تۇركىستان وبلىسىندا پوليتسيا جارىلعىش زات تۋرالى جالعان حابارلاما تاراتقان كامەلەتكە تولماعان بالانى تاپتى, دەپ حابارلايدى Egemen.kz.
تۇركىستان وبلىسىندا پوليتسياعا بەلگىسىز ادامنان قوڭىراۋ كەلىپ ءتۇستى. وندا جەتىساي اۋدانى وقۋ ورىندارىنىڭ بىرىندە جارىلعىش قۇرىلعى قويىلعانى تۋرالى حابارلانعان. وقيعا ورنىنا شۇعىل تۇردە ارنايى قىزمەتتەر جۇمىلدىرىلىپ, وقۋشىلار مەن مەكتەپ اكىمشىلىگىن ەۆاكۋاتسيالادى. تەكسەرۋ كەزىندە حابارلاما جالعان بولىپ شىققانى انىقتالدى.
جەدەل-ىزدەستىرۋ ءىس-شارالارى بارىسىندا تۇركىستان وبلىسىنىڭ پوليتسەيلەرى جارىلعىش قۇرىلعى تۋرالى حابارلاعان كامەلەتكە تولماعان 11-سىنىپ وقۋشىسىنىڭ جەكە باسىن انىقتادى. قازىرگى ۋاقىتتا وقيعانىڭ بارلىق ءمان-جايلارىن انىقتاۋعا باعىتتالعان قاجەتتى ءىس-شارالار جۇرگىزىلىپ جاتىر.
ەستەرىڭىزگە سالا كەتەيىك, تەرروريزم اكتىسى تۋرالى كورىنەۋ جالعان اقپارات تاراتقانى ءۇشىن ايىپپۇل نە سول مولشەردە تۇزەۋ جۇمىستارىمەن, سونداي-اق بەس جىلعا دەيىنگى مەرزىمگە شەكتەۋ نەمەسە باس بوستاندىعىنان ايىرۋ تۇرىندە جازا قاراستىرىلعان. 14 جاسقا تولعان ادامدار بۇل قىلمىس ءۇشىن قىلمىستىق جاۋاپكەرشىلىككە تارتىلادى. سول سەبەپتى پوليتسيا مەكتەپ وقۋشىلارىن قاتاڭ ەسكەرتەدى. مۇنداي قۇقىق بۇزۋشىلىقتارعا زاڭمەن تىيىم سالىنادى.
سونداي-اق سوت شەشىمى نەگىزىندە شىعىندار مەن وسىنداي حابارلامادان كەلتىرىلگەن بارلىق شىعىن وتەلۋى ءتيىس. ەگەر مۇنداي ارەكەتتەردى كامەلەتكە تولماعاندار جاساعان جاعدايدا, زالالدى وتەۋ ولاردىڭ اتا-انالارىنا نەمەسە زاڭدى وكىلدەرىنە جۇكتەلەدى.