باتىس قازاقستان وبلىسىنىڭ قازتالوۆ اۋدانىنا قاراستى سارالجىن اۋىلىندا 60 ورىندىق جاڭا مەكتەپ اشىلدى. شالعايداعى شاعىن اۋىلدىڭ بالالارى جاڭا وقۋ جىلىن جاڭا عيماراتتا باستادى.
اۋىل حالقىنىڭ كوپتەن كۇتكەن قۋانىشىنا وبلىس اكىمىنىڭ ورىنباسارى قايىرجان مەڭدىعاليەۆ, اۋدان اكىمى اسلانبەك سارقۇلوۆ قاتىستى.
– بارشاڭىزدى ءبىلىم كۇنىمەن بىرگە كەلگەن زور قۋانىش, مىناداي كەرەمەت مەكتەپتىڭ اشىلۋىمەن قۇتتىقتايمىن! بۇل – مەملەكەتىمىزدىڭ سىزدەرگە, اۋىلدا وتىرعان قايسار حالىققا, اۋىلدا تۋىپ, اۋىلدا ءوسىپ كەلە جاتقان بالدىرعاندارعا تارتۋى. وسى جىلى پرەزيدەنت تاپسىرماسىمەن وبلىسىمىزدا 11 مەكتەپ سالىنسا, سونىڭ ءبىرى – وسى عيمارات. بۇل مەكتەپتى «كپو ب.ۆ.» كومپانياسى وبلىس الدىنداعى الەۋمەتتىك مىندەتتەمەلەرى اياسىندا سالىپ بەرىپ وتىر, – دەدى قايىرجان مەڭدىعاليەۆ.
جاڭا مەكتەپتىڭ اشىلۋ سالتاناتىن اۋىل تۇرعىندارىمەن بىرگە ەرەكشە كۇتكەن جاننىڭ ءبىرى – ارداگەر ۇستاز, قازاقستان جازۋشىلار وداعىنىڭ مۇشەسى, حالىقارالىق «الاش» سىيلىعىنىڭ لاۋرەاتى داريعا مۇشتانوۆا بولاتىن. ويتكەنى بۇگىندە «پاراسات» وردەنىنىڭ يەگەرى, «قازتالوۆ اۋدانىنىڭ قۇرمەتتى ازاماتى» اتانعان اقىن ءدال وسى جەردە دۇنيەگە كەلگەن. تۋعان اۋىلىنداعى تويعا اقىن دا ارنايى باردى.
«اۋىلىم – اتا قونىس, قۇت مەكەنىم,
بابالار ايتىپ كەتكەن قۇتتى ەكەنىن.
قياعا قانات قاعىپ پەرزەنتتەرى,
تانىتقان توپىراعىنىڭ مىقتى ەكەنىن!» دەپ جىرلاعان اقىننىڭ اتىنا جاڭا مەكتەپتە ارنايى سىنىپ اشىلىپتى. شاعىن اۋىل مەكتەبىنەن بۇرىن دا ونەرلى ورەندەر, ساحنا شەبەرلەرى كوپ شىققان ەكەن. ال اقىن اتىنداعى جاڭا سىنىپتا دومبىرا, كوركەمسوز وقۋشىلار ۇيىرمەسى اشىلماق.
كوكتەرەك اۋىلدىق وكرۋگىنە قاراستى سارالجىن اۋىلىندا نەبارى 60-قا جۋىق ءۇي, 265 تۇرعىن تۇرادى. اۋىلعا تابيعي گاز تارتىلعان. وڭىردە قولعا الىنعان «قالادان – اۋىلعا» باعدارلاماسى اياسىندا مۇندا ەكى پاتەرلى سۋ جاڭا ءۇي سالىنىپ جاتىر. ول دا جاقىن ارادا پايدالانۋعا بەرىلمەك.
– كەڭەس وداعىنىڭ باتىرى ءماجيت ءجۇنىسوۆ اتىنداعى نەگىزگى مەكتەپتىڭ كونە عيماراتى 1989 جىلى سالىنعان ەدى. ول ەندى كىتاپحانا مەن فەلدشەرلىك-اكۋشەرلىك پۋنكتكە بەرىلەدى. سۋ جاڭا وقۋ كابينەتتەرىمەن جابدىقتالعان جاڭا مەكتەپتىڭ جالپى قۇنى – 750 ملن تەڭگە. ونىڭ اۋلاسىندا شاعىن فۋتبول الاڭى, باسكەتبول, جۇگىرۋ جولاعى, دەمالىس مۇيىستەرى بار, – دەيدى اۋدان اكىمىنىڭ ورىنباسارى سەرىك قايىرليەۆ.
«اۋىلىمىزدىڭ ءوڭى كىرىپ, ەكىنشى تىنىسى اشىلعانداي بولدى. شىركىن, ەندى ۇيالى بايلانىس ورناپ, اۋدان, وكرۋگ ورتالىعىنا جالعايتىن جولىمىز جوندەلسە», دەيدى سارالجىندىقتار.
باتىس قازاقستان وبلىسى