شۆەيتساريا مەن اقش ينجەنەرلەرى ءتىرى نەيرونداردان جاسالعان جاساندى زەردە ارقىلى باسقارىلاتىن بيوگيبريدتى روبوت جاساپ شىعاردى. ءپىشىنى كوبەلەككە ۇقساس قۇرىلعى سىمسىز باسقارۋ جۇيەسىنىڭ ارقاسىندا سۋدا جۇزە الادى ءارى مۇلتىكسىز مانەۆرلار جاسايدى.
ادامنىڭ دىڭگەك جاسۋشالارىنان الىنعان قوزعالتقىش نەيروندار مەن كارديوميوتسيتتەردى بىرگە ءوسىرۋ ارقىلى قالىپتاسقان نەيروبۇلشىقەت جۇيەسى – روبوتتىڭ نەگىزگى ەرەكشەلىگى. جاسۋشالار ەكىجاقتى جىلدام بايلانىستاردىڭ قالىپتاسۋىنا مۇمكىندىك بەرەتىن ارنايى ميكروفليۋيدتى قۇرىلعىدا وسىرىلگەن.
زەرتتەۋشىلەر جيىلىكتى مۋلتيپلەكستەۋ جۇيەسىن پايدالانا وتىرىپ, روبوت ميىنىڭ نەيروندارىن ىسكە قوسقان. بۇل جۇزگىشتەردىڭ قوزعالىسىن باقىلاۋعا, ءجۇزۋ جىلدامدىعى مەن باعىتىن رەتتەۋگە كومەكتەسەدى.
سىناق بارىسىندا روبوت 0,52 مم/س جىلدامدىقتا جىلجىپ, جۇزگىشتەرىمەن سەكۋندىنا ەكى رەتكە دەيىن قوزعالىس جاساعان. سونداي-اق ول ءار ميلليمەترگە 0,11 راديان قيسىق جاساپ اينالا العان.
كوپتەگەن بيوروبوتتان ايىرماشىلىعى, بۇل – ادام جۇيكە جۇيەسى بىرىكتىرىلگەن العاشقى جۇيە. اتالعان روبوت قورشاعان ورتانىڭ وزگەرىستەرىنە ءتيىمدى بەيىمدەلۋگە مۇمكىندىك بەرەدى. زەرتتەۋشىلەر وزدەرىنىڭ ازىرلەمەسى بولاشاقتا قورشاعان ورتا سيگنالدارىن قابىلداپ ۇيرەنە الاتىن كۇردەلى بيوگيبريدتى قۇرىلعىلار جاساۋعا نەگىز بولا الاتىنىن ايتادى.