حالىقارالىق دزيۋدو فەدەراتسياسى وتكەن جىلدىڭ قورىتىندىسى بويىنشا «IJF Judo Awards 2024» جۇلدەسىن يەلەنگەن بالۋانداردىڭ ەسىمدەرىن جاريالادى. ەرلەر اراسىندا «ەڭ ۇزدىك دزيۋدوشى» اتاعىنان ۇمىتكەرلەردىڭ ءبىرى ەلدوس سمەتوۆ ەدى. بىراق بۇل اتالىمدا توپ جارۋ باقىتى داڭقتى جەرلەسىمىزگە بۇيىرمادى.
تاڭداۋ حيدايات گەيداروۆقا ءتۇستى. ازەربايجان دزيۋدوشىسى ءۇشىن دە قۋانعان ءجون. سەبەبى ول بىزگە بوتەن ەمەس. حيدايات 1997 جىلعى 27 شىلدەدە قاراعاندىدا دۇنيەگە كەلگەن. بالا كەزىندە اتا-اناسىمەن بىرگە تاريحي وتانىنا ورالدى. كاسپي تەڭىزىنىڭ جاعالاۋىندا جاتتىعىپ, كوپتەگەن بيىك بەلەستەردى باعىندىردى. بىلتىرعى جىلعى تابىسى تىپتەن كەرەمەت بولدى. 73 كگ سالماق دارەجەسىندە بەلدەسەتىن ح.گەيداروۆ ءبىر ماۋسىم ارالىعىندا ءۇش بىردەي ءدۇبىرلى دودادا دارا شىعىپ, ترەبل جاسادى. اتاپ ايتساق, ساۋىردە زاگرەبتە ەۋروپا بىرىنشىلىگىن ۇتتى, مامىردا ابۋ-دابيدە الەم چەمپيوناتىندا قارسىلاس شاق كەلتىرمەدى, تامىزدا پاريجدە وليمپيا ويىندارىنىڭ جەڭىمپازى اتاندى. سول سەبەپتى, بۇل اتاققا ح.گەيداروۆ ابدەن لايىق.
ايەلدەر اراسىندا كريستا دەگۋچي دارا شىقتى. جاپونيادا تۋىپ-وسكەنىمەن, كانادانىڭ نامىسىن قورعاپ جۇرگەن 29 جاستاعى ساقا سپورتشى 57 كگ سالماقتا پاريج وليمپياداسىندا الدىنا جان سالمادى.
«ەڭ بىلىكتى باپكەر» اتالىمىندا ريحارد تراۋتمان مەن ماركو شپيتكا وزدى. ەكەۋىنىڭ دە ۇلتى نەمىس. ءبىرى – ازەربايجاننىڭ ەرلەر قۇراماسىن باپتاسا, ەكىنشىسى وزبەكستاننىڭ ايەلدەر كومانداسىن جاتتىقتىرادى. كەزىندە ەكەۋى دە ءبىر ۋاقىتتا كۇرەسكەن. 55 جاستاعى ريحارد گفر-دىڭ ميۋنحەن قالاسىندا دۇنيەگە كەلگەن. ەسەيە كەلە 1992 جىلى بارسەلونا, 1996 جىلى اتلانتا وليمپيادالارىندا قولا جۇلدەنى قورجىنعا سالدى. 1993 جىلى گاميلتوندا ۇيىمداستىرىلعان الەم چەمپيوناتىندا دا ءدال سول مەجەدەن كورىندى. بىلتىر تراۋتماننىڭ ەكى بىردەي شاكىرتى – حيدايات گەيداروۆ پەن زەليم كوتسوەۆ الەم چەمپيوناتى مەن وليمپيا ويىندارىندا التىن تۇعىرعا كوتەرىلدى.
53 جاستاعى ماركو گدر-دىڭ درەزدەنىندە دۇنيەگە كەلدى. ول – اتلانتا وليمپياداسى مەن پاريجدەگى الەم چەمپيوناتىنىڭ قولا جۇلدەگەرى, قۇرلىق بىرىنشىلىگىندە ءبىر التىن, ءبىر كۇمىستى ولجالادى. شپيتكا باپتاعان وزبەك قىزدارى اراسىنان ديورا كەلديوروۆا فرانتسيانىڭ باس شاھارىندا ايدى اسپانعا ءبىر-اق شىعارىپ, التىننان القا تاقتى. ۇلتتىق كوماندالار باپكەرلەرى اراسىنان فرانتسيا قۇراماسىنىڭ باس باپكەرى باپتيست لەرۋا ەڭ مىقتى دەپ تانىلدى.
بىلتىرعى وليمپيا ويىندارىنىڭ فينالىندا داڭقى اسپانداعان فرانتسيانىڭ الىبى تەددي رينەر وڭتۇستىك كورەيانىڭ وعىلانى كيم ميندجوننىڭ اياعىن كوكتەن كەلتىرىپ, كەزەكتى جارقىن جەڭىسىنە قول جەتكىزگەن ەدى. مىنە, سول تازا جەڭىس «جىل يپپونى» دەپ تانىلدى. 52 كگ سالماق دارەجەسىنىڭ العاشقى اينالىمدارىنىڭ بىرىندە وزبەك قىزى ديورا كەلديوروۆا اتاعى الىسقا جايىلعان جاپونيانىڭ جۇلدىزى ۋتو ابەنى قوس جاۋىرىنىمەن جەرگە قاداعانىن كوزىمىز كوردى. سول كورىنىس «جىل ءساتى» دەگەن اتالىمىندا جەڭىپ شىقتى. جالىنداپ ءوسىپ كەلە جاتقان جاس دزيۋدوشىلار اراسىنان تاڭداۋ جوان-بەندجامين گاباعا ءتۇستى. 73 كگ سالماقتا كۇرەسىپ جۇرگەن 24 جاستاعى فرانتسيانىڭ سايىپقىرانى پاريج وليمپياداسىندا ەكى جۇلدە الدى. جەكەلەگەن سايىستا كۇمىس, كوماندالىق باسەكەدە التىن مەدالدى موينىندا جارقىراتتى. ءبىر ايتا كەتەرلىگى, گابا كوماندالىق جارىستىڭ فينالىندا وليمپيادانىڭ ەكى, الەمنىڭ ءتورت دۇركىن چەمپيونى, جاپونيالىق حيفۋمي ابەدەن ايلاسىن اسىردى.