الماتىدا العاش رەت 9-سىنىپتان باستاپ بالالاردى قۇتقارۋشى ماماندىعىنا ۇيرەتەتىن «جاس قۇتقارۋشى» سىنىبى اشىلدى. جەتىسۋ اۋدانىنداعى №87 جالپى ءبىلىم بەرەتىن مەكتەپتە اشىلعان جاڭا سىنىپ ءدارىسى قۇتقارۋشىلار كۇنىنەن باستاۋ الدى.
سىنىپتا وقۋشىلار ءورت, جەر سىلكىنىسى, سۋعا ءتۇسۋ ماۋسىمىنداعى ورىن الاتىن وقىس وقيعالار بارىسىندا قالاي ارەكەت ەتۋدى ۇيرەنەدى. ەڭ باستىسى, جەتكىنشەكتەر جاستايىنان جەكە ومىرىنە, قوعامدىق قاۋىپسىزدىك ماسەلەسىنە جاۋاپكەرشىلىكپەن قاراۋعا, توتەنشە جاعدايدا پايداسى تيەتىن تاجىريبەلىك داعدىلارعا ماشىقتانادى.
«بۇل – بولاشاق وتان قورعاۋشىلاردى تاربيەلەۋدە جاڭا كەزەڭنىڭ باستالعانىن بىلدىرەتىن ماڭىزدى قادام. وقۋشىلار جاس قۇتقارۋشىلار انتىن قابىلداپ, وزدەرىنە ەلىن, قورعاۋ, توتەنشە جاعدايدا قاۋىپسىزدىك شاراسىن ساقتاۋ جاۋاپكەرشىلىگىن جۇكتەدى. بالالارعا ساتتىلىك تىلەيمىز. ولاردىڭ قوعام دامۋىنا ۇلەس قوساتىن تۇلعا بولىپ قالىپتاساتىنىنا سەنەمىز», دەدى جەتىسۋ اۋدانىنىڭ اكىمى ءلاززات جىلقىباەۆا.
سىنىپتىڭ سالتاناتتى اشىلۋ راسىمىندە كەلۋشىلەرگە جول تالعامايتىن موتوكولىك, قاردا جۇرەتىن كولىك, كۆادروتسيكل, جەدەل ارەكەت ەتەتىن ءورت ءسوندىرۋ ماشيناسى سىندى قۇتقارۋشىلاردىڭ تەحنيكاسى مەن جابدىقتارىنىڭ كورمەسى ۇيىمداستىرىلدى.
«جاس قۇتقارۋشى» سىنىبى وسكەلەڭ ۇرپاقتىڭ ءوز باسىنا عانا ەمەس, قوعامدىق قاۋىپسىزدىك ماسەلەسىنە سانالى دا جاۋاپكەرشىلىكپەن قاراۋدى قالىپتاستىرۋدى, تۇراقتى تاجىريبەلىك داعدىلاردى مەڭگەرۋدى, توتەنشە وقيعالار كەزىندە جىلدام ارەكەت ەتۋ قابىلەتىن دامىتۋدى كوزدەيدى. بولاشاقتا جاس قۇتقارۋشىلار ازاماتتىق قورعاۋ ورگاندارى قىزمەتكەرلەرىنىڭ قاتارىن تولىقتىرادى دەپ ۇمىتتەنەمىز», دەدى الماتى قالاسى توتەنشە جاعدايلار دەپارتامەنتىنىڭ باسشىسى نۇرلان اتىعاەۆ.
الماتى