باتىس قازاقستان وبلىسىنىڭ قازتالوۆ اۋدانىندا 16 اۋىلدىق وكرۋگ, ۇلكەندى-كىشىلى 47 ەلدى مەكەن بار. بيىل وسى اۋىلداردىڭ باسىم كوپشىلىگىندە قۇرىلىس قىزۋ ءجۇرىپ جاتىر.
بۇل – حالىقتىڭ ءال-اۋقاتىن جاقسارتۋ ماقساتىندا ەلىمىزدە جۇزەگە اسىپ جاتقان بىرقاتار مەملەكەتتىك باعدارلامانىڭ ناتيجەسى. اۋىلداعى اعايىن دا وسىنداي تۇرعىن ءۇي باعدارلامالارىنىڭ يگىلىگىن كورىپ وتىر. ماسەلەن, تەك قازتالوۆ اۋدانىندا عانا بيىلدىڭ وزىندە 55 وتباسى جاڭا باسپاناعا كىرىپ, قونىستويىن تويلادى.
مەملەكەت باسشىسى قاسىم-جومارت توقاەۆ اتىراۋدا وتكەن ۇلتتىق قۇرىلتايدا: «باسپانا – جۇرتتىڭ تۇرمىس ساپاسىن تانىتاتىن تاعى ءبىر ماڭىزدى كورسەتكىش. بيىل 1 ناۋرىزدان باستاپ ىسكە قوسىلعان «وتاۋ» يپوتەكالىق باعدارلاماسى ەل ىشىندە ۇلكەن سۇرانىسقا يە بولىپ وتىر. بۇعان قوسا, اۋىل جانە اۋدان ورتالىعىنىڭ تۇرعىندارىنا ارنالعان جاڭا تۇرعىن ءۇي باعدارلاماسىن قولعا الۋ كەرەك. بۇل رەتتە الەۋمەتتىك تۇرعىدا وسال توپتاعى جاندارعا نەسيە ءوسىمى 7 پايىزدان اسپاۋى قاجەت. سونىمەن قاتار ساتىپ الۋ قۇقىعىمەن جالعا بەرىلەتىن باسپانا سانىن بىرنەشە ەسە كوبەيتۋدى ۇكىمەتكە تاپسىرامىن», دەگەن ەدى.
مىنە, پرەزيدەنتتىڭ وسى تاپسىرماسىنا سايكەس ونەركاسىپ جانە قۇرىلىس ءمينيسترى 2023 جىلعى 22 جەلتوقساندا «رەسپۋبليكالىق بيۋدجەت ەسەبىنەن تۇرعىن ءۇي سالۋدى, ساتىپ الۋدى قارجىلاندىرۋ نەمەسە مەملەكەتتىك باعالى قاعازدار شىعارۋ, تۇرعىن ۇيگە مۇقتاج قازاقستان رەسپۋبليكاسىنىڭ ازاماتتارىنا تۇرعىن ءۇيدى مونيتورينگىلەۋ جانە وتكىزۋ قاعيدالارى» تۋرالى بۇيرىق شىعارعان. ءدال وسى قاعيداعا سايكەس بيىل قازتالوۆ اۋدانىندا حالىقتىڭ الەۋمەتتىك وسال توپتارىن تۇرعىن ۇيمەن قامتۋ ماقساتىندا 142 تۇرعىن ءۇيدىڭ قۇرىلىسى باستالعان ەدى. بۇل تۇرعىن ۇيلەردى ساتىپ الۋعا رەسپۋبليكالىق, وبلىستىق بيۋدجەت ەسەبىنەن قاراجات ءبولىندى.
– قازىرگى تاڭدا اۋداندا سالىنىپ جاتقان 1 پاتەردىڭ قۇنى – 15,5 ملن تەڭگە. اۋىلداعى ەكى پاتەرلى تۇرعىن ءۇي 31,0 ملن تەڭگەگە شىعادى. ءبىزدىڭ قازتالوۆ اۋدانىندا تۇرعىن ءۇي سالۋعا 46 جەكە ينۆەستور تارتىلعان. قازىر 28 ەلدى مەكەندە قۇرىلىس جۇمىسى ءجۇرىپ جاتىر. قۇرىلىس ساپاسىن باقىلاۋ ماقساتىندا بارلىق اۋىلدىق وكرۋگتە وندىرىستىك جۇمىس كەستەسى بەكىتىلگەن. جەرگىلىكتى قوعام وكىلدەرى ارنايى جۇمىس توبىن قۇرىپ, قۇرىلىس بارىسىن قاداعالاپ وتىر. جاڭا ۇيلەر قازىرگى زامان تالابىنا ساي. جۇمىستى نەگىزىنەن جەرگىلىكتى ينۆەستورلار مەن ماماندار اتقارىپ جاتىر. جالپى, جوسپار بويىنشا اۋداندا 28 ەلدى مەكەندە 76 تۇرعىن ءۇي, 142 پاتەر سالۋىمىز كەرەك, دەيدى اۋدان اكىمى اسلانبەك سارقۇلوۆ.
اۋىلدا, شالعاي ەلدى مەكەندەردە جاڭا تۇرعىن ۇيلەردىڭ سالىنۋى – مەملەكەتتىڭ اۋىلعا كوڭىل ءبولىپ وتىرعانىنىڭ ايقىن كورىنىسى. باسپانالى بولعان اۋىلدىقتاردىڭ قۋانىشىندا شەك جوق.
– جاڭا ۇيلەر اۋىلدىڭ تىنىسىن اشا تۇسكەندەي. ءبىر جاعىنان اۋىل جاڭارىپ, اجارى كىرەدى, ەكىنشى جاعىنان اۋىلىمىز وسەدى, كەڭەيەدى. اۋدان اكىمدەرى حالىقپەن كەزدەسكەندە ءجيى ايتىلاتىن ماسەلەنىڭ ءبىرى وسى – باسپانا. سوڭعى كەزدەرى بۇل دا شەشىمىن تاۋىپ, حالىقتىڭ قۋانىشى ەسەلەنىپ وتىر. قازىر مەملەكەتتىك باعدارلاما ارقىلى سالىنعان ۇيلەر اۋىلداعى اعايىنعا دەم بەرىپ, جەكە تۇرعىن ۇيلەردىڭ دە كەلبەتى كەلىسكەن جايى بار, دەدى قازتالوۆ اۋىلىنىڭ تۇرعىنى مارات توياسوۆ.
ال جاڭاتاڭ ەلدى مەكەنىندەگى كوپبالالى سيسەنوۆتەر اۋلەتى باسپانا كىلتىن وبلىس اكىمى ناريمان تورەعالي ۇلىنىڭ ءوز قولىنان الدى.
– قازىر شەكارالىق ايماقتارعا, اۋىلدار مەن ەلدى مەكەندەرگە ەرەكشە نازار اۋدارىلىپ, بىرقاتار جوبا جۇزەگە اسىپ جاتىر. سونىڭ ءبىرى – «قالادان – اۋىلعا» وڭىرلىك باعدارلاماسى. وسى باعدارلاما ارقىلى قازتالوۆ اۋدانىنىڭ جاڭاتاڭ ەلدى مەكەنىنە كوشىپ كەلگەن العاشقى وتباسىمىز. بىزگە كەلگەن بويدا ۋاقىتشا تۇرعىن ءۇي بەرىلدى. قورامىزعا مال كىردى. قازىر سول ءتورت ت ۇلىكتىڭ يگىلىگىن كورىپ وتىرمىز. تۇراقتى جۇمىسقا دا ورنالاستىق. وزەگىنەن تەپپەي, قۇشاق جايا قارسى العان اۋىل حالقىنا العىسىمىز شەكسىز. وسى ورايدا وبلىس, اۋدان باسشىلىعىنا حالىقتىڭ ءال-اۋقاتىن ارتتىرۋ ماقساتىندا يگى جوبانى جۇزەگە اسىرىپ, كورسەتكەن قولداۋىنا رازىلىعىمىزدى بىلدىرەمىن, دەيدى ايات سيسەنوۆ.
جاقىندا ماجىلىستە 2025–2027 جىلدارعا ارنالعان ءۇش جىلدىق بيۋدجەت تالقىلانعانى, سونىڭ ىشىندە باتىس قازاقستان وبلىسىنىڭ ينجەنەرلىك, كولىك جانە الەۋمەتتىك ينفراقۇرىلىمىن دامىتۋعا قوسىمشا 1,978 ملرد تەڭگە قاراجات بولىنگەنى حابارلانعان ەدى. مىنە, وسى قارجىنىڭ باسىم بولىگى دە قازتالوۆ اۋدانىنداعى بولاشاق, قازتالوۆ, قاراوبا, قوشانكول اۋىلدارىنىڭ ىشكى جولدارىن جاڭعىرتۋعا جۇمسالعالى وتىر.
«استاناعا ارنايى كەلىپ, ءوز اۋدانىنا قاتىستى جوبالاردىڭ قاجەتتىلىگىن دالەلدەپ, وسىنداي قارجىنىڭ بولىنۋىنە ىقپال ەتكەن قازتالوۆ, جانىبەك, بوكەيورداسى اۋداندارىنىڭ اكىمدەرىنىڭ بەلسەندىلىگىن اتاپ وتەر ەدىم. ويتكەنى بيۋدجەتتى قورعاۋ بارىسىندا اتقارۋشى ورگان وكىلدەرىنىڭ دەپۋتاتتارمەن بىرگە بولۋى وتە ماڭىزدى», دەيدى ءماجىلىس دەپۋتاتى ابزال قۇسپان.
وسى جاڭالىقتى ەستىگەلى الداعى جىلدارى دا قازتالوۆ اۋدانىنىڭ ەلدى مەكەندەرى جاڭعىرىپ, جايناي تۇسەتىنىنە سەنىپ وتىرمىز.
باتىس قازاقستان وبلىسى