ءوڭىر اكىمى نۇرداۋلەت قيلىبايدىڭ وكىمىمەن وبلىستىق تۋريزم باسقارماسىنىڭ باسشىسى قىزمەتىنە ەرسىن يبراشەۆ تاعايىندالدى, دەپ حابارلايدى Egemen.kz.
وبلىس اكىمدىگىنىڭ ءباسپاسوز قىزمەتى ءمالىم ەتكەندەي, جاڭا باسقارما باسشىسىن ۇجىمعا وبلىس اكىمىنىڭ ورىنباسارى اببات ورىسباەۆ تانىستىردى.
ەرسىن يبراشەۆ 1989 جىلى تۋعان. 2013 جىلى قىتاي مۇناي ۋنيۆەرسيتەتىن مۇناي-گاز ءىسى ماماندىعى بويىنشا جانە 2019 جىلى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن حالىقارالىق قاتىناستار ماماندىعى بويىنشا اياقتاعان.
ەڭبەك جولىن 2014 جىلى ينجەنەر-تەحنولوگ بولىپ باستاپ, 2015-2016 جىلدارى جەكە كومپانيالاردا باسشىلىق لاۋازىمىن اتقارعان.
2017 جىلى «مۇناي جانە گاز اقپاراتتىق-تالداۋ ورتالىعى» اق تالداۋ جانە جوبالاردى باسقارۋ دەپارتامەنتىنىڭ مەنەدجەرى بولدى.
2018 جىلى ۇلتتىق ەكونوميكا مينيسترلىگى سالىق جانە كەدەن ساياساتى دەپارتامەنتى جەر قويناۋىن پايدالانۋ كەلىسىمشارتتارىن ساراپتاۋ باسقارماسىنىڭ باس ساراپشىسى قىزمەتىن اتقارعان.
2019 جىلى ۇلتتىق ەكونوميكا مينيسترلىگى جوبالاۋدى باسقارۋ دەپارتامەنتى جوبالاۋدى باسقارۋ جونىندە مەملەكەتتىك ورگانداردى ۇيلەستىرۋ باسقارماسىنىڭ باس ساراپشىسى, ال, 2020 جىلى باسشىسى لاۋازىمىن اتقاردى. 2021 جىلى اتالعان دەپارتامەنتتىڭ مەملەكەتتىك ورگانداردى جوبالىق باسقارۋ بويىنشا ۇيلەستىرۋ جانە قولداپ وتىرۋ باسقارماسىنىڭ باسشىسى بولدى.
2023 جىلدان وسى ۋاقىتقا دەيىن قازاقستان رەسپۋبليكاسى ۇلتتىق ەكونوميكا مينيسترلىگى ىشكى اكىمشىلەندىرۋ دەپارتامەنتى ديرەكتورىنىڭ ورىنباسارى قىزمەتىن اتقاردى.