باتىس قازاقستان وبلىسىندا پوليتسيا دەپارتامەنتىنىڭ باستاماسىمەن «ورال – ەسىرتكىسىز قالا» اتتى باعدارلاما باستالعانىن بۇدان بۇرىن حابارلاعان ەدىك. جاقىندا ءتارتىپ ساقشىلارى ەرىكتىلەرمەن بىرگە ەسىرتكى جارنامالارىن جويۋ اكتسياسىن وتكىزدى.
ادەتتە ەسىرتكى ساتۋمەن اينالىساتىن توپتار ءوز جارناماسىن الەۋمەتتىك جەلىدە, قالا عيماراتتارىندا گراففيتي سۋرەتتەر ارقىلى جاسايدى. وسىعان وراي جاقىندا باتىس قازاقستان وبلىسى پوليتسيا دەپارتامەنتى ەسىرتكى جارنامالارىن ءوشىرۋ بويىنشا رەيد ۇيىمداستىردى. شاراعا 150-دەن اسا ادام قاتىستى. ولاردىڭ اراسىندا پوليتسيانىڭ ەسىرتكى قىلمىسىنا قارسى ءىس-قيمىل باسقارماسى مەن قالالىق بولىمدەر قىزمەتكەرلەرى, جوعارى وقۋ ورىندارى ستۋدەنتتەرى, «عاسىر» جاستار قوعامدىق بىرلەستىگى وكىلدەرى, قالا ەرىكتىلەرى, سونداي-اق «ورال – ەسىرتكىسىز قالا» مونيتورينگتىك توبىنىڭ مۇشەلەرى بولدى.
– جاستار اراسىندا ناشاقورلىق ماسەلەسى وتە وزەكتى بولىپ تۇر. اسىرەسە سينتەتيكالىق ەسىرتكىنىڭ جاڭا تۇرلەرى كەڭ تارالۋىنا الاڭدايمىز. وڭىردە ەسىرتكى قىلمىسى ازايار ەمەس. ءتىپتى كامەلەتكە تولماعانداردى ەسىرتكى بيزنەسىنە تارتۋ فاكتىلەرى دە كەزدەسەدى. سوندىقتان ەسىرتكىمەن كۇرەسۋ – بارشامىزدىڭ ورتاق مىندەتىمىز. ءبىز جاقىندا بەينەباقىلاۋ كامەرالارىنىڭ كومەگىمەن اقساي قالاسىندا ەسىرتكى جارنامالاعان ەكى ءجاسوسپىرىمدى ۇستادىق. ولار 7 جىلعا دەيىن باس بوستاندىعىنان ايىرىلۋى مۇمكىن. اينالايىن, جاستار, بارلىعىڭىزعا ايتارىم, وسى ز ۇلىمدىقپەن بىرگە كۇرەسەيىك. بۇل دەرتكە قوعام بولىپ قارسى تۇرعاندا عانا بالالارىمىزدىڭ ەسىرتكىسىز بولاشاعىن جاساي الامىز, – دەدى اكتسياعا كەلگەن وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى ارمان ورازاليەۆ.
رەيد بارىسىندا ءىس-شاراعا قاتىسۋشىلار 24 باعىت بويىنشا توپقا ءبولىنىپ, قالا اۋماعىندا 100-گە جۋىق جارنامانى جويىپ شىقتى.
– بۇل اكتسيا ەسىرتكى سايتتارى مەن ەسىرتكىنىڭ زاڭسىز اينالىمىن ناسيحاتتايتىن جازۋلار مەن سۋرەتتەردى جويۋ ماقساتىندا وتكىزىلىپ وتىر. كوپ جاستار ەسىرتكى ساتاتىن ينتەرنەت-دۇكەندەردىڭ گراففيتيىن, سۋرەتتەرىن, جاپسىرمالارىن تاراتۋعا تارتىلىپ جاتىر. ولار بۇل ارەكەتىنىڭ زاڭمەن قۋدالاناتىنىن بىلمەۋى دە مۇمكىن. ءبىز بۇنىڭ قىلمىستىق قۇقىق بۇزۋشىلىق ەكەنىن ەسكەرتەمىز, – دەيدى ەسىرتكى قىلمىسىنا قارسى ءىس-قيمىل باسقارماسىنىڭ باستىعى, پوليتسيا پودپولكوۆنيگى مارات سۇگىروۆ.
قازىرگى تاڭدا ەسىرتكى ساتۋشىلار «تاۋارىن» وتكىزۋدىڭ سان ايلاسىن جاسايدى. سينتەتيكالىق زاتتىڭ جارناماسى كوپتەگەن سايتتا, الەۋمەتتىك جەلىدە ءجۇر. كەيبىرەۋلەرگە ەسىرتكى زاتىن تاسىمالداۋ, تاراتۋ جەڭىل تابىس كوزى سياقتى كورىنۋى مۇمكىن. الايدا ەلىمىزدە ەسىرتكى قۇرالدارىن, پسيحوتروپتىق زاتتاردى, سول تەكتەستەردى ناسيحاتتاعانى جانە زاڭسىز جارنامالاعانى ءۇشىن قىلمىستىق كودەكستىڭ 299-1-بابى بويىنشا قىلمىستىق جاۋاپكەرشىلىك كوزدەلگەن.
پوليتسيا قىزمەتكەرلەرى ەسىرتكى زاتتارىنىڭ گراففيتي-جارناماسىنا كۋا بولعانداردىڭ دەرەۋ «102» وپەراتورىنا حابارلاسۋىن سۇرايدى.
باتىس قازاقستان وبلىسى