بەدەۋلىك ماسەلەسىن كوتەرگەن كونگرەسس رەكوردتىق كورسەتكىشكە قول جەتكىزدى

كەزەكتى كونگرەسس قاتىسۋشىلار سانى جاعىنان رەكوردىق كورسەتكىشكە جەتتى, دەيدى ساراپشىلار. 23 ەلدەن كەلگەن  700-دەن استام دەلەگات كونفەرەنتسيا زالىنان تابىلىپ, 5 مىڭنان استام ادام ونلاين-رەجيمدە قاتىستى. 19 ەلدىڭ ساراپشىلارى بايانداما جاساپ, وسى سالانىڭ بەلدى ماماندارى قازاقستانداعى ارىپتەستەرىمەن بىرگە بەدەۋلىكتى ەمدەۋ ادىستەرى مەن قولجەتىمدىلىگىن تالقىلاپ, وزىق تاجىريبەلەر مەن سوڭعى عىلىمي جەتىستىكتەردى ورتاعا سالدى.

كونگرەسس جۇمىسىنا ەلىمىزدىڭ جەتەكشى عىلىمي جانە كلينيكالىق ورتالىقتارىنىڭ باسشىلارى, اكۋشەر-گينەكولوگ دارىگەرلەر, ەقۇ ورتالىقتارىنىڭ وكىلدەرى, بەدەۋلىكتى ەمدەيتىن اندرولوگتار, ەندوكرينولوگتار, ەمبريولوگتار, حيرۋرگتار, گەنەتيكتەر مەن مولەكۋلالىق بيولوگتار – قازاقستان, گرۋزيا, رەسەي, بەلارۋس, وزبەكستان, قىرعىزستاننىڭ, اقش, سەربيا, يزرايل, يتاليا, گەرمانيا, تۇركيا مەن رۋمىنيانىڭ جەتەكشى ماماندارى قاتىستى.

ءىس-شارانى قازاقستان رەپرودۋكتيۆتى مەديتسينا قاۋىمداستىعى قازاقستان رەسپۋبليكاسىنىڭ دەنساۋلىق ساقتاۋ مينيسترلىگىنىڭ قولداۋىمەن ۇيىمداستىردى. قازاقستان رەپرودۋكتيۆتى مەديتسينا قاۋىمداستىعى (كارم) 2008 جىلى 2 قازاندا تمد مەن ەۋروپا ەلدەرىندەگى قاۋىمداستىقتارىنىڭ ۇلگىسىمەن قۇرىلعان ەدى. اكۋشەر-گينەكولوگتار, اندرولوگتار, ەمبريولوگتار, گەنەتيكتەر, پسيحولوگتار مەن بەدەۋلىك ماسەلەسىمەن اينالىساتىن مامانداردى بىرىكتىرىپ وتىرعان كارم – ادام رەپرودۋكتسياسى جونىندەگى ەۋروپالىق كونسورتسيۋمنىڭ قاۋىمداستىرىلعان مۇشەسى.

بيىلعى كونگرەسس اياسىندا قرت ەمبريولوگياسىنىڭ وزەكتى ماسەلەلەرى, اكۋشەرلىك جانە گينەكولوگيا بويىنشا قازاقستان, يزرايل, پورتۋگاليا, يتاليا, رەسەي, بەلارۋس, جاپونيا, گرۋزيا جانە ءۇندىستان ماماندارىنىڭ قاتىسۋىمەن شەبەرلىك سىنىپتارى وتكىزىلدى.

بەلەڭ الىپ تۇرعان بەدەۋلىك  ماسەلەسىن شەشۋ ەلىمىزدەگى دەموگرافيالىق جاعدايىن دۇرىستاپ, ءتۇرلى سەبەپتەرمەن بالا سۇيە الماي جۇرگەن جۇپتاردىڭ كەلەشەگىنە يگى ىقپال ەتەدى.

ال زاماناۋي دياگنوستيكا ادىستەرى بەدەۋلىكتىڭ نەگىزگى سەبەپتەرىن ناقتى انىقتاپ, ءتيىمدى ەمدوم جۇرگىزۋگە جول اشىپ وتىر. بەدەۋلىكتىڭ شامامەن 40%-ى ەرلەردىڭ رەپرودۋكتيۆتىك جۇيەسىنىڭ پاتولوگياسىمەن بايلانىستى بولسا, 30%-ىندا ارالاس بەدەۋلىك (ەرلەر جانە ايەلدەر بەدەۋلىگى) بايقالادى.

كارم پرەزيدەنتى, قر ۇعا اكادەميگى, مەديتسينا عىلىمدارىنىڭ دوكتورى ۆياچەسلاۆ لوكشيننىڭ ايتۋىنشا, ەرلەر مەن ايەلدەردىڭ رەپرودۋكتيۆتىك دەنساۋلىق ماسەلەسى بۇرىنعىدان دا وزەكتى بولا تۇسكەن. پروفەسسور ۆ.لوكشين قازاقستاندا بەدەۋلىك پەن رەپرودۋكتيۆتىك جۇيەنىڭ باسقا دا كەسەلدەرى جيىلەپ, تومەندەمەي وتىرعانىن ايتادى.

«العاشقى جىلدارى تۇسىك جاساتۋ سانى ايتارلىقتاي تومەندەگەنىمەن, قازىرگى تاڭدا بۇل كورسەتكىش تۇراقتى جانە كوپشىلىك كونتراتسەپتسيانى اسا ءتيىستى قولدانا بەرمەيدى. سوندىقتان بەدەۋلىك دەڭگەيى 16-17% دەڭگەيىندە ساقتالىپ تۇر. ەرلەر بەدەۋلىگى, ايەلدەر بەدەۋلىگىنىڭ سەبەپتەرى اراسىندا جىنىستىق جولمەن بەرىلەتىن ينفەكتسيالاردان بولاتىن قابىنۋ اۋرۋلارى, تۇسىكتەر مەن باسقا دا فاكتورلار بار», دەيدى ۆياچەسلاۆ لوكشين.

پروفەسسور رەپرودۋكتيۆتىك جۇيەنىڭ بۇزىلۋىن بولدىرماۋ ماسەلەلەرىنىڭ ماڭىزدىلىعىن اتاپ ءوتتى. جىنىستىق ادەپتى ساقتاۋ, ەرتە دياگنوز قويۋ, وتباسىن دۇرىس جوسپارلاۋ, انتيۆيرۋس گورمونىن تەكسەرۋ قاجەتتىگىن العا تارتىپ وتىر.