باتىس قازاقستان وبلىسىنىڭ تاسقالا اۋدانى ورتالىعىندا 320 ورىندىق دەنە شىنىقتىرۋ-ساۋىقتىرۋ كەشەنى اشىلىپ, كەڭەس وداعىنىڭ باتىرى سادىق جاقسىعۇلوۆتىڭ تۋعانىنا 100 جىل تولۋىنا وراي قازاق كۇرەسىنەن حالىقارالىق تۋرنير ءوتتى.
جاڭا كەشەن اۋىل تۇرعىندارىنىڭ ءتۇرلى سپورت تۇرلەرىمەن اينالىسۋىنا تولىق مۇمكىندىك بەرەدى. مۇندا زاماناۋي سپورتتىق جابدىقتار, جاتتىعۋ الاڭدارى, ترەناجەرلىك زال, مەديتسينالىق كابينەت بار, گيمناستيكا, كۇرەس, باسكەتبول, ۆولەيبول, فۋتبول الاڭدارى جاساقتالعان. جانە ءبىر قۋانىش – «تاسقالا اۋداندىق سپورت كلۋبى» مەملەكەتتىك كوممۋنالدىق قازىنالىق كاسىپورنىنا وبلىس اكىمى ناريمان تورەعالي ۇلىنىڭ اتىنان جاڭا ميكرواۆتوبۋستىڭ كىلتى ۇسىنىلدى.
كەڭەس وداعىنىڭ باتىرى سادىق جاقسىعۇلوۆتىڭ قۇرمەتىنە ارنالعان تۋرنير تاسقالا وڭىرىندە تالاي جىلدان بەرى ءداستۇرلى ءوتىپ كەلەدى. بيىلعى تۋرنيردە اقمولا, الماتى, اباي, تۇركىستان, جامبىل, قاراعاندى, ماڭعىستاۋ, اقتوبە, اتىراۋ, باتىس قازاقستان وبلىسى مەن اقجايىق, بايتەرەك, ءبورلى, جاڭاقالا, جانىبەك, قازتالوۆ, تەرەكتى, شىڭعىرلاۋ, سىرىم, تاسقالا اۋداندارىنىڭ پالۋاندارى ونەر كورسەتتى. جارىستىڭ باس تورەشىسى – قازاق كۇرەسىنەن ۇلتتىق دارەجەدەگى تورەشى دامير رامازانوۆ بولدى. بوز كىلەمدە الماتىلىق رۋسلان ابدرازاقوۆ, عالىمجان قىرىقباي, ابايلىق سايات شامشيەۆ, ماڭعىستاۋلىق نۇرداۋلەت جارىلعاپوۆ, تارازدىق ايدار بەسكەمپىر سەكىلدى اتاعىنان ات ۇركەتىن پالۋاندار بەلدەستى. «وگىز پالۋان» سايىسىنا 22 پالۋان تىركەلىپ, اقتىق سىنعا تارازدىق ايدار بەسكەمپىر مەن سىرىمدىق نۇرسۇلتان مىرزاحمەتوۆ شىقتى. اسا تارتىستى بەلدەسۋدەن كەيىن جەڭىس تارازدىق پالۋانعا بەرىلدى.
اسا اۋىر سالماقتاعى پالۋاندار اراسىندا اقتىق اينالىمعا ءتورت پالۋان: قازتالوۆتىق ەرنازار حامزين, الماتىلىق رۋسلان ابدرازاقوۆ, ماڭعىستاۋلىق نۇرداۋلەت جارىلعاپوۆ, اتىراۋلىق سۇڭعات زاكارياەۆ شىقتى. بۇل تورتەۋى دە «قازاقستان بارىسى» رەسپۋبليكالىق تۋرنيرىنە قاتىسىپ جۇرگەن پالۋاندار. فينالدىق باسەكەدە نۇرداۋلەت پەن ەرنازار كەزدەستى. ءسويتىپ, ءتۋرنيردىڭ باس جۇلدەسى – اۆتوكولىك ماڭعىستاۋعا جول تارتتى.
جارىستىڭ جابىلۋ سالتاناتىندا اۋداننىڭ اتىمتاي جومارت ازاماتتارى سامبودان الەم چەمپيونى تەمىرلان كولباي مەن جۋىردا تاشكەنت قالاسىندا وتكەن ەرەسەكتەر اراسىندا IMMAF جەكپە-جەك سپورت تۇرىنەن الەم بىرىنشىلىگىنىڭ كۇمىس جۇلدەگەرى قادىربەك شىنباەۆقا ات مىنگىزدى. 90 كگ دەيىنگى سالماقتا ونەر كورسەتىپ, ءتۋرنيردىڭ جەڭىمپازى اتانعان تارازدىق ايبار بەسكەمپىرگە 1 ملن تەڭگە اقشالاي سىيلىق تابىستالدى.
باتىس قازاقستان وبلىسى