مەديتسينادا ادام قولى مەن اقىلىنان اسقان قۇرال جوق دەسەك تە, وسى سالاداعى ىزدەنىستەر مەن تەحنيكالار ۇزدىكسىز دامىپ جاتقانى, ونىڭ يگىلىگىن وتانداستارىمىزدىڭ كورە باستاعانى قۋانتادى.
الماتىداعى №4 قالالىق كلينيكالىق اۋرۋحانادا حالىقارالىق شەبەرلىك ساباعى ءوتىپ, وتاندىق تراۆماتولوگتەر مەن ورتوپەدتەر تولىق اۆتوماتتاندىرىلعان ورتوپەديالىق جۇيەدە حيرۋرگيالىق وپەراتسيا جاساۋعا جاتتىقتى. تىزە بۋىندارىندا اۋىر كەسەلى بار ءتورت بىردەي ناۋقاسقا روبوتتىڭ كومەگىمەن ەندوپروتەزدەۋ جاسالدى. جۇيە تىزە بۋىندارىنا ارتروپلاستيكا جاساۋدا ستەرەوتاكتيكالىق قۇرىلعى رەتىندە قولدانىلدى. روبوت ناۋقاستىڭ مرت, كت سۋرەتتەرىن پايدالانۋ ارقىلى حيرۋرگكە وپەراتسيا الدىنداعى دايىندىقتى جوسپارلاۋعا كومەكتەسىپ, وپەراتسيا بارىسىندا ساراپتامالىق اقپاراتتار بەرىپ وتىرادى.
وتاندىق مەديتسيناداعى ايتۋلى ءسات, روبوتپەن العاشقىلاردىڭ ءبىرى بولىپ تىزە بۋىندارىنا وپەراتسيا جاساۋ باقىتى №4 قالالىق كلينيكالىق اۋرۋحاناسىنىڭ بولىمشە مەڭگەرۋشىسى ماناربەك اۋباكىروۆكە بۇيىردى. وپەراتسيا كەزىندە س.اسفەندياروۆ اتىنداعى قازۇمۋ تراۆماتولوگيا جانە ورتوپەديا كافەدراسىنىڭ پروفەسسورلىق-وقىتۋشىلىق قۇرامى مەن اۋرۋحانانىڭ جەتەكشى دارىگەرلەرى كەڭەس بەرىپ وتىردى.
«تىزە بۋىنىنىڭ 3-4 دەڭگەيدەگى دەفورماتسيالىق گونارتروزىمەن 10 جىلدان استام اۋىراتىن ناۋقاسقا وپەراتسيا جاسادىق. شىن مانىندە 3 نەمەسە 4 ساتىداعى گونارتروزدى ەمدەۋدىڭ جالعىز ءتيىمدى جولى – حيرۋرگيالىق وپەراتسيا بولعاندىقتان, الدىن الا تىزە بۋىنىنىڭ كومپيۋتەرلىك توموگرافياسى جاسالىپ, زەرتتەۋ دەرەكتەرى جۇيەگە جۇكتەلدى. روبوت بىزگە تىزەدەگى اۋىتقۋلاردى, يمپلانت ولشەمىن ەسەپتەپ بەرىپ, وپەراتسيا كەزىندە جۇيە تاپسىرمانى ءوزى ورىنداعانداي اسەر قالدىردى. روبوت ميلليمەترلىك دالدىكپەن وپەراتسيالىق ايماقتى كەسىپ العاندىقتان, وعان ماماندار ارالاسقان جوق. ياعني بۇل جوعارى مامانداندىرىلعان روبوتتاندىرىلعان تەحنولوگيا, سوندىقتان, ناۋقاس اياعىنا تەز تۇرادى, وپەراتسيادان كەيىنگى اۋىرسىنۋ بەلگىلەرى دە, جاراقاتى از بولادى», دەيدى م.اۋباكىروۆ.
№4 قالالىق كلينيكالىق اۋرۋحانا جەدەل, جوسپارلى حيرۋرگيالىق, تراۆماتولوگيالىق, نەيروحيرۋرگيالىق, كارديوحيرۋرگيالىق كومەكتىڭ تولىق تسيكلى بار مامانداندىرىلعان تراۆماتولوگيالىق ورتالىققا اينالىپ كەلەدى. اۋرۋحانادا رەۆيزيالىق ەندوپروتەزدەۋ جونىندەگى شەبەرلىك دارىستەرىمەن قاتار, جۇقپالى اسقىنۋ ماسەلەلەرى قارالىپ, تالقىلانىپ وتىرادى. اۋرۋحانا – ءىرى بۋىنداردى اۋىستىرۋدا جەتەكشى ورتالىق, وعان جىل سايىن وسى ەمحانادا جاسالاتىن 2 مىڭعا جۋىق بۋىن اۋىستىرۋ وپەراتسيالارى دالەل-دايەك. بۇعان دەيىن مۇندا جارتىلاي اۆتوماتتى جۇيەسى بار روبوت سىناقتان وتكەن بولاتىن.
الماتى