جاقىندا ورال قالاسىندا جاس جۇبايلاردىڭ ۇيلەنۋ تويىندا ادەمى ءبىر باستاماعا كۋا بولدىق. ماناربەك پەن ارايلىم ەسىمدى جۇپ توي قوناقتارىنا تابارىك رەتىندە كىتاپ تاراتتى.
سويتسەك, «وتباسى حرەستوماتياسى» سەرياسىمەن 2 مىڭ دانا بولىپ باسىلعان «ەر ەدىگە» اتتى كىتاپ ءدال وسى جاس جۇبايلاردىڭ قاراجاتىنا شىققان ەكەن. توي قارساڭىندا ماناربەك پەن ارايلىم ءوزارا اقىلداسىپ, ۇيلەنۋ تويىنا دەپ جيناعان قاراجاتىنىڭ ءبىر بولىگىن وسى كىتاپتى شىعارۋعا جۇمساپتى. كىتاپتىڭ اراسىندا قوس عاشىقتىڭ سۋرەتى بەينەلەنگەن تىلدەي قىستىرما دا ءجۇر. وندا «ماحابباتتىڭ ءمانى» كىتابىنان الىنعان «نەكەنىڭ ءمانى – تىرشىلىكتەن حيكمەت تابۋدا ءبىر-بىرىڭە اينىماس سەرىك بولۋ» دەگەن ءبىر اۋىز تسيتاتا جازىلعان.
شاڭىراق كوتەرىپ وتىرعان جۇبايلاردىڭ كىتاپقا, ادەبيەتكە قۇمارلىعى تەگىن ەمەس ەكەن. كۇيەۋ جىگىت ماناربەك جۇماباەۆ – ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن, ال ارايلىم ولجاحان – قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ فيلولوگيا فاكۋلتەتىن ۇزدىك بىتىرگەن. ونىڭ ۇستىنە ارايلىم وسى كىتاپتىڭ كوررەكتۋراسىن ءوز موينىنا الىپتى.
«جۇبايلىق ءومىردىڭ ماڭىزدى كۇنىنەن وسىنداي ءماندى ەستەلىك قالدىرۋدى ءجون كورگەن قوس عاشىقتىڭ شاڭىراعىندا ەر ەدىگەدەي ۇرپاق دۇنيەگە كەلسىن. ەكى جاستىڭ وسىنداي يگى ءىسى وزگە جاندارعا دا ونەگە بولسىن», دەدى وسى تويعا ارنايى كەلگەن «وتباسى حرەستوماتياسى» قوعامدىق قورىنىڭ ديرەكتورى باعدات قۇديار.
عۇلاما عالىم قانىش ساتباەۆتىڭ عىلىمي تالداۋىمەن جارىق كورگەن بۇل «ەر ەدىگە» كىتابى بۇرىنعى باسىلىمداردى قايتالامايدى. «الپامىس باتىر» جىرىن زامانعا لايىقتاپ شالقىما داستۇرىمەن قارا سوزگە تۇسىرگەن اقسەلەۋ سەيدىمبەكتىڭ, «ەر تارعىن» جىرىن قارا سوزگە اينالدىرعان مۇحتار ماعاۋيننىڭ جولىمەن «ەر ەدىگە» جىرى دا جاڭاشا تۇرلەنگەن. بۇرىننان بەلگىلى بىرنەشە جىر نۇسقاسى نەگىزگە الىنىپ, بۇگىنگى كۇننىڭ تىلدىك ەرەكشەلىكتەرىنە, ەملەسىنە لايىقتالعان, بىراق تۇپكى مازمۇنى, التىن وردا داۋىرىنە ءتان ستيليستيكاسى, باتىرلار جىرىنا ءتان رۋحى ساقتالعان جاڭا دۇنيە بولىپ شىققان.
ايتپاقشى, وتاۋ قۇرىپ جاتقان بالالارىنىڭ باستاماسىن ولاردىڭ اتا-اناسى دا قولداعان كورىنەدى. ماناربەكتىڭ اناسى جارقىناي اپاي ءومىر بويى كىتاپحاناشى بولىپ قىزمەت ەتىپتى. «بالالارىم كىتاپقۇمار بولىپ وسسە ەكەن دەپ تىلەدىم, سولاي تاربيەلەدىم. بۇگىن مەنەن باقىتتى جان جوق!» دەيدى ءجۇزى بال-بۇل جانعان جارقىناي انا.
باتىس قازاقستان وبلىسى