ۇلتتىق ۇلاننىڭ «باتىس» وڭىرلىك قولباسشىلىعىنا قاراستى اسكەري بولىمدەردە 2025 جىلدىڭ قىسقى وقۋ كەزەڭى باستالدى, دەپ حابارلايدى Egemen.kz قولباسشىلىقتىڭ ءباسپاسوز قىزمەتىنە سىلتەمە جاساپ.
قاڭتاردىڭ 5-ءى كۇنى وڭىرلىك قولباسشىلىققا قاراستى بارلىق اسكەري ءبولىمنىڭ ساپتىق الاڭىندا ءداستۇرلى ميتينگ وتكىزىلىپ, جاۋىنگەرلىك قىزمەت بارىسىنداعى قاۋىپسىزدىك ەرەجەلەرىن ساقتاۋ بويىنشا پراكتيكالىق ساباق جۇرگىزىلگەن.
جاڭا وقۋ كەزەڭىنىڭ اشىلۋىنا ۇلتتىق ۇلان باس قولباسشىسىنىڭ ورىنباسارى گەنەرال-مايور باۋىرجان ابجانوۆ قاتىسىپ, جەكە قۇرامدى جاڭا وقۋ كەزەڭىمەن قۇتتىقتادى. ءوز سوزىندە ول وقۋ كەزەڭىنىڭ ماڭىزدىلىعىنا توقتالىپ, ۇلاندىقتاردىڭ جاۋىنگەرلىك دايىندىعىن ارتتىرۋ, كاسىبي شەبەرلىگىن شىڭداۋ جانە جاڭا تەحنولوگيانى, ناقتىراق ايتساق ۇشقىشسىز ۇشۋ اپپاراتتارىن پايدالانۋ ماسەلەسىنە توقتالدى.
وقۋدىڭ العاشقى كۇنى ۇلاندىقتار مەملەكەتتىك-قۇقىقتىق جانە جاۋىنگەرلىك دايىندىق, قارۋ-جاراق پەن اسكەري تەحنيكانى قولدانۋ جانە ونى كەشەندى كۇتۋ, سونداي-اق, العاشقى مەديتسينالىق كومەك كورسەتۋ, اتۋ جانە دەنە شىنىقتىرۋ دايىندىعى جانە پاركتىك-شارۋاشىلىق جۇمىستاردى جۇرگىزۋ كەزىندە قاۋىپسىزدىك شارالارىن ساقتاۋ بويىنشا ساباقتار وتكىزىلدى.
جاڭا وقۋ كەزەڭى مامىر ايىنا دەيىن جالعاسادى.
باتىس قازاقستان وبلىسى