بۇگىندە تۇرمىستىق قاتتى قالدىقتاردى كادەگە جاراتىپ, ەكىنشى شيكىزات رەتىندە پايدالانۋدى جولعا قويعان ەلدەر ساپالى قوقىس ءۇشىن تالاساتىنىن بۇعان دەيىن دە جازعان ەدىك. شىن مانىندە, ءوز قوقىسى وزىنە جەتپەي, وزگە مەملەكەتتەردەن تاسيتىن مەملەكەتتەر بار. ال ءبىزدىڭ الماتى قالاسىندا پوليتسيا دەپارتامەنتى قوقىستى كەز كەلگەن جەرگە تاستاعان تۇرعىندارعا ايىپپۇل سالۋ جونىندە شەشىم قابىلداپ جاتىر.
ەندىگى جەردە الماتىلىقتارعا كولەمى ۇلكەن تۇرمىستىق قالدىقتاردى شىعارۋ ءۇشىن مامانداندىرىلعان ۇيىمدارعا حابارلاسۋعا نەمەسە وزدەرى قالدىقتاردى ءتيىستى جەرگە اپارۋىنا تۋرا كەلەدى. ويتكەنى مەگاپوليستە كولەمى ۇلكەن, ەسكى جيھازدار, سىنعان تۇرمىستىق تەحنيكا, قۇرىلىس قالدىقتارى, سونداي-اق قاپتامالار, پلاستيكالىق بوتەلكەلەر سياقتى قوقىستاردىڭ كوبەيە ءتۇسۋى كادىمگىدەي ماسەلەگە اينالىپ كەلەدى.
تۇرمىستىق قالدىقتاردى وڭدى-سولدى لاقتىرۋ تەك كونتەينەرلىك الاڭدارعا عانا ءتان ەمەس, سونىمەن قاتار قوعامدىق ورىنداردىڭ دا ءسانىن كەتىرىپ, قالانىڭ سانيتارلىق جاعدايىنا كەسىرىن تيگىزىپ وتىر. سوندىقتان قۇزىرلى مەكەمەلەر وسى ماسەلەنى شىنداپ قولعا الىپ, بيىل 16 قىركۇيەكتەن باستاپ الماتىدا اباتتاندىرۋ سالاسىنداعى كەلەڭسىزدىكپەن كۇرەستى كۇشەيتۋگە كىرىستى.
قىسقاسى, كولەمدى قوقىستاردى, بوتەلكە, قاپتاما سياقتى قالدىقتاردى كوشەنىڭ كەز كەلگەن جەرىنە لاقتىرعانى ءۇشىن ايىپپۇل سالىنادى. وسى ورايدا قالالىق ەكولوگيا جانە قورشاعان ورتانى قورعاۋ باسقارماسى پوليتسيا دەپارتامەنتىمەن بىرلەسىپ, ءتارتىپ بۇزۋشىلاردى انىقتاۋعا باعىتتالعان بىرلەسكەن رەيدتەر جۇرگىزبەك.
بۇعان قوسا تۇرمىستىق قالدىقتار زاڭسىز ءجيى توگىلەتىن جەرلەرگە بەينەباقىلاۋ كامەرالارى ورناتىلادى. سونىمەن قاتار ءتارتىپ ساقشىلارى ستيحيالىق ورىنداردا رۇقساتسىز سىرتقى جارنامانى ورنالاستىرۋ جاعدايىنا باسا نازار اۋدارماق. ماسەلەن, بيىلعى قىركۇيەك ايىنان بەرى كوممۋنالدىق ينفراقۇرىلىمدى دامىتۋ باسقارماسى جۇرگىزگەن تەكسەرۋ ناتيجەلەرى مەگاپوليس كوشەلەرىندەگى قوسىمشا قۇرال-جابدىقتار مەن رەسۋرستاردى قاجەت ەتەتىن, قوقىس جاشىكتەرى اۋزى-مۇرنىنان شىعىپ جاتقان 52 اۋماقتى انىقتادى. سوندىقتان سانيتارلىق تازالىقتى كۇشەيتۋ ماقساتىندا ديزاين-كود بويىنشا جاڭا كەڭ قوقىس جاشىكتەرىن ساتىپ الۋ, سونداي-اق قوسىمشا تازارتۋ, پاترۋلدىك مارشرۋتتارىن ىسكە قوسۋ جوسپارلانىپ وتىر.
قازىرگى تاڭدا قالادا 33 مىڭعا جۋىق قوقىس جاشىكتەرى بولسا, تازالىق جۇمىستارىنا 1 300-دەي ادام تارتىلىپ, مىڭنان اسا تەحنيكا جۇمىلدىرىلعان. قالاي دەسەك تە, ءىرى كولەمدى كوشە قالدىقتارىن ءتيىستى ورىنعا تاستاماۋ جۇرت كوپ جينالاتىن ورىنداردىڭ لاستانۋىنا عانا ەمەس, قوقىس جينايتىن كومپانيالاردىڭ جۇمىس ىرعاعىنا دا كەسىرىن تيگىزەدى. مىسالى, كوشە قوقىستارى تروتۋارلار مەن جولداردى شاشىپ قانا قويماي, ارىقتاردى دا بىتەيدى, ەسكى جيھاز, سىنعان تەحنيكا قوقىس تاسيتىن نىعىزداعىشتاردىڭ جۇمىسىن قيىنداتادى.
ەندىگى جەردە «اكىمشىلىك قۇقىق بۇزۋشىلىق تۋرالى» كودەكسىنىڭ 505-بابىنا سايكەس, اباتتاندىرۋ ەرەجەلەرىن بۇزعان جەكە تۇلعالارعا – 20, شاعىن بيزنەس جانە كوممەرتسيالىق ەمەس ۇيىمدارعا – 30, ورتا كاسىپكەرلىك سۋبەكتىلەرىنە – 40, ءىرى كاسىپكەرلىك سۋبەكتىلەرىنە 100 اەك كولەمىندە ايىپپۇل سالىنباق.
بۇعان قوسا قالانىڭ سانيتارلىق جاعدايى مەن ءسانىن قاشىرماۋ ماقساتىندا 2024-2025 جىلدارى 2 مىڭنان اسا جاڭا كونتەينەر ورناتۋ جوسپارلانعان. قالانىڭ ديزاين كودىنا سايكەس كەلەتىن كولەمدى كونتەينەرلەر اۋماقتىڭ جاعىمسىز يىستەرىن ازايتىپ, قۇستار مەن قاڭعىباس حايۋانداردىڭ كىرۋىنە كەدەرگى كەلتىرەدى.
وسى ورايدا الماتىدا تولىپ تۇراتىن قوقىس جاشىكتەرىن تازالاۋ ءۇشىن قوسىمشا پاترۋل ەنگىزىلگەنىنە توقتالا كەتۋ كەرەك. وسىلايشا, «الماتى – ءبىزدىڭ ورتاق ءۇيىمىز» قالالىق ناۋقانى مەن «تازا قازاقستان» رەسپۋبليكالىق باعدارلاماسى اياسىندا قوقىس جاشىكتەرىن تازالاۋدى باقىلاۋدىڭ جاڭا امالدارى جاسالىپ جاتىر.
الماتى