رەسپۋبليكالىق رەفەرەندۋم تاعايىندالعان ساتتەن باستاپ باتىس قازاقستان وبلىسىنىڭ اۋماقتىق رەفەرەندۋم كوميسسيالارى رەفەرەندۋمعا دايىندىق جۇمىسىن باستاپ كەتكەن بولاتىن. سودان بەرى وبلىستىق رەفەرەندۋم كوميسسياسىنىڭ 3 وتىرىسى وتكىزىلگەن.
«بۇگىنگى تاڭدا وبلىستا 681 سايلاۋ كوميسسياسى بولسا, رەفەرەندۋمدا سونىڭ 510-ى, ياعني قۇرامىندا 3 220 مۇشەسى بار 14 اۋماقتىق رەفەرەندۋم كوميسسياسى جانە 496 ۋچاسكەلىك رەفەرەندۋم كوميسسياسى جۇمىس ىستەپ جاتىر. بۇل كوميسسيا مۇشەلەرىنىڭ 87,6%-ى – ءتۇرلى سالادا جۇمىس ىستەۋشىلەر, 11,5%ى – جۇمىستا جوق, 1,0%-ى – زەينەت جاسىنداعىلار. كوميسسيا مۇشەلەرىنىڭ 74,8%-نىڭ سايلاۋدى وتكىزۋ تاجىريبەسى بار», دەيدى باتىس قازاقستان وبلىستىق اۋماقتىق سايلاۋ (رەفەرەندۋم) كوميسسياسىنىڭ توراعاسى ءادىل جولامانوۆ.
وڭىردە رەفەرەندۋم كوميسسيالارىنداعى بوس ورىندارعا تامىز ايىندا-اق ءماسليحات سەسسيالارىنىڭ شەشىمىمەن جاڭا قىزمەتكەرلەر الىنعان. سونداي-اق ورال قالاسىندا 5 جاڭا سايلاۋ ۋچاسكەسى قۇرىلىپ, كوميسسيا مۇشەلەرى جاساقتالعان.
رەفەرەندۋم قارساڭىندا كوميسسيا مۇشەلەرىن وقىتۋ جۇمىسى جوسپارلى تۇردە جۇرگىزىلدى. كوميسسيا مۇشەلەرىنە ارنالعان بىلىكتىلىك سەمينارى 95 مارتە ءوتىپ, بارلىق قىزمەتكەر وقىتىلعان. ال رەسپۋبليكالىق سەمينارعا قاتىسقان ترەنەرلەر بارلىق اۋدان مەن ورال قالاسىنىڭ كوميسسيا مۇشەلەرىن كاسكادتى ادىسپەن وقىتىپ شىعارعان.
«رەسپۋبليكالىق رەفەرەندۋمدى ازىرلەۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارى بويىنشا باق-تا بارلىق اقپارات جاريالاندى. 26 قىركۇيەكتەن بەرى ازاماتتار داۋىس بەرۋ ۋاقىتى مەن ورنى تۋرالى حاباردار ەتىلىپ, شاقىرۋ بيلەتتەرى ۇلەستىرىلدى. داۋىس بەرۋ كۇنى قارساڭىندا بارلىق رەفەرەندۋم ۋچاسكەلەرىندە بىرىڭعاي «اشىق ەسىك» كۇنى وتكىزىلدى. بۇل كۇنى ۋچاسكە توراعالارى ازاماتتارعا رەفەرەندۋم زاڭنامالارىن قوسىمشا ءتۇسىندىرىپ, داۋىس بەرۋ ەرەكشەلىكتەرى تۋرالى اڭگىمەلەپ بەردى. بۇدان بولەك, وبلىس بويىنشا حالىقتىڭ رەفەرەندۋم حاقىنداعى ساۋالدارىنا تاۋلىك بويى جاۋاپ بەرەتىن 13 كولل-ورتالىق ۇيىمداستىرىلدى. حالىق كوپ شوعىرلاناتىن ورىنداردا لەد-ەكران ارقىلى ۆيدەوروليكتەر, مادەنيەت وشاقتارى مەن بازارلاردا اۋديوروليكتەر تاراتىلدى. الەۋمەتتىك جەلىلەر ارقىلى دا اقپارات جاريالانىپ, تۇرعىندارعا «Telegram», «WhatsApp» چاتتارى ارقىلى دا حابارلاۋ جۇمىسى ۇيىمداستىرىلدى. سونىمەن قاتار, داۋىس بەرۋشىلەرى 1 مىڭنان اساتىن 192 ۋچاسكەدە ونلاين سەرۆيس قىزمەتى جانە وبلىس ورتالىعىنىڭ 5 ۋچاسكەسىندە ازاماتتاردى تىركەۋ سەرۆيستەرى ۇيىمداستىرىلدى. اۋداندار مەن ورال قالاسىندا ورتالىق رەفەرەندۋم كوميسسياسىنىڭ اقپاراتتىق باننەرلەرى 245 ورىنعا ءىلىندى. ءبىز كامەلەت جاسىنداعى ءار ازاماتتىڭ ەل بولاشاعى ءۇشىن اسا ماڭىزدى ماسەلەدە بەيتاراپ قالماي, ازاماتتىق بەلسەندى پوزيتسياسىن كورسەتۋىنە بارلىق جاعداي جاساۋعا تىرىستىق», دەيدى وبلىستىق كوميسسيا مۇشەسى اسىلانبەك عۇباشەۆ.
رەفەرەندۋمعا وبلىس بويىنشا 496 سايلاۋ ۋچاسكەcى قىزمەت كورسەتەدى دەدىك. كوميسسيا توراعاسىنىڭ ايتۋىنشا, وسى بولىمشەلەردىڭ ماتەريالدىق-تەحنيكالىق جاعدايى الدىن الا تەكسەرىلىپ, بارلىق قاجەتتىلىك تولىق شەشىلگەن ەكەن. سونىڭ ىشىندە مۇگەدەكتىگى بار 2 208 ادامعا ءوز داۋىسىن بەرۋگە بارلىق جاعداي جاسالعان.
وبلىستاعى بارلىق ۋچاسكەلەر ءبىرىنشى قاباتتاردا ورنالاسقان, 443 ۋچاسكە پاندۋسپەن, 412 ۋچاسكە كىرەبەرىس, 373 ۋچاسكەلەردىڭ ءىشى ءارتۇرلى تاكتيلدى بەلگىمەن جابدىقتالعان. سايلاۋ ۋچاسكەلەرىندە مۇگەدەكتەر ارباسىمەن جۇرەتىن ازاماتتارعا لايىقتالعان 264 كابينا ورناتىلىپتى. مۇمكىندىگى شەكتەۋلى ازاماتتارعا جاعداي جاساۋ ءۇشىن قوسىمشا 53 ۋچاسكەدە پاندۋس جاسالعان. داۋىس بەرۋ كۇنى, 28 ينۆاتاكسي قىزمەت كورسەتەدى ەكەن, سونىڭ 14-ءى ورال قالاسىندا. رەفەرەندۋم كۇنى 10 سۋردواۋدارماشى دا قاجەت بولعاندا كومەك كورسەتۋگە دايىن تۇرادى.
جالپى باتىس قازاقستان وبلىسىندا 444 428 ازامات داۋىس بەرۋشى تىزىمىندە تىركەلگەن.