رەسەيدىڭ كراسنويار قالاسىندا كسرو-نىڭ داڭقتى بالۋانى, وليمپيا ويىندارىنىڭ ەكى دۇركىن جەڭىمپازى, الەم چەمپيونى, الەم كۋبوگىنىڭ بەس دۇركىن جەڭىمپازى, ءۇش دۇركىن ەۋروپا چەمپيونى يۆان يارىگيندى ەسكە الۋعا ارنالعان حالىقارالىق تۋرنير اياقتالدى.
داڭقتى سپورتشىنىڭ مەموريالىندا رەسەي مەن كراسنويار ولكەسى كوماندالارىنان بولەك, ازەربايجان, بەلارۋس, يران, كۋبا, قازاقستان, قىتاي, قىرعىزستان, وڭتۇستىك كورەيا, وزبەكستان, ماجارستان, مەكسيكا, موڭعوليا, سولتۇستىك ماكەدونيا, تاجىكستان, تۇركيا, ءۇندىستاننان كەلگەن بارلىعى 500-گە تارتا بالۋان باق سىنادى.
«كىشى الەم چەمپيوناتىنا» بالانعان جارىستا ەلىمىزدىڭ ايەلدەر كۇرەسى وكىلدەرى وتە جاقسى ونەر كورسەتتى. اسىرەسە ەلميرا سىزدىقوۆا اسقان شەبەرلىگىمەن ءتانتى ەتتى. كەزىندە ريو وليمپياداسى (2016) مەن ازيا ويىندارىندا (2018) قولا مەدالدى يەلەنىپ, قۇرلىق چەمپيوناتىندا سەگىز رەت (2 التىن, 2 كۇمىس, 4 قولا) جەڭىس تۇعىرىنا كوتەرىلگەن سپورتشىمىز ءالى دە بابىندا ەكەنىن بايقاتتى. باستاپقى باسەكەلەردە بارلىق قارسىلاسىنا سان سوقتىرعان ە.سىزدىقوۆا جارتىلاي فينالدا قىزدار اراسىنداعى الەم, ەۋروپا چەمپيونى, كراسنودارلىق ولگا كوزىراەۆانى قاپى قالدىرسا, فينالدا الەم چەمپيوناتىنىڭ كۇمىس, ازيا بىرىنشىلىگىنىڭ ەكى دۇركىن قولا جۇلدەگەرى داۆااناسان ەنح-امارمەن ايقاستى. باسەكە بارىسىندا موڭعوليانىڭ ماقتانىشىن 8:1 ەسەبىمەن ۇتىپ جاتىپ, اقىرىندا ونى قوس جاۋىرىنىمەن جەرگە قادادى. ءسويتىپ, قازاق بالۋانى 76 كگ سالماق دارەجەسىنىڭ باس جۇلدەسىن ولجالادى. ءبىر ايتا كەتەرلىگى, 5 اقپاندا ەلميرا 33 جاسقا تولادى.
ەلىمىزدىڭ تۋى استىندا ونەر كورسەتىپ جۇرگەن 62 كگ سالماقتاعى ۆيكتوريا حۋساينوۆا فينالدىق سىنعا دەيىن القىنباي جەتتى. شەشۋشى باسەكەدە بەلارۋستىك ۆەرونيكا يۆانوۆانى 3:2 ەسەبىمەن جەڭىپ جاتقان ەدى. سوڭعى سەكۋندتاردا قارسىلاسىن اياعىنا وتكىزىپ الىپ, بەس ۇپاي بەرىپ قويدى. سونىڭ سالدارىنان ۆەرونيكا كۇمىس مەدالدى قاناعات تۇتتى. ءدال سول بەلارۋس بالۋانى جارتىلاي فينالدا تىنىس دۋبەكتەن باسىم تۇسكەن بولاتىن. ءۇشىنشى ورىن ءۇشىن بەلدەسۋدە قازاق قىزى بارىن سالدى. العاشىندا رەسەيلىك ولگا ياتسەنكو ءۇش ۇپاي وزىپ تۇردى. دەسەك تە سوڭىنا دەيىن كۇرەسكەن تىنىس 4:3 ەسەبىمەن جەڭىستى قارسىلاسىنىڭ ۋىسىنان ج ۇلىپ اكەتىپ, قولا مەدالدى موينىنا ءىلدى.
ەركىن كۇرەستەن وتكەن جارىستا ەلىمىزدىڭ نامىسىن اعايىندى قايرات, قۋات امىرتاەۆتار (61 كگ), ريفات سايباتالوۆ (65 كگ), مۇرات جاقىپوۆ (74 كگ) سىندى بالۋاندار قورعادى. وكىنىشكە قاراي, ولاردىڭ بىردە-بىرەۋى جەڭىس تۇعىرىنا كوتەرىلە المادى.