اۋىلىمىز كوپ جىلدىق تاريحى بار كونە اۋىلداردىڭ بىرىنەن سانالادى. وسى قۇتتى دا كيەلى مەكەندە كوپتەگەن ۇلت وكىلدەرى تاتۋ-ءتاتتى ءومىر ءسۇرىپ كەلەدى. سوناۋ سۇراپىل سوعىس جىلدارىندا ءبىر ءۇزىم ناندى ءبولىپ جەپ, ءبىر-بىرىنە دەمەۋ بولعان قويانقۇستىقتار بۇگىندە وزدەرىنىڭ بىرلىگىن كورسەتىپ, باتىر اتالارىنىڭ ارۋاعىنا ارناپ ۇلكەن يگىلىكتى شارا وتكىزدى.
جەڭىستىڭ 70 جىلدىعىنا وراي اۋىل جۇرتشىلىعى سوعىستا قۇربان بولعان اتا-بابالارىنىڭ ارۋاعىنا ارناپ ەسكەرتكىش تاقتا ورناتىپ, جاۋىنگەرلەردىڭ ۇرپاقتارى قايىرىمدىلىق اس بەردى. بۇل قۋانىشتى اۋدانىمىزدىڭ اكىمى ق.مەدەۋوۆ اۋىلداستارىمىزبەن بىرگە ءبولىستى. ەسكەرتكىشكە وسى اۋىلدان سوعىسقا اتتانعان ازاماتتاردىڭ ەسىمدەرى ويىپ جازىلعان. ولاردىڭ قوشىن باستاپ, اۋدانىمىزدىڭ قۇرمەتتى ازاماتى 95 جاستاعى ارداگەر جۇماعالي الىباەۆ تۇر. بۇل تاريحي مۇرانىڭ وسى اۋىلدىڭ ءبىلىم وشاعى №1 ورتا مەكتەبىنىڭ اۋلاسىندا ورنالاسۋى دا وسكەلەڭ ۇرپاققا ۇلكەن پاتريوتتىق ءتالىم-تاربيە بەرىپ تۇر. جاس ۇرپاق ولارعا باس ءيىپ, ەسىمدەرىن ەشقاشان ۇمىتپايدى.
باتىرلار مەموريالى, ارينە, كوپشىلىكتىڭ قولداۋىمەن ورناتىلدى. بۇل ورايدا, ەڭ الدىمەن اۋىلدىڭ اقساقالدار القاسىنىڭ توراعاسى جۇماتاي نوعايباەۆتىڭ باسقارۋىمەن س.باتىروۆا مەن ا.قاسەنوۆ سياقتى ازاماتتار وراسان زور ۇلەس قوستى. ال ءوزىنىڭ ون جىلدىق تاريحى بار ءبىلىم مەكەمەسى – №1 ورتا مەكتەپ ۇجىمىنىڭ ەڭبەگى ءتىپتى ەرەكشە بولدى. جينالعان اۋىل جۇرتشىلىعى وسى ۇجىمعا جاس ۇرپاق الدىندا بەرگەن تاربيەلەرى ءۇشىن العىس ايتتى.
– جاستارىمىز وسى اۋىلدان شىققان باتىرلارىمىزدى ۇمىتپايدى.ولاردىڭ ەرلىكتەرىن ۇرپاقتان ۇرپاققا جاستار وزدەرى ايتىپ جۇرەدى.سوندىقتان دا مەموريال تاقتانى وسى مەكتەبىمىزدىڭ اۋلاسىنا ورناتتىق, – دەيدى مەكتەپ ديرەكتورى گ.كولباەۆا.
بۇگىنگى كۇنى باتىرلاردىڭ جارقىن بەينەسى جانىندا جاس ۇرپاقتار گۇل شوقتارىن قويىپ, تاعزىم ەتۋدە.
بەكزات سادىقوۆا,
№1 ورتا مەكتەپتىڭ
باستاۋىش سىنىپ مۇعالىمى.
الماتى وبلىسى,
ىلە اۋدانى,
قويانقۇس اۋىلى.