قوعامدىق كولىكتە بالالاردىڭ قاۋىپسىزدىگىن قامتاماسىز ەتۋ – مەملەكەتتىڭ باستى مىندەتىنىڭ ءبىرى. سوندىقتان بالانى قوعامدىق كولىكتەن ماجبۇرلەپ ءتۇسىرۋ – زاڭعا قايشى ارەكەت.
ەلىمىزدە 2024 جىلى قابىلدانعان «ايەلدەردىڭ قۇقىقتارىن قورعاۋ جانە بالالاردىڭ قاۋىپسىزدىگىن قامتاماسىز ەتۋ تۋرالى» زاڭىنا سايكەس, 16 جاسقا تولماعان بالالاردى اۆتوبۋستان, تروللەيبۋستان نەمەسە باسقا دا قوعامدىق كولىك تۇرلەرىنەن ماجبۇرلەپ تۇسىرۋگە تىيىم سالىندى. بۇل وزگەرىس – ەلىمىزدەگى بالا قۇقىقتارىن قورعاۋدى كۇشەيتۋگە باعىتتالعان ماڭىزدى قادامنىڭ ءبىرى. بۇعان دەيىن كەيبىر جاعدايدا قوعامدىق كولىك كوندۋكتورلارى نەمەسە جۇرگىزۋشىلەر جولاقىسى تولەنبەگەنى ءۇشىن بالالاردى ايالدامادان ءتۇسىرىپ كەتەتىن. مۇنداي ارەكەتتەر بالانىڭ قاۋىپسىزدىگىنە قاتەر توندىرۋمەن قاتار, ولاردىڭ پسيحولوگيالىق جاعدايىنا دا كەرى اسەر ەتەدى. جاڭا زاڭ بويىنشا, قوعامدىق كولىك قىزمەتكەرلەرى بالاعا قاتىستى وسىنداي ارەكەت جاساسا, زاڭ الدىندا جاۋاپقا تارتىلادى. بۇل ەرەجە بالالاردىڭ ومىرىنە تونەتىن قاۋىپتىڭ الدىن الۋعا باعىتتالعان. ويتكەنى كامەلەتكە تولماعان بالانىڭ قاراۋسىز قالىپ, جولدا ءجۇرۋى نەمەسە بەيتانىس جەردە جالعىز قالۋى قايعىلى وقيعاعا الىپ كەلۋى مۇمكىن.
ەگەر ءسىز وسىنداي جاعدايعا كۋا بولساڭىز, دەرەۋ «102» نومىرىنە پوليتسياعا نەمەسە «111» سەنىم تەلەفونىنا حابارلاسىڭىز. بۇل زاڭ تەك قوعامدىق كولىككە قاتىستى ەمەس, جالپى بالانىڭ كەز كەلگەن قوعامدىق ورتادا قورعالۋىن قامتاماسىز ەتەدى. اتا-انالار مەن بالانىڭ زاڭدى وكىلدەرى بۇل وزگەرىستەردى ءبىلىپ قانا قويماي, بالالارىنا ءوز قۇقىقتارى تۋرالى اقپارات بەرىپ وتىرۋى قاجەت. كەز كەلگەن بالا ءوزىنىڭ زاڭدى قۇقىقتارىن ءبىلۋى جانە قانداي دا ءبىر ادىلەتسىزدىككە تاپ بولعان جاعدايدا جاۋاپكەرشىلىككە تارتۋعا بولاتىنىن ءتۇسىنۋى كەرەك.