋى استىندا انتون چارميگ, ماكس كانتەر, حەنوك مۋليۋبىرحان, ۆاۋت پۋلس, ديەگو ۋليسسي, داۆيدە تونەاتتي, نيكوليا ۆينوكۋروۆ سىندى ۆەلوشاباندوزدار ونەر كورسەتەدى.
فۋتبولدان 2026 جىلى وتەتىن الەم چەمپيوناتىنىڭ ىرىكتەۋ ءتۋرنيرى اياسىندا ەلىمىزدىڭ قۇراماسى 23 ناۋرىزدا سىرت الاڭدا ۋەلسكە قارسى وينايدى. كۇنى كەشە عانا انگليانىڭ پرەمەر-ليگاسىندا ونەر كورسەتەتىن سول كوماندانىڭ ەكى بىردەي بەلدى ويىنشىسىنىڭ جاراقات الىپ, الداعى ماتچتارعا قاتىسا المايتىنى بەلگىلى بولدى. اتاپ ايتساق, «توتتەنحەمنىڭ» شابۋىلشىسى برەننان دجونسون جىلىنشىگىن جاراقاتتاپ العان, «فۋلحەمنىڭ» فورۆاردى حارري ۋيلسوننىڭ اياعى سىنعان.
ءۇندىستاننىڭ چەنناي قالاسىندا اتر-ءدىڭ «چەللەندجەر» ساناتىنداعى ءتۋرنيرى باستالدى. تۇساۋكەسەر كەزدەسۋدە تيموفەي سكاتوۆ چەحيالىق گينەك بارتونمەن كەزدەسىپ, 6:4, 6:4 ەسەبىمەن جەڭىسكە جەتتى. ەكىنشى كەزەڭدە ول رەسەيلىك اسلان كاراتسەۆپەن كۇش سىناسادى.
يسپانيانىڭ اليكانتە قالاسىندا بوكستان «Boxam Elite-2025» ءتۋرنيرىنىڭ شىمىلدىعى ءتۇرىلدى. العاشقى جارىس كۇنى باعلان كەنجەبەك (54 كگ) سلوۆاكيالىق ەريك كانتونانى, جاسۇلان تىلەۋمبەك (57 كگ) پالەستينالىق ۆاسيم ابۋسالدى, بەيبارىس جەكسەن (60 كگ) ماجارستاندىق رولاند ۆەرەشتى, جاندوس قىدىراليەۆ (63,5 كگ) پەن دۋلات بەكباۋوۆ (67 كگ) يسپانيانىڭ قوس وكىلى – ويەر يباررەچە كوندە مەن يەراي گەورگەۆيچ-باررۋەكونى (يسپانيا), دياس مولجىگىتوۆ (75 كگ) پورتۋگاليالىق ديوگۋ سەمەدۋدى, ماقسات وتەگەنوۆ (75 كگ) ۋكراينالىق يۋري زاحارەەۆتى ۇتسا, بەكنۇر باتىربەك (86 كگ) رۋمىنيالىق اندرەي ارەدواەمەن جۇدىرىقتاسۋدان باس تارتتى. گۇلجاينا ءۇببىنيازوۆا رۋمىنيانىڭ تاعى ءبىر وكىلى كلاۋديا نەچيتادان جەڭىلدى. سونداي-اق سوقىر جەرەبە ەلىمىزدىڭ قوس ورەنى ەلنۇر ءسۇيىنباي مەن امان قونىسبەكوۆتى (71 كگ) تۇساۋكەسەر كەزدەسۋدە جولىقتىردى. بۇل تارتىس ەلنۇردىڭ پايداسىنا شەشىلدى.