5G-گە قالاي قوسىلۋعا بولادى؟

5G-ءدىڭ ارتىقشىلىعى

5G بايلانىسى – ۇيالى بايلانىس تەحنولوگياسىنىڭ بەسىنشى بۋى­نى, قازىرگى ۋاقىتتاعى ەڭ جىلدام بايلانىس جەلىسى. بۇل تەحنولوگيا سەكۋندىنا 10 گيگا­بيتكە دەيىنگى جىلدامدىققا جەتىپ, دەرەكتەردى 4G-مەن سالىس­تىرعاندا ءجۇز ەسە تەز جىبەرە الا­دى. سونىمەن قاتار 5G دەرەكتەر الماسۋ ۋاقىتىن بارىن­شا قىسقارتادى, بۇل ناقتى ۋا­قىت­تاعى قولدانبالار ءۇشىن وتە ما­ڭىزدى. ۇيالى بايلانىستىڭ بەسىنشى بۋىنى ءبىر شارشى شاقىرىم اۋماقتا ميلليون قۇرىلعىعا دەيىن قوسۋعا مۇم­كىن­دىك بەرەدى. ول ۆيرتۋالدى شى­نايىلىق, جاساندى ينتەللەكت, زاتتار ينتەرنەتى, اۆتوپيلوتتى كولىكتەر مەن اقىلدى قالالار سياقتى جاڭا سالالاردى دامىتۋعا مۇمكىندىك جاساپ, زاماناۋي بايلانىس ينفراقۇرىلىمىنىڭ نەگىزىن قالىپتاستىرادى.

5G بايلانىسىنىڭ باستى ارتىقشىلىعىنىڭ ءبىرى – ونىڭ سەنىمدىلىگى مەن تۇراقتىلىعى. مىسالى, ادام كوپ جينالعان جەرلەردە نەمەسە تابيعي اپاتتار كەزىندە جەلىگە اۋىر جۇكتەمە تۇسكەندە جوعارى ساپالى بايلانىستى قامتاماسىز ەتە الادى. 5G تەحنولوگياسى لوگيستيكا مەن تاسىمالداۋ سالاسىندا دا ۇلكەن ارتىقشىلىققا يە. بۇل جۇيە جەتكىزۋ ۇدەرىستەرىن ناقتى ۋاقىت رەجىمىندە باقىلاۋعا جانە كولىكتەردى اۆتوماتتاندىرىلعان تۇردە باسقارۋعا مۇمكىندىك بەرەدى. سونداي-اق 5G جەلى­لەرى ونەركاسىپتىك ءوندىرىستى اۆتو­ماتتاندىرۋعا جول اشادى. وندىرىستىك روبوتتار مەن جابدىقتاردى سينحرونداۋ, قاشىقتان باسقارۋ, اقاۋلاردى جىلدام انىقتاۋ مۇمكىندىگى ارتادى. بۇل شىعىنداردى ازايتادى. قۇرىلىس سالاسىندا دا 5G ارقىلى قۇرىلىس الاڭدارىن باقىلاۋ ۇدەرىستەرى جەڭىل­دەيدى. سونىمەن قاتار تابيعي رەسۋرس­تاردى ءوندىرۋ سالاسىندا 5G دەرەكتەردى جىلدام جيناۋ مەن تالداۋ ارقىلى ءوندىرىس كولەمىن ارتتىرۋعا كومەكتە­سەدى. ال ءبىلىم بەرۋ ­سالاسىندا ينتەراكتيۆتى پلاتفورمالاردى, ۆيرتۋالدى ەكسكۋرسيالاردى, سيمۋلياتورلاردى قولدانۋ مۇمكىندىگى پايدا ­بولادى.

5G قايدا بار؟

ەلىمىزدە 5G بايلانىسىن «Tele2», «Altel», «Activ», «Kcell», «FMobile» وپەراتورلارى ۇسىنادى. وسى تۇستا «FMobile» وپەراتورىن ەرەكشە اتاپ وتۋگە بولادى. ول – ۆيرتۋالدى وپەراتور. 5G جەلىسىنە «eSim» ارقىلى قوسىلادى. ال باي­لانىس وپەراتورلارىنىڭ ارا­سىندا «Beeline»-دا 5G جوق. كوم­پا­نيانىڭ باس ديرەكتورى ەۆگەني ءناستراديننىڭ ايتۋىنشا, 5G-ءدى ەنگىزۋ ۇلكەن ينۆەستيتسيانى تالاپ ەتەدى ءارى تەحنولوگيانى ءتيىمدى مونەتيزاتسيالاۋ ءۇشىن ناقتى سۇرانىستى انىقتاۋ قاجەت. «ازىرگە كومپانيا ءۇشىن 4G جەلى­سىن جاقسارتۋعا باسىمدىق بەرىپ, تەحنولوگيانى بارلىق پايدا­لا­نۋشىلارعا قولجەتىمدى ەتۋ ما­ڭىز­دىراق. 5G-ءدى دامىتۋدىڭ باس­تى ماسەلەلەرىنىڭ ءبىرى – جوعارى جيى­لىك­تەگى بازالىق ستانسالار­دى سالۋ قا­جەتتىلىگى. بۇل قوسىم­شا شىعىن­دار­دى قاجەت ەتەدى», دەيدى ول.

«Activ» جانە «Kcell» جەلىلەرى 5G بايلانىسىنىڭ بازالىق ستانساسىن الماتى, استانا, شىمكەنت, اقتاۋ, اتىراۋ, اقتوبە, جاڭا­وزەن, كوكشەتاۋ, قاراعاندى, قوستاناي, پاۆلودار, پەتروپاۆل, سەمەي, تاراز, تۇركىستان, ورال قالالارىندا سالىپ جاتسا, «Tele2» مەن «Altel» جەلىلەرى الماتى, استانا, شىمكەنت, اقتاۋ, اقتوبە, اتىراۋ, قاراعاندى, كوكشەتاۋ, قوستاناي, جەزقازعان, پاۆلودار, پەتروپاۆل, سەمەي, تۇركىستان, تاراز, ورال, وسكەمەن قالالارىن قامتاماسىز ەتۋگە جۇمىس ىستەپ جاتىر. اتالعان وپەراتورلار قازىرگى ۋاقىتتا 1144 بازالىق ستانسا ورناتقان. 2025 جىلعا دەيىن ەلدىڭ بارلىق ءىرى قالالارىندا 5G بايلانىسى تولىقتاي ىسكە قوسىلادى دەپ جوسپارلانعان. ۇيالى بايلانىس وپەراتورلارى بۇل تەحنولوگيا­نى ەنگىزۋگە ميللياردتاعان تەڭگە ينۆەستيتسيا قۇيىپ جاتىر.

5G-ءدى پايدالانۋ ءۇشىن SIM-كارتانى نەمەسە ءتاريفتى اۋىس­تى­رۋدىڭ قاجەتى جوق. بىراق قۇ­رىل­عىنىڭ 5G تەحنولوگيانى قابىلداۋى ماڭىزدى. 2020 جىلدان باستاپ شىعارىلعان سمارتفونداردىڭ كوپشىلىگى 5G-گە قوسىلا الادى. الايدا كەيبىر ارزان مودەلدەردە بۇل قىزمەت ءتۇرى بولماۋى مۇمكىن.

5G-ءدى قولدايتىن سمارتفوندار ءتىزىمى

Apple: iPhone 12, 12 mini, 12 Pro, 12 Pro Max, 13, 14, iPhone SE 3-بۋىنى, iPhone 15, 16 سەرياسى.

Samsung: Galaxy S20, S21, S22, S23, Galaxy Note 20, Note 20 Ultra, Galaxy Z Fold, Flip 5G, Galaxy A52 5G, A32 5G.

Xiaomi: Mi 10, Mi 11, Mi 11 Ultra, Mi 12, Redmi Note 10 5G, Redmi Note 11 Pro 5G, Poco M3 Pro 5G, Poco F3.

OnePlus: OnePlus 8, 8 Pro, 9, 9 Pro, Nord N10 5G, Nord N200 5G, OnePlus 10 جانە 11.

Google: Pixel 5, Pixel 6, Pixel 6a, Pixel 7, Pixel 8 سەريالارى,

Huawei: P40, Mate 40, Mate Xs جانە جاڭا Nova, P سەريالارى

Oppo: Oppo Find X2, X3, X5, Reno سەرياسىنىڭ كەيبىر مودەلدەرى.

ەگەر سمارتفونىڭىز 5G-گە قوسى­لاتىن قۇرىلعىلار تىزىمىن­دە بولماسا, الدىمەن ونىڭ باع­دار­لامالىق قامتاماسىز ەتۋ­دىڭ سوڭ­عى نۇسقاسىنا جاڭار­تىلعانىنا كوز جەتكىزىڭىز. كەيدە جاڭارتۋدان كەيىن قۇرىلعى 5G-گە قوسىلا الادى. سونداي-اق تەلەفونىڭىزدىڭ جەلى پارا­مەترلەرىن تەكسەرىپ, 5G وپتسياسىن تاڭداپ قوسۋعا بولادى. ەگەر بۇل پارامەترلەر جوق بولسا, سمارتفوندى 5G جەلىسىنە قوسۋ مۇمكىن ەمەس. ودان بولەك, سمارتفوننىڭ 5G-گە قوسىلاتىنىن تەكسەرۋ ءۇشىن, ۇيالى وپەراتورعا حابارلاسىپ, ايماقتاعى 5G جەلىسىنىڭ قولجەتىمدىلىگىن انىقتاۋ قاجەت. ءار وپەراتوردىڭ ءوز جەلىسىنە قوسىلاتىن قۇرىلعىلارعا ارنال­عان ارنايى پارامەترلەرى بولۋى مۇمكىن. مىسالى, «Beeline» نەمەسە «Kcell/Tele2» سىندى وپەراتورلاردىڭ ارقايسىسىنىڭ سمارتفونعا ارنالعان ارنايى پارمەندەرى بار, سول ارقىلى جەلىگە قوسىلۋ مۇمكىندىگىن تەكسەرۋگە بولادى.