ورال قالاسىندا ورنالاسقان 5517 اسكەري ءبولىمىنىڭ ءبىر توپ ساربازىنا ەلىمىزدىڭ جوعارى وقۋ ورىندارىنا تۇسۋگە ارنايى سەرتيفيكات تابىستالدى.
بۇل جونىندە قازاقستان رەسپۋبليكاسى ۇلتتىق ۇلانى «باتىس» وڭىرلىك قولباسشىلىعىنىڭ ءباسپاسوز قىزمەتى حابارلادى. تەگىن ءبىلىم الۋعا مۇمكىندىك بەرەتىن گرانتتار جاۋىنگەرلىك قىزمەت جانە جاۋىنگەرلىك دايارلىق بارىسىندا ەرەكشە كوزگە تۇسكەن ساربازدارعا بەرىلگەن.
وتان الدىنداعى بورىشىن اتقارۋ بارىسىندا ۇزدىك دەپ تانىلعان ۇلاندىقتارعا قورعانىس مينيسترلىگىنىڭ اتىنان بولىنگەن سەرتيفيكاتتارى اسكەري ءبولىم الاڭىندا سالتاناتتى تۇردە تابىس ەتىلدى. گرانت يەگەرى اتانعان ساربازدىڭ ءبىرى – قاتارداعى جاۋىنگەر مارعۇلان ورازبەكوۆ.
– مەن ۇلتتىق ۇلان قاتارىندا ازاماتتىق پارىزىمدى اتقارىپ ءجۇرمىن. جاستايىمنان ارمانداعان جوعارعى وقۋ ورنىنا «سروچنيك.2» باعدارلاماسى ارقاسىندا تۇسۋگە مۇمكىندىك الىپ وتىرمىن. بولاشاعىما جول اشقان, وتان قورعاۋشى رەتىندە قالىپتاسۋعا كومەكتەسىپ, تاجىريبەسىمەن بولىسكەن كومانديرلەرىمە ەرەكشە العىس ايتامىن, – دەيدى بولاشاق ستۋدەنت مارعۇلان ورازبەكوۆ.
ول ەلىمىزدەگى ەڭ بەدەلدى وقۋ ورداسىنىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتىنە وقۋعا ءتۇسۋدى جوسپارلاپ وتىر. ايتا كەتەيىك, مۇنداي گرانتقا قول جەتكىزگەن ساربازدار ەندى ەلىمىزدەگى تاڭداۋلى وقۋ ورىندارىنا ۇلتتىق بىرىڭعاي تەستىلەۋدەن وتپەي-اق تۇسە الادى.
– اسكەري بولىمدە, بولىنىستەردە ۆزۆود جانە روتا كومانديرلەرى جاۋىنگەرلىك دايارلىق ەسەبىن تۇراقتى جۇرگىزىپ وتىرادى. ول ەسەپتە ساربازدىڭ ساباق ۇلگەرىمى, بەلگىلەنگەن نورماتيۆتەردى ورىنداۋ ناتيجەسى, جەكە باسىنىڭ ءتارتىبى ەسكەرىلەدى. وسىلاردىڭ ناتيجەسىندە اي سايىن بارلىق وقۋ ءپانى بويىنشا رەيتينگ شىعارىلىپ, بارلىق دەرەك ەلەكتروندىق پلاتفورماعا جازىلادى, – دەدى ءبولىم كومانديرىنىڭ ورىنباسارى مايور داۋرەن راحيمبەكوۆ.
باتىس قازاقستان وبلىسى