كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ 2015-2019 جىلدارعا ارنالعان «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن جۇزەگە اسىرۋ بارىسىنا ارنالعان كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
باعدارلاما شەڭبەرىندە ەلدىڭ ىشكى رىنوگىن, ترانزيتتىك جانە ەكسپورتتىق الەۋەتتى ۇلعايتۋعا, سونداي-اق, ينفراقۇرىلىمدى دامىتۋعا باعىتتالعان باسىمدىقتى جوبالار جۇزەگە اسىرىلاتىن بولادى. قازىرگى ۋاقىتتا «باتىس ەۋروپا – باتىس قىتاي» ءاۆتودالىزىنىڭ, استانا – الماتى, استانا – وسكەمەن, قىزىلوردا – جەزقازعان – قاراعاندى, استانا – اقتوبە – اتىراۋ – اقتاۋ, الماتى – وسكەمەن تراسسالارىنىڭ ۋچاسكەلەرىندە قۇرىلىس جۇمىستارى جۇرۋدە. تەمىرجول سالاسى مەن كولىك لوگيستيكاسى جوبالارى بويىنشا دا جۇمىستار جۇزەگە اسىرىلۋدا. اتاپ ايتقاندا, الماتى-1 – شۋ تەمىرجول ۋچاسكەسىندە ەكىنشى جول قۇرىلىسى ءۇشىن قازىردىڭ وزىندە توپو-گەودەزيالىق جانە ينجەنەرلىك-گەولوگيالىق زەرتتەۋلەر جۇرگىزىلۋدە.
بورجاقتى – ەرساي جەلىسىنىڭ قۇرىلىسى جۇرۋدە, قۇرىق پورتىندا پارومدى وتكەل سالۋ جوباسى بويىنشا مەملەكەتتىك ساراپتاما قورىتىندىسى الىندى, گەودەزيالىق جانە ينجەنەرلىك-گەولوگيالىق زەرتتەۋلەر جۇرگىزىلۋدە. استانا قالاسى اۋەجايىنىڭ ۇشۋ-قونۋ جولاعى مەن تەرمينالىن قايتا جاڭعىرتۋ بويىنشا جۇمىستار اتقارىلۋدا. قازاقستاندا اەا مەن يندۋستريالىق پاركتەردى دامىتۋعا, تۇرعىن ءۇي, مەكتەپتەر مەن بالاباقشالار سالۋعا, ەلىمىزگە كەلەتىن جانە سىرتقا شىعاتىن ءتۋريزمدى ودان ءارى دامىتۋ ءۇشىن ينفراقۇرىلىمدار جاساۋعا, اوك سۋبەكتىلەرىن, وتاندىق اۆتوموبيلدەر, تىكۇشاقتار, جولاۋشىلار ۆاگوندارىن جاساۋشىلاردى قولداۋعا باعىتتالعان قارجىلار يگەرىلۋدە.
كەڭەس قورىتىندىسى بويىنشا باقىتجان ساعىنتاەۆ مينيسترلىكتەرگە, وبلىستار, استانا جانە الماتى قالالارى اكىمدەرىنە قارقىندى باسەڭسىتپەي, 2015-2019 جىلدارعا ارنالعان «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن جۇزەگە اسىرۋ جونىندەگى ءىس-شارالار جوسپارىنىڭ ۋاقتىلى جۇزەگە اسۋىن قامتاماسىز ەتۋدى, سونداي-اق, ۆەدومستۆوارالىق ءىس-قيمىلدى جانە قارجىنىڭ ءتيىمدى يگەرىلۋىنە باقىلاۋ جاساۋدى كۇشەيتۋدى تاپسىردى.