ماڭعىستاۋ وبلىسىندا قاتتى جەل مەن نوسەر جاڭبىر سالدارىنان 100-دەن استام جىلقى قىرىلدى, دەپ حابارلايدى Egemen.kz.
جەرگىلىكتى اكىمدىكتىڭ حابارلاۋىنشا, سايوتەس پەن جەتىنشى رازەزد اراسىنداعى, اۋدان ورتالىعىنان 120-150 شاقىرىم قاشىقتىقتا ورنالاسقان اۋماقتا جىلقىلاردىڭ قىرىلۋ دەرەكتەرى انىقتالعان. بۇل تۋرالى العاش بولىپ الەۋمەتتىك جەلىلەردە مالىنان ايىرىلعان جەرگىلىكتى تۇرعىندار حابارلاعان.
جىلقى كوبەيسە – ەل ىرىسى
جاعدايدى باعالاۋ ءۇشىن مەملەكەتتىك ورگاندار وكىلدەرىنىڭ قاتىسۋىمەن ارنايى كوميسسيا قۇرىلدى.
«كوميسسيا شارۋا قوجالىقتارىنىڭ يەلەرىمەن بىرلەسىپ جۇمىستى جالعاستىرىپ جاتىر. اۋىل شارۋاشىلىعى جانۋارلارىن سايكەستەندىرۋ بازاسىندا تىركەلگەن قىرىلعان مالعا وتەماقى تولەۋ ماسەلەسى قولدانىستاعى زاڭناما اياسىندا قارالادى. شەشىمدى توتەنشە جاعدايلار, اۋىل شارۋاشىلىعى جانە ۆەتەريناريا سالاسىنداعى ۋاكىلەتتى ورگاندار قابىلدايدى», دەپ حابارلادى اۋداندىق ىشكى ساياسات ءبولىمى.
جەرگىلىكتى اتقارۋشى ورگاندار قىرىلعان مالدىڭ ناقتى سانىن انىقتاپ جاتىر, ويتكەنى مال يەلەرى ازىرگە تولىق ەسەپ جۇرگىزە الماي وتىر.
جىلقى جالىنداعى جىل
جىلقىلار قاتتى جەل مەن نوسەر جاڭبىر سالدارىنان قىرىلعان. جەدەل ارەكەت ەتۋ ءۇشىن بەينەۋ اۋدانىنان اقشىمىراۋ اۋىلىنا «ترەكول» جول تالعامايتىن كولىگى جىبەرىلدى, جوعالعان مالدى ىزدەۋ ءۇشىن دروندار ارقىلى اۋەدەن باقىلاۋ ۇيىمداستىرىلدى. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى ماڭعىستاۋ اۋدانىندا بولىپ, تۇرعىندارمەن كەزدەسۋلەر وتكىزىپ, بارلىق قاجەتتى جۇمىستاردى ۇيلەستىرىپ جاتىر.
«وقيعانىڭ سالدارىن جويۋ ءۇشىن بارلىق كۇش پەن قۇرال جۇمىلدىرىلدى. سۋدى سورۋ جانە قالپىنا كەلتىرۋ جۇمىستارى كۇشەيتىلگەن رەجيمدە جالعاسادى. جاعداي ەرەكشە باقىلاۋدا», دەپ حابارلادى ماڭعىستاۋ اۋدانى اكىمدىگى.